Tujila 8
8
1 Siqifanyi alasande Saolo tunyi giewo.
Saolo Jiohuini Heizho
Ene uduse Yelusalenni jiohuii hende heizho. Shitulase chugo psedu tujila sandazhi Yudaya, Samaliyani go oronde echiwo. 2Niezhan xienliantu kunla Siqifanyi buladene hhende oluzhi fugiede wilazho. 3Saolo jiohuini heizhi jien kunlai giede orodene ere kun, biereilai bafanzide lai echi khawo.
Feili Samaliyade Chonjizho
4Hhe sandasan kunla gochude echizhi Hudai kielienyi chonjizho. 5Feili Samaliyai chenshide echizhi kunlade Mexihai chonjizho. 6Olon kunla Feili kieliesan kielienyi chenliezhi giesan ghudureqii uzhedene man hhei kielienyi goude chenliezho. 7Olon kunlai jierese zannan ruhherla fugiede nie onghonodene likai giewo. Pse olon tanhon giesan, dogholonlai goudaghawo. 8Ingiese hhe chenshii kunla hende bayasuzho.
9Hhe chenshide nie kunyi nierei Ximun giene. Eqighanse baxi shuaizhi bi hen wo giezho. Samaliyai bexinlai ghaniraghazho. 10Bugon fugiei ganii man hhei daghazhi ene kunshi fugie nenlitu giezhi urusan Hudai nenli wo giezho. 11Hhela hhei chenliekushi hhe oloncha baxi shuaizhi hhelai ghaniraghazho. 12Ingiekude Feili hhelade Hudai gojiai gouxioxi, Ersa Mexihai nierei chonjise hhela xianxin giezhi ere kun, biereila xili jienliewo. 13Lien Ximunye xianxin giedene xili jienliewo. Hhe Feilighala chan hhantulazhi Feili giesan ghudureqi, fugie nenlitu shiqinlai uzhedene ghanirazho.
14Shitula Yelusalende bikude chenliese Samaliya kunla Hudai kielienyi jienliewo giese Beduru Yaheiyaghalai hhelai hhende echighawo. 15Hheghala boudene hhelade Shenlinyi jienlieghane giezhi onxian giezho. 16Shenlin kiemai jiere ese bouzhezho. Hhela zinie Ezhan Ersai niereghala xili jienliezho. 17Beduru Yaheiyaghala hhelai jiere khane teise hhela Shenlinyi jienliewo.
18Shitula khane teise Shenlin bouzhesei Ximun chanladene baerne hhelade ogizhi 19kieliewo, "Ene nenlii madeye ogi. Bi kienyi jiere khane teizhi onxian giese kienye Shenlinyi jienliene."
20Ingiese Beduru kieliewo, "Chi baerghalane hhantu fugule echi. Chi sumulase Huda ogiku nenjienni baerghala aginu? 21Ene wiliede chade guzi uwo. Hudai melie chii zhughe donzhen uwo. 22Chi ene doghunnii geizhi Ezhanni xiahua gie. Kenen chi zhughedene sumulasei mienliene. 23Bi uzhese chii zhughede dubilieku olon wo, gou wini chii banlazho."
24Ingiese Ximun kieliewo, "Ta made oluzhi Ezhanni xiahua gie. Ingiese ta kieliesanla mii jiere nieda ulie irene."
25 Beduru Yaheiyaghala Ezhanyi kielienni kieliezhi ganzhen beidene Yelusalende khareiwo. Idou mo jiere Samaliyani go aghinlade gouxioxii chonjizho.
Feili Taijienghala
26Ingiekude Ezhanni qienxien Feilide kieliewo, "Chi bosidene nanbangiede yo. Yelusalense Jiasade bouku mo jiere echi." Hhe mo hontande wo. 27Feili bosizhedene echise mo jiere nie Aisaiebiya kunyi chanlawo. Ene kunshi Aisaiebiya bierei honshan Gandajini kha douradu taijien wo. Hheshi bierei honshanni baerlai man gonjisan fugie noyen wo. Yelusalende libai giezhi irezho. 28Khareiku mo jiere mache souzhi xienzhi Isaiyai shuni onshizho. 29Shenlin Feilide kieliewo, "Chi gierudene chezii shigha."
30 Feili holuzhi echise xienzhi Isaiyai shuni onshisei sonosuwo. Ingie hhende asawo, "Chi onshisanne dunjirenu?"
31Hhe kieliewo, "Mii kiema ese uduruzho, bi matugie dunjirene?" Ingie Feilii chezi jierene uru khirei hhantu souwo.
32Hhe onshisan jinwun jiere kieliezho,
"Hhei ghoni zharuchen kun shida echiku ghoni mutun lai echiwo.
Usun ghighachen kunni kha douradu qioqioji
ghoni mutun hhe amanne ese angheiwo.
33Kunla hhei uru giezho, gundande ese panjiwo.
Hhei aminni duyase agi echiwo.
Kunlade kielieku houdeiye uwo."
34Taijien Feilide kieliewo, "Bi nie asaye, xienzhi kieliesan ene kielienshi kienyi kieliezho? Goyane kieliezhou? Pse nie kunyi kieliezho?" 35Feili ene jinwunse kaishi giezhi hhende Ersai gouxioxii jianji qiiwo.
36Hhela mo jiere yokude usu winetu oronde kuruwo. Taijien kieliewo, "Uzhe, enende usu wine. Bi enende xili jienliese ulie olunu?" 38Ingie fenfulazhi chezii beighadene Feili taijienghala usude bouzhi Feili hhende xili gieghawo. 39Ususe khizhese Ezhanyi Shenlin Feilii uduru yolawo. Taijien hhei chanla dawo. Ingiedene bayasuzhi mone yowo. 40Ingie Feilii Yasodude chanlawo. Hhe yozhi go chenshilade gouxioxii chonjizhi izhi Kaisaliyade kuruwo.
လက္ရွိေရြးခ်ယ္ထားမွု
Tujila 8: sce
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2020-2024 River Street Publishing.