Romo 3
3
1Gore Isaraelimi mandu rangala pae wenaalinuri kokele na-pi wenaali aemepae. Yongale runguda au pada eimiri Isaraelimi mandu rangala pae wenaalinumi epe ei menda anda wilimipae. 2Eae, go ale laapome Isaraelimi mandu rangala pae wenaalinuri kokele na-pi wenaalinu ma-aepe. Ririna gupae. Godemere Isaraelimi mandu rangala pae wenaalimi nipuna angelenu siamba ara andere-ainyaya nimu para alisaya. 3Go au pinya gole mendane wenaalimi angele na-pange giao-aisimiya. Nena konemere go wenaalimi go au pemendare Godeme nipuna pula loma la wia angele na-radiayapae. 4Ora diae. Wenaali raayome pereke pereke angele lala-ainya gole Godemere ora angele komea loaya. Ande Godena angele wia bukana wape pea eimiri gupi lea.
Gode neeme angele dendare raayome pangomare
ora rendepole angele da ae kone siala pilimi.
Nee para angele ali mendame ma-rialimindare
naare raayo lombai pala pilie lea.
5Mendane wenaalimiri gupi leme. Naame pa au menda pilimandare Godeme rendepona au pea eiri wenaalimi pename andeleme. Naame go angele yangi liada arare ake demayapae. Alimi angele lalo arare Godeme naa rendaa giliandare nipumi pa au pia demayapae. 6Gurupa angelere ora ei diae. Godeme rendepona au na-pualiandare gore wenaaliri nipumi akipuma rali piliayapae. 7Mendane wenaalimi gupi loaeme. Nina koae aunu puayo eiminda Godena rendepona aunu puaya einu waru walo pange nipuna binu ma-minyasiao-aliandare gore Godeme ni wala akepea rendaa giliayapae, loaeme. 8Go eina mendane wenaalimi lalore Epe ei epenale koae ei paminae loma dameae. Gurupa angelere ni Polome loayo leme. Gupuma nimumi na bi ma-koyao-aeme. Neme go angele lawa leme wenaaliri Godeme koae ei yango adeandare anana ora au pula ara piae.
Mendanda Gode para rendepona na-ayae
9Gore naa Isaraelimi mandu rangala pae wenaalimi Godena lee ronare Isaraelimi na-mandu rangala pae wenaali angulao-aemepae. Diae. Isaraelimi mandu rangala pae wenaali pange Isaraelimi na-mandu rangala pae wenaali raayo koae aununa purimi rambuaya. Go eiri neme ambala apo lawande. 10Mo ande Godena angele wia bukanare gupi lea.
Gode para ora rendepona aya ali komenda
na-aya, lea.
11Kone waru rekele puma wi wenaalinda
menda na-aeme.
Wenaali mendame Godere golenda
go waisalo loma waru na-walimi.
12Alinu raayomere Gode kou naneyaeme.
Raayo ora ao-koyaeme.
Mendalinda epe au na-puayae. Ora dia.
13Nimina angaa para leme angeleme alenda
apale pope.
Nimuna ekenu para koae koae pereke pereke
angelenu ipuayae.
Nimuna kambulunu para ipula angelere
ali diia kerona angaa para wia romome andea.
14Nimuna angaanuri ali rerome ma-komae
angelenumi rumbilia.
15Wenaali rendaa rendaa ma-paluame pange
wenaali lu ma-komaluamere wange wange puaeme.
16One epala mone puala alenda alenda
ma-koyaoma wenaali pange rendaana ma-ao-aeme.
17Wenaali kuma kuma pu ma-ape eiri na-andeme.
18Gode para pange paalame komape eiri
na-monge andeme, lea.
19Rudule Angele wia ei rupara wia angelenu raayore go Rudule Angele siambae wenaali repara komea lea. Go eiri naa kone wima. Go einare mendame lalore Niri rendepona ao-ayo ali pi na-dea. Ora dia. Naa raayo Godeme rali pilia. 20Go einaya lawae. Mendame ande Rudule Angelenu pangoma pilianda nipu repara Godeme neere rendepona ale ali pi na-dea. Ande Rudule Angelenumi pi eiri wenaalimi nimuna koae au peme ei walenaya peae.
Godeme wenaali nipu para rendepoyao-ainya lea ei
21Gupiapare ambia Godemere wenaali nipu para rendepoyao-ainya lea eiri penameyao walea. Rudule Angele raidimi eimi na-ma-rendepoyalia. Go peapare ande Rudule Angeleme pange poropedi alinumi lisimiya angelenumiri go eina angele leme. 22Wenaalimi Yesu Keriso para kone rulademendare Godeme nimu rendepona ma-aya. Kerisona angele pangeme wenaali raayo para Godeme go au puaya. Isaraelimi mandu rangala pae wenaali pange Isaraelimi na-mandu rangala pae wenaali raayo mendaa pea. 23Wenaali raayome koae au puma aeme eimiri Gode naa Rambamuaya ali repara na-ae papare aema. 24Go peapare Yesu Keriso repara epemendare Godena yarame komea ei nimu repara pakama ale eimiri nimu kepe rapaya.
25Godemere Yesu Keriso gumare nipuna do alinau puma komalo ara nipuna wee lopisaya eimiri nipu repara kone rulala peme wenaalina koae au peme einuri randepelena lisaya. Godeme go pea eiri nipuna rendepona au pea ei penameyao wadoame pisaya. Godeme wenaalina koae au peme einu andomayapare nipuri wenaali para yarame komala ara rendaa ambe rana komea na-alisaya. 26Ambalandare go au pala pisapare ambiare go au pea eiri nipuna rendepona au pea ei penameyao wadoame pea. Godeme go au pea eiri wenaali para nipuri ora rendepona Gode aya penameyao wadoame pea. Go eina pange nipumi Yesu Keriso para kone rulademe wenaaliri rendepona aeme wenaali lea.
27Ali menda apimi au menda pi eina nipuna ako liiapeyapae. Diae. Ako liiape-na-yae. Nipumi ande rudule einu pangoma pi eina Godeme nipu lapo rendepoyao-ainya deapae. Dia, ora ako liiape-na-yae. Nipumi ande Rudule Angele pangoma pi eina Godeme nipu lapo rendepoyao na-ainya dapeyapare mo alimi kone rulada eimi komea dea. 28Go einare gupae. Ali mendame nipuna kone rulada eimi komea Godeme nipu lapo rendepoyao-ainya deae. Ande Rudule Angele pangoma pia eina dia. 29Godere Isaraelimi mandu rangala pae wenaalina Gode komea ayapae. Godere Isaraelimi na-mandu rangala pae wenaalinuna Gode pange. 30Gode komea aya. Isaraelimi mandu rangala pae wenaalimi nimuna kone rulademe eina pange Isaraelimi na-mandu rangala pae wenaalimi nimuna kone rulademe eina pange nipu rapu ma-rendepoyao-ainya deae. 31Go einare kone rulademe eimiri ande Rudule Angelenu na-ma-pereyadema. Ora diae. Ande Rudule Angele wi einu naame ma-mape diama.
လက္ရွိေရြးခ်ယ္ထားမွု
Romo 3: POLENT23
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.