Romo 8
8
Godena Epe Yaakopi Sipiridimi da rupa ao-paliape rupa
1Yesu Keriso rapu runaema wenaali parare mendame koae yangi menda na-adea. 2Koae eina aumiri naa komala ei ma-andaya. Go peapare Epe Yaakopi Sipiridina aunumiri naa endoaya ei Keriso rupara gea. Gupumare naa koae eimi naa ma-komapanaya naa kepe rapaya. 3Su wenaali naare puri na-palema eimiyalore ande Rudule Angeleme pape-na-ya auri Gode nipumi naana do rupara pia koae einu lu rambuaisaya. Nipumi go au puluamere nipuna Naki rapaisaya. Yesuri naana dome ande do aisayapare naana dore koae einu rumbilia. Nipuri go koae einu lu rambualuame epa komisaya. 4Godeme go au pi eiri ande Rudule Angeleme lea rupa rendepona aunu pumunuya pea. Go au pi auri ande naana dome raname komala au na-pi ande Epe Yaakopi Sipiridimi da rupa ae wenaali amonoya lea. 5Ande nimuna dome da rupa ao-paluae wenaali nimuna konenuri nimuna dome rana kome eimi andere pimi. Go peapare ande Epe Yaakopi Sipiridimi da rupa ao-paluae repaa nimuna konenuri go Epe Yaakopi Sipiridimi andere pirina leme. 6Niminda nimina do riame andere-ainya demendare nimi komala ei andeleme. Go peapare niminda ande Epe Yaakopi Sipiridimi andere-ainya demendare gore nimimi kuma pi ei pange endoaya ei milimi. 7Go einare ali menda nipuna dona rana pea eimi nipu andere-aliandare nipuri Godena yanda runguli ali aya. Akepeare nipumi Godena Rudule Angele na-pangea. Nipumi go angele pangalore ana na-pea. 8Wenaali menda apimi nipuna dona rana pi ei rali eiri pelemendare nimumi Gode rana na-ma-palimi.
9Godena Sipiridinda nee repara pidiandare gore go Godena Sipiridimi da rupa ao-padi. Nena dona rana pia rupa na-ao-padi. Ande Kerisona Sipiridi nipuna rupara na-pidia ali nipuri Kerisona ei dia. 10Go peapare Keriso nimina ruparanda pidiandare gore Godena Sipiridimi nimi pa ari pualiminya dea. Nimina dore koae eina yangina komola peapare nimimi go au pilimi. Nimiri Gode rapuri rendepona aemendare Kerisome go au pilia. 11Ande Yesu ma-rekaisaya Godena Epe Yaakopi Sipiridi nimi ruparanda pidiandare gore go Yesu Keriso ma-rekaya Godeme nimi pange nimina ramula pea do para werepe endoaya ei gilia. Nipuna Epe Yaakopi Sipiridi nimi rupara pia eimiri go au pilia.
12Go einare nina amenuo, ande Godena Epe Yaakopi Sipiridimi da rupa ao-paliaminya. Naana dome raname komala rupa na-ao-paliaminya. 13Akepeare nena dome raname komea rupa ao-padindare nee ora komele. Go peapare ande Epe Yaakopi Sipiridimi nena koae aunu pele ei lu rambualiandare gore nee pa endoma ali. 14Ande Epe Yaakopi Sipiridimi karu pula repaare Godena nakinu. 15Akepeare ande Godeme gida Yaakopi Sipiridimiri nee dipula muma nee paalame na-ma-komada. Go au na-piri ande Godena Yaakopi Sipiridimiri Godena nakinu ma-aulamare go Sipiridina purimiri naame Gode repara ee lalo arare gupi loaema. Gode Apa neere naana Apa loaema. 16Godena Sipiridimi naana remo lapo epa runaomare nipu raidipuname lalore Naare Godena nongo nakinu lo aepe. 17Naare nipuna nongo nakinuyandare Gode nipumi nipuna repaana siaya alenu milima. Gupuma Keriso rapu Godeme Yesuna siaya alenu pange rali pilima. Gupuma ambia nipumi misaya rendaa ambia pange naame nelemandare gore nipuna epepe alenu Epeni nane werepe andelema.
Werepe epe aunu ando epe rupa Epeni nane alima
18Ambia naame go nalama rendaare pa ongeisi. Go peapare werepe penameyala epelea epe paa pi eiri naa repara wadeanda ao-paidapema eiri ora andaai.
19Godeme wapuma winya lea alenu raayome Godeme nipuna nakinu aeme ei penameyao walenaya raname komalo ara leewina pimi. 20Akepeare Godeme wapea olemole raayo koyoma ale menda pape-na-ya. Go alenu raayo nimuna ranana go au na-peapare Gode nipuna ranana go au peme. Go peapare Godeme werepenu go au ora pinya kone siaya. 21Go pinya kone wisaya alere ande nipuna wapuma wia alenu raayo ande dipula piruma komoma ramula pame ei kepe rapainya kone wisaya. Gupuma olemole raayosi kepe rapaoma epe paa pi eina Godena nongo nakinu rapu aoma peleme.
22Go einare naame kone wima. Godeme wapea olemole raayosimi naki kou nalanda ee dame rupa mandana ee lari ipula aeme. 23Go rupa ee loaeme alenuri Godeme wape alenu komea dia. Naa Godeme ririna pakama geale nipuna Epe Yaakopi Sipiridi ambala mema. Go nakinu naana do ria kepe rapaoma nipuna nakinu ma-aulainyaya maisamba ara ee loaema. 24Naare naame kone rulaema eimi rambamea. Go peapare naame ale menda ambala siamba arare naame go ale ora milima loma kone rulaoma na-maisambao-alima. 25Go peapare ale menda na-siamba ara werepe ora andelema kone wili mandaare gore naame pawa pu sianyaoma maisamba-alima.
26Naare puri na-palemandare mendaa rupa ande Godena Yaakopi Sipiridimi naa rambamula epea. Naame mo yainya pape alenuri yainya pape rupa kone na-wima. Ande Epe Yaakopi Sipiridimiri Gode repara naana angele lado arare su wenaali naame pangape nono na-pi angeleme lao-aya. 27Go einare Gode ande wenaalina pu runane ando-aya alimiri ande Epe Yaakopi Sipiridina konenu pange kone wia. Gode nipuna rana pea rupa nipuna wenaalina angele ande Epe Yaakopi Sipiridimi nipu repara la aloaya.
28Naamere gupi laminya. Naame Gode repara pu ademandare gore naa repara pilia aunu raayo naa ma-epeape eina pia laminya. Go au pi auri nipuna go au pinya, go au pinya, loma wi lamea wenaali repara komea go au pilia. 29Gupuma mo Godeme ambala pane mupaya wenaali nimu pange ambala nipuna Naki Yesu Keriso manda ma-aulalia. Gupuma nakinu waru andapu alimi. Yesu Keriso nipuri ambala ririna Naki alia. 30Go pea einare Godeme ambalande ma-rando-ainya lea wenaalinuri nipumi wi lea wenaaliae. Gupuma nipumiri ambala wi lea wenaaliri nipu rapu rendepona ma-ainya lea. Gupuma nipumiri nipu rapu rendepona ma-aya wenaaliri go wenaali rapu nipuna paa pi puri rali pea.
Yesu Keriso ruparare Godeme naa repara pu gea ei walea
31Go einu kone siamba arare ake laminyapae. Godenda naa rapunda radeandare gore naa yanda lii auri apimi piliayapae. 32Godemere nipuna Nakiri pa na-karu pirisaya. Go au na-piri naa rondona Yesu liinya pu lisaya. Go einare olemole raayo naa repara sese na-pi ora gilia. 33Godeme yarepe mea wenaali repara pakama ma-riada ara lalo Neeme go pa eina pi na-deme. Akepeare Gode nipuna gole lalo ara lalore Go nipuna wenaaliri ale menda na-peme lea. 34Nimu koae yangi milimi piri apimi de aeyapae. Yesu Kerisore ande komisande alimi go au na-pilia. Gupumare Godeme nipu ma-rekaisaya eimi ambiare Godena popeki ki nane aya. Gupuma Yesu nipumi naa rondona Gode repara angele lao-aya. 35Go einare Kerisome naa repara pu gea eiri apimi sese piliayapae. Naa repara kenda epelea eimi o naa kenda milima eimi o wenaalimi naa rendaa gilimi eimi o naa reame komelema eimi o yamape aka menda diade eimi o ale mendame naa ma-koyaluame pilia eimi o naa diiminda pangere Godena pu gea ei na-sese pilimi.
36Dia. Akepeare ande Godena angele wia bukamere gupi lea.
Nee rondonare yapiyalosi naa komape ei
repara aema.
Naare liiape sipisipi mena leale aema.
37Diama. Yesu Keriso naa pu gea ali rapu arare go alenu raayosi naame lu angulaema. 38Neme kone sialopare Godeme naa repara pu gea ei mendame sese na-pilia. Eindiolo alinumi pange yaa nane andere pimi repaame pange komelema o pa alima pange ambia pia aunumi pange werepe pula pea aunumi pange Godeme naa repara pu gea ei mendame sese na-pilia. 39Su nane pia alenu o yaa nane aeme alenumi pange Godeme naa repara pu gea ei mendame sese na-pilia. Godeme wapea alenumi pange nipuna naa repara pu gea ei mendame sese na-pilia. Yesu Keriso naana Reali ruparare go Godena pu gea eiri naana ei.
လက္ရွိေရြးခ်ယ္ထားမွု
Romo 8: POLENT23
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.