2 Aba Kolinti 11
11
U Pabuli na batumiwa abamyasi
1Nalondagha ukuti ngali mwanfisilagha ilyoyo panandi nu bupunganu bwane ubu. Nalamba munfisile ilyoyo! 2Indi nu buzuba namwe ukuyana namumo u Chala abeleye namwe nu buzuba. Pakuti nkabazingilila kwa Kilisitu ngati mulindu yuyo atamumenye nalumo umwanavuli. 3#Ubw. 3.1-5, 13Indi nubogha ukuti inyinong'ono zyinyu zikwiza pakuzimbuliwa ukuyana namumo u Eva akazimbuliliwa nu buchevu ubwa njoka ukuti mutakabe bantu aba bwanaloli, sona nukwiyipa kwa Kilisitu. 4Pakuti nanti yumo akwiza kukwinyu nukulumbilila u Yesu uyunji, yuyo alekanite nu Yesu yuyo tukalumbilila, pamo nanti mwapokela umuzimu ghugho ghulekanite nu Muzimu Umuzelu yuyo mukapokela, pamo amazyu aghanji ghagho ghalekanite na Mazyu Amiza ghagho mukaghitika, mukughivwila lubilolubilo nkani.
5Naloli inzimenye ukuti ane inte ne munandi uwabumalilo napo panandi pa batumiwa babo abantu bakuti bapamwanya nkani. 6Napapo ne mwana mukanenele, loli amahala ghalimo. Twabalanjizya akiza nkani zinizi muvintu vyosi.
7Nkimba yikaba mbibi kukwane ukwiyisya nemwene, umwakuti imbakwezye amwe pakulumbilila Amazyu Amiza agha Chala kukwinyu ukusita ukundipilapo indalama yimo? 8Nkabombagha ngati po nkuvifyula ivipanga ivinji pakupokela ubwavwilizi bwabo, umwakuti imbavwe amwe. 9#Filp. 4.15-18Pakabalilo kako nkaba namwe, sona bo nasobelwa, intakamutamyapo nayumo umuntu, pakuti abakamu babo bakafuma mu Makedoniya bakampa ivyakusobelwa vyane. Po nkikanizya nemwene, sona nkwiza pakwikanizya nemwene ukuti intakabatamyepo nalumo. 10Pakuti ubwanaloli ubwa Kilisitu buli mumwane, amituvyo ghane agha ghatakwiza pakukaniziwapo nalumolumo muvigaba ivya Akaya. 11Po choni? Nkimba chifukwa ichakuti intabaghanite? U Chala umwenecho azimenye ukuti imbaghanite.
12Sona chicho nkubomba nkwiza pakwendelela pakuchibomba, umwakuti intakabape ulusako abatumiwa abanji bala ulwakwituvikizya nukuti bakubomba vivyo aswe tukubomba. 13Pakuti abantu banaba batumiwa abamyasi, abambombo abazimbuli, babo bakwifwanikizya bene ngati po batumiwa ba Kilisitu. 14Sona chite chakuswighisya nkani, awe, pakuti nu Satana bulo akwifwanikizya mwene ngati po wantumi uwa lukozyo. 15Po chite chiyeni nanti ababombi bache bope bakwifwanikizya bene ngati po bambombo ba bugholosu. Ubumalilo bwabo bukwiza pakuyana bulo ni mbombo zyabo.
U Pabuli akwituvya nizya butumiwa bwache
16Nkwandizya pakunena nkuti: Nayumo umuntu atakampimaye pakuba ne mupunganu. Loli nanti amwe mukumpima ngati po ne mupunganu, mumpokelaye pakuba ne mupunganu, umwakuti ningituvya panandi bulo. 17Zizyo nkunena losi ulu intakunena nu bulaghili ubwa Mwene, awe, loli nkwituvya bulo ngati po ne mupunganu. 18Loli pakuti balipo abinji nkani babo bakwituvya ni vintu ivya muchisu ichapasi, po nane nkwiza pakwituvya. 19Amwe mukuti mwe bantu abamahala nkani, loli mukubennya bulo abapunganu bakubomba zizyo bakulonda. 20Pakuti mukwennya bulo nanti umuntu akubapima ngati po mwe bazya, pamo pakubafyula ivintu vyinyu, pamo pakubachevya, pamo pakubayivya, pamo pakubakoma kumaso. 21Indi ni soni ukwitika ukuti aswe tutakaba bajivu nkani ukuti tungabomba zinizi.
Loli nanti umuntu wesi akujimba nkani ukwituvya ni chintu chimo—ane nkunena ngati po ne mupunganu—nane bulo ne mujivu ukwituvya ni chintu chilachila. 22Nkimba abene Bahebeli? Po nane ne mu Hebeli. Nkimba abene ba Izilayeli? Po nane ne mu Izilayeli. Nkimba abene baluko ulwa Abulahamu? Po nane ne waluko ulwa Abulahamu. 23#Imbo. 16.23Nkimba abene babombi aba Kilisitu? Nkunena ngati po ne chipena, ane ne mutumiwa ukubachila abene. Nabomba nkani imbombo ukubachila abene, sona akabalilo akinji nighaliliwa mujele. Nkasyempiwa ni nkomwa izyakusita kubelengiwa, sona nukukomana nintamyo izya bufwe kabilikabili. 24#Ukk. 25.3Nkafundiwa naba Yuda ka fayivi pakusyempiwa ni nkomwa 39. 25#Imbo. 16.22, 14.19Nkafundiwa naba Loma katatu pakukomiwa ni ndisa, sona koka nkasumbiwa na mabwe. Ubwato bwitu ubukulu nkani bukapangunkana mumizi katatu, pamusanya na pabusiku nkambama pakasi panyanja. 26#Imbo. 9.23, 14.15Mu mabulendo ghane aminji nakomana nintamyo izya ukwizula ukwa soko, na mavyondongo. Nkakomana nintamyo pachifukwa icha abantu abaluko ulwane nu lwane, sona pachifukwa icha abantu babo bate ba Yuda. Nakomana nintamyo mutwaya na munkolongo, sona nakomana nintamyo panyanja. Nkakomana nintamyo izya bamanyani abamyasi. 27Nakomana nintamyo izyakulekanalekana. Kabilikabili nkabomba nukwiyula nkani, sona nkachelezya ubusiku bosi. Nkaba nizala ni nyota, sona akabalilo akinji nkikalagha ukusita ichakulya. Impepo yankatazizye, sona nkaba nkule. 28Ukonjelezyapo pavintu vyosi vinivi, isiku ni siku nkutamiwa ni mbombo iyakusungilila ivipanga vyosi. 29Nanti umuntu yumo mudedebazu, nkimba nane bulo intakuba mudedebazu? Nanti umuntu yumo akupeliwa pakunanga, nkimba nane bulo chitakumbaba mumoyo?
30Nanti imbaghiye pakwituvya, nkwiza pakwituvya ni vintu vivyo vikulanjizya ubudedebazu bwane. 31U Chala, sona Uwise uwa Mwene witu u Yesu, yuyo abaghiye pakuchindikiwa bwila na bwila, azimenye ukuti ane intakutamanta. 32#Imbo. 9.23-25Bo indi mu Damasika, umwimilili uwa chigaba chila, yuyo akaba pasi pabulaghili ubwa Mwene u Aleta akabika abalindilili pamilyango iya kaya akakulu nkani ukuti bandeme. 33Loli bakanyisizya muchidudunga ukwendela pibwindo lilyo likaba palubumba ulwa lupaso nukufyuntumuka munyobe zyache.
လက္ရွိေရြးခ်ယ္ထားမွု
2 Aba Kolinti 11: LMB2024
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Lambya Bible © Bible Society of Malawi, 2024.