मरकुस 1
1
युहन्ना बपतीस्मा आपणे वाळान परचार
(मत्ती 3:1-12; लुका 3:1-18; युहन्ना 1:19-28)
1भगवानेन पुर्यु ईसु मसीन खुस-खबरेन बारामां असी सुरुवात हय। 2जसु मालीक भगवानेन अघली वात बताड़ने वाळु यसायाह नावेन माणसेन किताप मां लिखलो हतलो:
“चां कह्लु की, मे मारी वात बताड़ने वाळाक मे तुंद्रे अगळ मकलीस,
ने चु तुंद्रे वाटे वाट सुदारसे।
3उजाड़्या बयड़ा मां एक आयड़ने वाळान वात सामळाय रय,
की मालीक भगवानेन वाट तीयार करु,
ने तेरे वाटे सयड़क सुदी करु।”
4तेरेमां बपतीस्मा आपणे वाळु युहन्नु आयु, ने उजाड़्या बयड़ा मां रहणे वाळा माणसेक परचार कर्यु की, “बपतीस्मा लेवु।” ने तीनुक कह्यु की, पाप करनु छुड़ देवु, “तत्यार तुंद्रा पाप काजे भगवान माफ करसे।” 5ने यहुदीया ईलाका मायन ने यरुसलेम सहर मायन बेसका माणसे नीकळीन तेरे धड़े गुया; ने आपणा-आपणा पाप काजे मानीन यरदन नदी मां युहन्ना सी बपतीस्मा लेदा।
6युहन्नु उटड़ान कान्यान पुथल्या पेहरी रवलु, ने कमर मां चामड़ान पट्टु बांदी रवलु, ने चु टिड्डा ने अळी बयड़ा मां मुहाळेन मखड़ा खाया करतेलु। 7ने युहन्ना ज परचार करतेलु की मारे पछळ आवणे वाळु छे, चु मारे सी ताकतवाळु छे, “मे तेरे लायक बी नी हय की ढंगु अळीन खासड़ान बंद खुली सको। 8मे ते तुहुंं काजे पाणी सी बपतीस्मा देदु, बाकुन चु तुहुंं काजे चुखली-आत्मा सी बपतीस्मा देसे।”
ईसुन बपतीस्मा ने पारख
(मत्ती 3:13—4:11; लुका 3:21,22; 4:1-13)
9तीनु दाहड़ा मां ईसु गलील जीलान नासरत सहर सी आवीन युहन्ना सी यरदन नदी मां बपतीस्मा लेदु। 10जसुत ईसु पाणी मां सी डुबीन बाहर नीकळयु, चां तत्यारुत च सरग खुल ज्य, ने चुखली-आत्मा पेरवान तसों भगवानेन आत्मा काजे उतरतेलु देख्यु। 11ने सरग मां सी असो सामळायो की, जु मारु लाटेक्लु पुर्यु छे, “ने मे हेरे सी बेसका खुस छे।”
12तत्यारुत भगवानेन आत्मा ईसु काजे उजाड़्या बयड़ा भीणी ली गुयु, 13बयड़ा मां ईसु चाळीस दाहड़ा लग भुतड़ु पाप कराड़्ने पारखतेलु, ने ईसु जंगली जनवार्यान ईचमां रयु, ने सरग वाळा काहवाळ्या चां आवीन तेरी सेवा चाकरी करतेला।
ईसु चार माछा धरन्याक बुलायु
(मत्ती 4:12-17; लुका 4:14-15)
14युहन्नु जेल मां धराय गुयु, ने पछेन ईसु गलील जीला मां आवीन भगवानेन खुस-खबरेन बारामां परचार कर्यु। 15ने कह्यु “की टेम पुरो हय गुयो,” ने भगवानेन राज तुंद्रे धड़े आय लागलो छे, “ने तुहुंं पाप सी पछा मन फेरवीन भगवान भीणी आवु ने खुस-खबर पर भुरसु करु!”
16ने ईसु गलील दरीया धड़े-धड़े जातलु चां माछा धरन्याक दुय भाय काजे देख्यु, सीमोन ने अन्दीरीयास काजे पाणी मां जाळ नाखतेला देख्यु काहाकी चे काहर्या हतला। 17ईसु तीनुक कह्यु “मारे पछळ आवु; ती मे तुहुंंक माछा धरनेन जागा पर माणसे काजे भगवानेन राज मां लावणे वाळा बणावीस।” 18चे तत्यारुत जाळ काजे छुड़ीन ईसु पुठ्ये चाल पड़्या।
19ईसु अघु जाय्न जब्दीन पुर्या याकुब ने तेरु भाय युहन्ना काजे ढंड्या मां जाळ सुदारतेला देख्यु। 20ने ईसु तीनु काजे तेरा चेला बणावणे करीन तत्यारुत बुलायु ने चे आपसान बास जब्दी काजे दाहड़क्या पुठ्ये ढंड्या मां छुड़दीन ईसु पछळ चाल पड़्या।
ईसु भुतड़ा काजे एक माणसेम सी नीकाळ्यु
(लुका 4:31-37)
21तत्यार चु कफरनहुम मां आयु ने चु तत्यारुत यहुदीन आरामेन दाहड़े ईसु तींद्रा भक्तीन घर मां गुयु ने सीकाड़ने बाजी गुयु। 22ने माणसे ईसुन खबर सामळीन देखतात रय गुया, काहाकी हयु तीनुक नीयमेन मास्तर्यान तसु नी सीकाड़तेलु, बाकुन एक मटला हकवाळान तसु तीनुक सीकाड़्यु।
23तीनीत टेमे तींद्रा यहुदीन भक्तीन घर मां एक माणुस आयु, तेरे भुतड़ु लागी रवलु। 24चु भुतड़ु आयड़ीन कह्यु की “ए ईसु नासरी, हामुक तार सी काय काम? काय तु हामुक नास करने आयु? मे तुसेक जाणो, की तु कुण छे? तु चुखला भगवानेन वात बताड़न्यु छे!”
25ईसु तीना काजे लड़ीन कह्यु, “हुगु रव; ने कह्यु हेरेम सी नीकळी जां।”
26तत्यार भुतड़ु तीना माणुस मां सी जुर सी आयड़ीन नीकळी गुयु। 27ने आखा माणसे ज देखीन देखतात रय गुया ने आंबा-सांबा वीच्यार करने बाजी गुया की, जी काय वात छे, ज ते पेहली कावा देख्या ने नवली वात छे? ईसु पुरा हक सी भुतड़ा काजे कहें, ने चे हेरी कह्ली वात काजे माने।
28ने ईसुन नाव तत्यारुत गलीलेन आखा ईलाका मां फेल गुयो।
ईसु बेसका माणसेक वारु करे
(मत्ती 8:14-17; लुका 4:38-41)
29ईसु तत्यारुत यहुदीन भक्तीन घर मां सी नीकळीन याकुब ने युहन्ना काजे एखला छुड़ीन ने चे सीमोन ने अन्दीरीयासेन घर मां आया। 30सीमोनेन सासुस मांदवाड़ेन वजे सी खाट्ला मां सुय रवली, तेरेमां हेरी सासुसेन बारामां बताड़्यु। 31तत्यार ईसु धड़े जाय्न तेरु हात धरीन बठी कर्यु; ने तेरो सेरी उतरी गुयो, ने ची तेरी सेवा चाकरी करने बाजी गुय।
32सांती वेळाय दाहड़ु डुब्यु तत्यार आखा मांदला माणसे ने भुतड़ा लागला माणसे ईसु धड़े लाया। 33ने आखा गांवेन माणसे तीना घरेन अगळ भेळा हय गुया। 34बेसका माणसे चां भाती-भातीन मांदवाड़ सी मांदला हतला, तीनु काजे ईसु वारु कर्यु, ने तींद्रे मां सी बेसका भुतड़ा बी नीकाळ्यु काहाकी भुतड़ा ईसु काजे उळखतेला असु करीन ईसु तीनु काजे बुलने बी नी देदु।
ईसु उजाड़्या जागा मां दुवा कर्यु
(लुका 4:42-44)
35वीजाळो हवणे सी पेहेल ईसु उठ्यु ने घरेक छुड़ीन दुवा करने वाटे उजाड़्या जागा मां जाती र्यु। 36तत्यार सीमोन ने तेरा दुस्तीदार ईसु काजे हेरने लाग्या। 37जत्यार ईसु तीनु काजे जड़ी गुयु; ती चे तीनाक असा कह्या, की “आखा माणसे तुसेक हेरने बाजी रया।”
38ईसु तीनुक कह्यु, “चालु आपणु आड़े-धड़ेन गांव मां जाता ने चां बी आपणुक खुस-खबरेन परचार करनु छे, काहाकी मे जत काम करने वाटे दुनीया मां आयु छे।”
39तेरेमां ईसु गलीलेन आखा जीला मां तींद्रा यहुदीन भक्तीन घर-घर मां जाय जाय्न परचार करतु रयु, ने भुतड़ा काजे नीकाळतु रयु।
ईसु माणसेक वारु करे
(मत्ती 8:1-4; लुका 5:12-16)
40एक कुड़ायलु माणुस ईसु धड़े आयु, “ने तेरे अगळ मांडा टेकीन लीलघाय्न कह्यु, कदी तु चाहे ती मेसेक वारु कर दे।”
41ईसु काजे तेरे पर बेसकी तरस आय, की चु तीना काजे छीमीन कह्यु, “मे चाहो की तु चुखु हय जां।” 42ने तत्यारुत तेरु कुड़ वारु हय गुयु ने चु चुखु हय गुयु। 43तत्यार चु तीनाक तत्यारुत चेतायु ने जां करीन कह्यु, 44ने तीनाक कह्यु, “सामळ जी वात कुय काजे घुण कहें, बाकुन जाय्न आपसा काजे पुजाराक देखाड़ ने आपसा चुखु हवणेन बारामां ज काय मुसु ठहरावलु छे तीनाक बादा चड़ाव की तींद्रा गवा बण जाय।”
45बाकुन हयु जाय्न आखा काजे परचार करने लाग्यु, ने अतरे दुर लग की फेल गुयो, ईसु पछेन खुल्लाम-खुल्ला फीरी नी सक्यु, बाकुन बाहर जाय्न बयड़ा मां रयु, ने चारे मेरेन माणसे तेरे धड़े आवणे लाग्या।
လက္ရွိေရြးခ်ယ္ထားမွု
मरकुस 1: BSP25
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The Bhilali Bible ©The Word for the World International and Bhilali Bhasha Samiti, Warvani, (M.P.) 2025.