Tujila 7
7
Siqifan Jianjisan
1Zui fugie buwa Siqifande asawo, "Intu shiqin winu?"
2 Siqifan kieliewo, "Oqio kun, gaijiula, ta chenliendu. Matai xienren Iburaheimu Halande soutula Meisobudamiyade bikude famatu Huda hhende xienjighadene kieliewo, 3'Chi goya oron, jiawusene likai giezhi bi chade uzheghaku oronde echi.'"
4"Ingie hhe Jialeji kunlai oronse likai giedene Halande souwo. Hhei adani fugudene Huda hhei banjighazhi ta ede sousan ene oronde ireghawo. 5Ene oronde Huda hhende yama jiachan, lien beiku oronye uye ogiwoma, Huda kielien yenjizhi ene oronyi hhende, hhei houdeide ogizhi caichan gie giewo. Hhe shihoude hhende kewosi uwo. 6Ingiese Huda kieliewo, 'Houdeichii kunlai oronde souzhi hoji danlazhi 400 nien zayalane.' 7Pse kieliewo, 'Hhelai hoji danlaghasan gojiani bi panjine. Khuinashi hhela khizhedene ene oronde mii shunjine.' 8Ingiedene Huda Iburaheimude hetoune giekughala kielien yenjiwo. Iburaheimude Isagheini oluzhi neimudude hetoune giewo. Isagheide Yagebuni oluwo, Yagebude mai 12 gie famatu xienrenlai oluwo."
9"Ene famatu xienrenla Yusufu jiuni dubiliedene Aijide huiwo. Ingieliuzhe Huda hheghala hhantushi 10hhei yan kunnanseliuzhe khizheghawo. Huda hhende nenjien, agheli ogise Aijini Falao honshan hhei uzhedan gou wo. Falao hhei Aijide zui fugie noyen danlaghazhi giene man gonjighawo."
11"Ingiedene Aiji, Jianande honnien kuzhezhi zeinan irewo. Mai xienrenlade taran sirawo. 12Yagebu sonosuse Aijide taran wine. Ingie mai xienrenlani peizhi tou 1 hui hhende echighawo. 132 huide echise Yusufu gaijiuladene tanighawo. Ingiese Falao hhei gieni qinkonyi mejiewo. 14Yusufu kun peizhi adane nie gie kunyi jienlieghale echiwo. Man 75 gie kun wo. 15Ingie Yagebu Aijide bouzhewo. Khuinashi Yagebu, mai xienrenla man hhende duya ijiewo. 16Hhelai laizhi Shijiende echi Iburaheimu Hamoni houdeilase miengughala agisan mezade bulawo."
17"Huda Iburaheimude yenjisan kielien kuzhekude Aijide Isilie kunla hende olodowo. 18Khuinashi Yusufui tani dachen nie shini honshan khizhezhi Aijini gonjizho. 19Hhe mai kunlai heizhi xienrenlai mai zayalazho. Hhelai biizhi yeliwalai bendaghazhi aminne ese olughazho."
20"Hhe shihoude Musani oluwo. Hudai melie hhe uzhezhi seighan wo. Hhei adaini giede ghuran sara qiezhedene 21bendase Falaoi oqin kewonni giedene qiezhe fugiedaghawo. 22Musa Aiji kunlai unhuani man suruwo. Kielien kielie, shiqin giese nenli wine."
23"Musa 40 olukude goya Isilie kunlane uzhele echine giezhi jiejin giewo. 24Niefade hhe echikude nie Aiji kun nie Isilie kunyi qifulasanyi chanlasenu hhe Aiji kunyi alazhi hhe kunde bouchou giewo. 25Hhe sumulase Huda hhei tungo giezhi goya kunlai jiuikui mejiemu giezhoma, hhela mejie dazho. 26Khuichudu Musa chanlase Isilie kunla eghinduzho. Hhelai sidaghazhi kieliewo, 'Gujiu, tashi gaijiula wo, yale nieniene qifulane?'"
27"Giebeine qifulasan kun Musai tungu daogha kieliewo, 'Kien chii bijiende lindao, panjichen kun danlaghawo? 28Chi uchughudu hhe Aiji kunyi alaku mutun mii alanu?' 29Musa ene kielienyi chenliedene Aijise ghula holu Mijiende toreisan mutun souwo. Hhe oronde hhende ghua kewon oluwo."
30"40 nien daose Xinaishan hontande nie qienxien siderasan eghesun dunda Musade chanlaghawo. 31Musa zhoujin mutunyi chanladene ghanirazhi melie daozhi uzhene giekude Ezhanyi shenqii sonosuwo, 32'Bishi chii xienrenlai Huda wo. Iburaheimu, Isaghei, Yagebuni Huda wo.' Musa chenliesenu pugharadene ayizhi uzhe dazho. 33Ezhan hhende kieliewo, 'Chi kon jieredu maheine tei. Chi beisan oronshi zhiguitu oron wo. 34Mii bexinlai Aijide zayalasanyi bi qinchude chanlawo. Hhela shonholosan shenqiiye sonosuwo. Bi hhelai jiuile bouzhewo. Ede ire, bi chii peizhi Aijide echighane.'"
35"Eneshi bexinla kien chii bijiende lindao, panjichen kun danlaghawo giezhi fandui giesan Musa wo. Ingieliuzhe Huda siderasan eghesun dunda qienxienyi tungo giezhi hhei peidene bexinlade noyen, jiuichen danlaghawo. 36Musa Aiji, Hunhai, hontande 40 nien olon fugie shiqin, ghudureqi giezhi bexinlai Aijise uduru khizhewo."
37"Eneshijiu Isilie kunlade 'Huda tai dundase bi mutun nie xienzhi khizheghane.' giezhi kieliesan hhe Musa wo. 38Ene Musa hontandedu Isilie kunlare hhantu wo. Mai xienrenghala hhantu Xinaishan jiere hhende kielien kieliesan qienxienyi tungo giezhi amin ogiku kielienyi jienliedene matande chonjizhi ogiwo."
39"Mai xienrenla hhei kielienyi ese chenliedene hhei tungu daoghazhi Aijide khareiku duralazho. 40Hhela Hharunede kieliewo, 'Bijiende mo uduruku nigiedalani gie. Bijienyi Aijise uduru khizhesan Musa yan shiqin penji woshi bijien ulie mejiene.' 41Ingie hhe shihoude hhela nie fughe giedene hhe nigiedade mure khughozhi goya khaghalane giesanlade beiizhi bayasunduzho. 42Ingiese Huda hhelase likai giedene hhela asiman jieredu naran, sara, hodunlai beiise uye gonjizho. Zhen xienzhii shu jiere huaisan mutun,
'Isilie kunla,
ta hontande 40 nien dunda
zharusan ghoni fugheji pse ogisan mureshi made giesan pusho.
43Ta qienliesanshi Molo nigiedani zhanfan wo,
Lifan nigiedani hodun wo.
Enelashi ta goyala beiine giezhi giesan nigiedala wo.
Ingiese bi tai touzhi Babilun ghadane khighane.'"
44"Mai xienrenla hontande bikude ganzhen beiku zhanfan wine. Hheshi Huda Musade fenfuladene uzheghasan yanzi mutun gieghasan wo. 45Mai xienrenla ene zhanfanyi jienliewo. Huda hhelai melie niman kunlai tou khighasan oronde hhela Yeshuyare hhantu zhanfanyi agi echizhi Dawude honshanni shihou kuruwo. 46Huda Dawudede orezho. Ingiese hhe Hudai xiahua giezhi Yagebui houdeilade Huda souku oron zhunbei giene giezhoma, 47Hudade giei beighasanshi Sulumane wo."
48"Ingiezhoma, Zui Unduni Huda kun khaghalane giesan giede ulie soune. Xienzhi kieliesan kielien mutun wo,
49Ezhan kieliewo,
'Asimanshi mii zowi wo.
Zeminshi mii bandou wo.
Ta made matui gie giene?
Khalashi bi hhamuraku oron wo?
50Enelashi man bi khaghalane giesan pushonu?'"
51"Ta ene jianbanjin kunla, zhughe, chighindene hetoune ese giesan kunla. Ta xienrenlane mutun ibeizi Shenlinni fandui giezho. 52Alinie xienzhilai tai xienrenla ese heiwo? Hhela nie gou kun irene giezhi melie kieliesan xienzhilai alawo. Ede ta hhe gou kunni ghudanduzhi alawo. 53Ta qienxienla chonjizhi ogisan guijinni jienliedene ese zunjiwo."
Siqifanni Alazho
54Hhela ene kielienyi chenliedene Siqifande hende hokuzhi shidunne zhouzho. 55Siqifande Shenlin duruzhi asimanyi xianxide uzhezhi Hudai fama, pse Ersa Hudai borun miende beisei chanladene kieliewo, 56"Asiman keizhi Kunnikewon Hudai borun miende beisei bi chanlawo."
57Ingiese kunla chighinne duigha fugiede onghonozhi hhei melie chunji echidene 58hhei chenshi ghadane tungu khigha tashighala eghi qiiwo. Ganzhen beisan kunla jienne teidene nie Saolo giezhi urusan nasuchighan kunyi kon konde jiewo. 59Hhela tashighala eghikude Siqifan onxian giezhi kieliewo, "Ezhan Ersa, mii ruhherni jienlie!" 60Pse xiutuliezhi fugiede kieliewo, "Ezhan, ene zuini hhelade bu sougha!" Ene kielienyi kieliedene fuguwo.
လက္ရွိေရြးခ်ယ္ထားမွု
Tujila 7: sce
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2020-2024 River Street Publishing.