2 Korindi 1
1
Polome Gode repara ranae angele lisaya ei
1Go ramayore ni Polo ande Yesu Kerisona aposolo ali pange naana Keriso ame Dimodi saame rapadepa. Gode nipuna ranana neme go pupudengi nayo. Go ramayore Godena Keriso wenaali monde Korindi ree anda para aeme repaa para pange Akaya andasu para aeme Keriso repaa raayo repara wape pipa.
2Gode naana Apame pange naana Reali Yesu Kerisome nimi pakama yarame komea ei pange kuma pi ei ginya.
3Naana Reali Yesu Kerisona Gode pange nipuna Apa para pange ranae angele laminya. Godemere naa para yarame waru komoaya pange nipumi naa ora waru rambamuaya. 4Nipumi naana kendanu ora waru riao-aya. Go au pi eiri naame mo mendane wenaali one mone kendanu ruaeme repaa rambamumanaya pea. Godeme naa rambamea purimiri mo mendane repaa pange gurupa rambamilima. 5Kerisome rendaa ora andaai nisaya. Naame pange nipumi pisaya rupa rendaa muaema. Go payapare Yesuri Godeme rambamisaya. Go einare Godeme pange naa Yesuna rupara go rupa rambamilia. 6Naame rendaa milimandare nimi rambameape eina pima. Naa Godeme rambamiliandare nimi pange rambamilia. Nipumi nimi go kenda pi einu pa ria eiri pualiminyayanda puri gilia. Go kendanuri naa repara ipuayapare wandu ao-aema.
7Naame nimiri epe aunu ora pilimi kone kama suaema. Akepeare naame midama rendaare nimimi pange nelemendare gore nimimi pange naame andalema epepe aunu pange pilimi.
8Ande naame Esia andasu para meama rendaanu kone na-rungulalepape. Go ale para naame kenda ora andaai giame ei riama. Go eimiri naa endoma alima konenu pange na-siama. 9Naare komomonayanda diame kone siama. Go au pi auri naare naana purina komea ara kone na-wi Gode ande komala wenaali ma-rekao-aya ali nipuna purina rilao amonoya pea.
10Ambala Gode nipumiri naa go rupa yanda angaa paranu naa kodemaya rambamisaya. Ambia pange naa rambamilia. Go einare nipumi naa ora wala rambamilia kone suma kone rulaoma alima. 11Go eiri nimimi rambamu naa yainya paliminda komea rambamilia. Go eimiri naana pao-aeme yainya andapu Godeme pange lea. Gupuma Godeme naa repara epepe aunu pilia. Go eina wenaali andapumi Gode repara ranae angele deme.
Polome nipuna pula kone wisaya einu ropo pisaya ei
12Naamere ale komea go eina komea raname komoaema. Naame kiange repo laaponu na-arima. Naame nimi rapu ao-paliama eina rupara komea go au pama. Godena rana pia rupa ora rendepona rupa puaema. Go au pi auri Godeme pakama yarame komea eina purimi pema. Su wenaali naame naana andema eimi na-pea. 13-14Naame nimi repara wape puaema angelenuri nimimi manda yarepema kone sula peme alenu komea wape pilima. Ambiare pa ongepusi komea nimimi naa kone wimi. Go peapare nimimi werepe naa ora kone wilimi. Go eiri ande naana Reali Yesuna naare epelea dinare naame nimi repara raname komema rupa nimimi naa raname ora waru komeleme.
15Go nimina epe konena neme ora kone rularipu. Go einare neme nimi repara ambala epola lawa. Go eiri rana laapo nimimi epe aunu andaliminyaya pawa. 16Ni mo Masedonia andasu nane pupulu ara nimi anda eiri epola. Wala lekeyoma ipulu ara pange anda eiri epola. Go au pi auri ande Diudia andasu nane ponoya nimimi ni rambamealiminyaya nimi ambala anda eiri epola.
17Neme nina pula loma yanda rombo wia ei wala repo pawa eiri ora neme koneme pawa. Neme go suna alimi da rupa angele laapo na-doa. Neme mendaa romona e lala ara dia pi na-lala pulua. 18Godeme ora angelenu loaya. Go einare neme lalo angelena menda romona e da ei pange dia da ei laapore pora menda dia. 19Sailasi, Dimodi pange ni naare nimi repara Yesu Keriso Godena Nakina angele larima. Nipumiri mendaa dina e lala o wala dia lala puae angele na-dea. Yesuna ruparare ora pa e loaya angele komea wia.
20Godeme wili mandaa angele mea ei ora andapu wia. Yesu Kerisome go angelenu raayo repare e kama loaya. Go einare naame Godena binu minyasiado arare Yesuna bina yainya pimae lomare wala ranae angele loaema eiri go eina loaeme. 21Godeme naa pange nimi raayo mendaa para runaoma nipumi puri ma-paloaya. Go einare Yesuna rupara naa puri paloma aema. Godeme naa pupudengi no pumonoya ma-ao-pea. 22Nipuna pare au naa para pea. Go au pi auri ande nipuna Yaakopi Sipiridi naa para ma-piraya. Go Sipiridimiri ande nipumi gula lisayande alenuna ora ambala ririna geale. Go einayandare monde werepe gula leande alenuri ora gilia kone wilima.
23Neme yayapi doandare gore nina yayapi angele Godeme penameyalia. Go peapare dia. Ni Korindi anda nane ambe na-epe auri nimi kenda ma-giapeya pawa. 24Go dama eiri niminya kone rulaeme ei naame surumbema loma na-dama. Kone rulae auri nimi ambala puri paloma aeme. Go einare naame rana ma-epape eina nimi rapu mendaa para pupudengi noaema.
လက္ရွိေရြးခ်ယ္ထားမွု
2 Korindi 1: POLENT23
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.