Romo 15
15
Naame naana komea kone na-wi naana yangonu rambameape ei kone suaminya
1Naa naana kone rulao-aema ei puri pale wenaali naamere mo mendane wenaali nimuna kone rulao-aeme ei puri na-pale repaa nimuna kendapi einu rambamu riala paminya. Naame naana komea kone na-siala paminya. 2Naame go aunu na-piri naame go au pi auri naana Keriso yangonu ma-epeape eina naame epe aunu paminya. Naame go au pi auri mo naana Keriso yangonuna kone rulaeme ei puri ma-palape eina. 3Akepeare Keriso nipumi nipuna komea kone na-suaisaya. Ande Godena angele wia bukamere gupi lea.
Wenaalimi nee repara ero lala pisiminde eiri ni gole
ero lala pisimiya lea ei wape peae.
4Ande Godena angele wia bukana wape pisimiya angelenuri naa mongerialuameya pisimiya. Go angelenumiri naana pu konenu puri ma-palaoma Godeme naa mula pea eina kone rulaoma maisambao-aminyaya pea. 5Naame puri me auri Gode repara komea muaema. Gupuma nipumi komea naa naana kone rulaema ei puri ma-palao-aya. Gupumare Godeme nimi rambamealo ainyaloma nimi Kerisome pisaya aunu raluma komea konenu sialiminya. 6Go eiri nimi raayo komea para ralaoma ara Gode naana Reali Yesu Kerisona Apana bi minyasialiminya.
Ande Epe Angelere Isaraelimi mandu rangala pae wenaalinuna ei komea dia
7Go einare Yesumi nimi andamea rupare menda menda pa andami pape. Go au pi auri nimumi Godena bi minyasiainyaya. 8Akepeare neme nimi repara go angele lalo. Keriso nipumi Godeme ora angele loaya loma wadoame nipuri Isaraelimi mandu rangala pae wenaalinuna pupudengi nao-aya ali aisaya. Go eiri ande ririna aya kasuanu repara pinyaloma wili mandaa misaya angele ora minyaya pisaya. 9Go au pi auri ande Isaraelimi na-mandu rangala pae wenaalimi Godeme nipuna pakama yarame komea ei nimu repara alea eina Godena bi minyasiainyaya. Ande Godena angele wi bukamere gupi lea.
Go einare ni Isaraelimi na-mandu rangala pae repaa
rapu ara neme nimu repara nena angele
lala pulua, lea.
Gupuma neme nena binu minyasiado ara yaisanu
liala pulua lea.
10Menda Godena angele wia bukame pange gupi lo pea:
Nimi Isaraelimi na-mandu rangala pae repaa nimimi
pange Godena wenaali rapu raminyeke puma ara
raname komalepape lea.
11Menda bukame gupi wala lo pea:
Isaraelimi na-mandu rangala pae repaame pange
ora ruru raayo wenaalimi pange Godena bi
ora minysiainya lea.
12Poropedi ali Aisayame pange gupi lisaya.
Deipidina ara Diesimi mandu rangala pae ali menda
epelea lea.
Go epelea alimi Isaraelimi na-mandu rangala pae
wenaali andere pirinyaya Godeme ma-alia lea.
Gupuma go alimi nimu ma-epeainya nipu repara
kone rulaoma alimi lea.
13Godere naana kone rulaema eina ree. Go einare nipumi naa minyayanda maisambao aminya. Nimiri nipu repara kone rulao-aeme. Go einare kuma pi ei pange raname komala ei nimina rupara rumbilinya. Gupumare nena kone rulale ei ande Epe Yaakopi Sipiridimi ma-andaya eiri pena.
Polome paala paalame na-kome ramayo wape pea eina ree
14Na Keriso yangonuo, neme kone wipare nimiri epepe aunumi rumbialumbea. Epepe aunu pape einare kone waru wimi. Gupumare nimimi menda menda mongeriadore ana pea. 15-16Go peapare neme ambia go wape pi ramayonare neme ale menda paalame komoma nimi repara kundiri na-pe. Go eiri nimi kone wala ma-sialumeya pe. Niri paala paalame na-kome. Go au pea eiri ande Kerisona pupudengi nado ara Isaraelimi na-mandu rangala pae repaa rapu pupudengi nao-ayo. Go eiri ora ririna pupudengi Godeme ni gea ei. Niri alinau puaya alina pupudengi mandana noayo. Gupuma ande Epe Angele Gode repara ipula ei lao-ayo. Go au puayo eiri ande Isaraelimi na-mandu rangala pae repaa Gode repara ande Epe Yaakopi Sipiridimi ala mone dea. 17Yesu Keriso rapu runayo eimiri neme Godena pupudengi nayo eina raname waru komoayo. 18Neme paala paalame na-kome Yesumi neme pano lea einuna angele komea doa. Yesumi neme mo Isaraelimi na-mandu rangala pae wenaali Godena angele ma-pangano lea. 19Go au pi auri neme lawa angelenumi pange neme pawa aunumi pange na-ande aunu Godeme pa eina pange pare aunu pange ande Epe Yaakopi Sipiridina puri pale einu andoma Gode repara epame. Go einare Diurusaleme andasu nane aoma Ilirikumu andasu nane pupulu ara ande Yesu Kerisona Epe Angele raayo laripu. 20Ora nina rana pea eiri ande Godena Epe Angele mendame ambe na-pua lae para puma lape eina kone waru puaya. Go kone suayo eiri mendame ni para lalo ara neere ambala mendame pora piaya lena werepe puma pele demeyanda loayo. 21Ande Godena angele wia bukamere gupi lea.
Nipuna angele na-pange wenaalimiri nipu andeleme
pange nipu na-pange wenaalimiri nipu
kone wilimi lea.
Polome Romo wenaalina anda kimisu pola lea ei
22Go eimiri ni nimi repara epola pea eiri naare raayo sese puaya. 23Go papare ambiare nina go paranu nawa pupudengi pereya. Neme nimi andola epolameya kuni gipa andapupe neme wee pambao-aripu. 24Go pawa eiri ambiare manda nimi andola epola. Ni mo Sepani andasu nane pupulu ara anda eiri popola. Nimi andoma peredeare nimimi ni rambamealiminya lomare gore gurupa Sepani andasu nane pola. 25Go peapare ambiare ni Godena wenaalina pupudengi nala Diurusaleme andasu nane ambala pola. 26Akepeare Masedonia pange Girisi andasu laapo para aeme Keriso wenaalimi Gode repara kana pakama alame. Go eiri Diurusaleme anda para Keriso wenaalinu repara mendapare wenaali narali repaa alanoya kana giame.
27Nimuna ranana gole go au pame. Go peapare ora pape au pame. Ande Isaraelimi mandu rangala pae wenaalimi siambaeme ale Isaraelimi na-mandu rangala pae wenaali rapu rali puaeme. Go rali puaeme alere nimuna remonu wamopape alenu Godeme aloaya ei rali peme. Go einare go wenaalimiri Isaraelimi mandu rangala pae wenaalinu rapu nimuna olemolenu ora rali rali pape rupa anana pimi. 28Neme go wenaalinu pua alanoyanda lopaoma giame kanare ora luambu pua adoa. Go au pumare gore Sepani andasu andola pupulu ara gole go dina nimi andola epola. 29Ni nimi repara epolandare neme kone wi. Ni epola eimi nimi repara Kerisome nimi epepe aunu waru pilia.
30Naana Reali Yesu Kerisome pange ande Epe Yaakopi Sipiridimi pu gea eimi nina yangosinu neme nimi kongeyalo. Gode repara neme pi rupa nimimi pange ora puri paloma ara yainya pala pipape. 31Diudia andasu para Gode repara kone na-rulaeme wenaalimi ni para au menda papana yainya palepape. Gupuma mo Diurusaleme andasu para ara nola pupudengi Godena wenaalimi raname komena yainya palepape. 32Go einare Godena rana pi ei deandare neme raname komari nimi repara opopalua. Nimi rapu epa sipara ongepusi piduae. 33Godere naana kuma pi eina ree aya. Nipu nimi rapu ainya. Ora laloae.
လက္ရွိေရြးခ်ယ္ထားမွု
Romo 15: POLENT23
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.