1 Korindi 1
1
1Ni Polore Yesu Kerisona aposolo ali anoya Gode nipumi ni mea. Neme pange nina Keriso yango Sosedenisi saame Korindi anda para aeme Godena Keriso wenaali repara wape pipa. 2Yesu Kerisome nimi nipuna mumaya. Gupuma nimi yaakopi wenaali ma-aya. Mendaa ramayore andayaya aeme wenaali raayo Yesuna bina yainya puaeme repaa repara pange rapadepa. Yesu Kerisore naana ei pange nimuna Reali pange. 3Gode naana Apame pange Reali Yesu Keriso nipumi nimi pakama yarame komea ei pange kuma pi ei ginyae.
4Neme nina Gode para ranae angele loayo eiri nipumi nimi repara yarame komalo ara pakama Yesu Keriso nimi repara gea eina loayo. 5Akepeare Yesu Keriso rapu runaemendare nimiri epepe aunu andapu andeme. Go einuri olemole kone waru wia einu pange Kerisona angele laya einu pange. 6Yesu Kerisona angelere nimina runane ambala pida ma-punyaoma aya. 7Go pea eimiyalo arare Godeme pakama gea alenu mendanda na-wandea. Go einare ambiare naana Reali Yesu penameyao epola pea ei surumbaleme. 8Nipumi nimina kone rulaeme ei minyapalalimiya nimi rambamilia. Akepeare ande Yesu Keriso naana Reali epelea naarena nimi ale menda papanaya go au pilia. 9Godemere nimi nipuna Naki Yesu Keriso naana Reali rapu komea para aliminyayanda nimi wi lamea. Go eina nipu para komea kone rulapeya.
Korindiani Keriso wenaalinumi ape yandanu puaeme ei
10Naana Reali Yesu Kerisona bina nina Keriso yangonu nimi repara go angele lalo. Komeame lala pilia angele naini komala pipape. Go angele lalo eiri gore nimina runane rumaalolo puma alimiya lalole komea kone suma runa runa puma alepape. 11Akepeare Koloeina repaame ni la gidamepare nimiri ape ape pa dame loma la giame. 12Nemere go lalo eiri go eina lalo. Repaa mendame lalo ara lalore gupi dame. Niri Polo raluayo dame. Mendame lalore Ni Apolosi rali dame. Mendapare repaame lalore Pida raluaema leme pange gurupa mendane repaame lalore Naare Keriso raluaema loaeme. 13Keriso gole nimimiri rekele rekele puma wala ma-ruru wapualeme. Ekeraisa wape pi repananare nimi rondona Polonda na-komea. Polona kou nane ralualiminyayanda niminda Polona bina baparasi au na-peme.
14Neme Gode repara ranae angele lalo. Akepeare neme nimi menda baparaisi au na-paripu. Neme ipa paisaya auri Kirisipusi pange Gayasi laapo komea paisaripu. 15Go einare mendame lalore Nina kou nane raidaminyaya neme baparaisi au payo pi na-deme.
16Ee, so le angele lalo Sedepanasi pange nipuna repaa pange neme baparaisi au paripu. Nemere go lalo repaa komea ipa isaripupare mendanda ipa paisaripu pi na-lalo.
17Yesumi ni rapaya auri neme wenaali baparaisi au panoya na-pea. Ni rapaya auri ande Yesuna Epe Angele lanoya rapaya. Neme go angele lado arare go suna alinu kone waru wimi alinumi loaeme angeleme na-laoayo. Neme go au pea eiri Yesu Kerisona komea eiri pakama au papanaya peae.
Godena konena ree pange puriri Yesu Keriso
18Yesu ekeraisa wape pi repanana komea eiri alu pape porana pulumi wenaali parare kandi na-pi angele leme. Go peapare naa Godeme rambamea repaa naa reparare gore Godena purina ree. 19Ande Godena angele wia bukamere gupi lea:
Su alinuna kone waru suma rekele peme repaana
konenu neme ma-koyalua, lea.
20Go einare ambiare monde kone waru wi alinu pange wape waru ande alinu pange angele alinu raayo ake laminyayapae. Go su alinuna andeme einu raayo Godemere keyae aunu lea. 21Go suna alinumi nimuna andeme einuna rupara Gode nipu kone wilimiya Godeme nimuna pora rungulia. Godeme nipu repara kone rulaeme wenaali rambamisaya. Go au pi auri ande wenaalimi lalo arare pamba na-pi angele waloaeme loaeme angele naame waloaema eimi go au pea. 22Isaraelimi mandu rangala pae alinumiri na-ande aunu menda andolameya puri pa loaeme. Giriki alinumiri kone waru su rekele pape einu wasuaeme.
23Go peapare naamere ande lu andiaisimiya Kerisona angele waloaema. Go angelemere Isaraelimi mandu rangala pae repaana kone ma-koyaya pange Isaraelimi na-mandu rangala pae repaame lalore Go angelere ree na-wi angele loaeme. 24Go peapare mo Isaraelimi mandu rangala pae repaa pange Isaraelimi na-mandu rangala pae repaa nimu ande Godena wenaali aeme repaa reparare go angelere Yesuna angele. Gupulu arare Godena puri pange Godena andea ei laapore go angele rupara wia. 25Go Godena ree na-wia loaeme angelemere su wenaali nimuna andeme einu raayo lu rambuaya pange Gode nipu puri na-palea loaeme purimiri su alina puri lu rambuaya. 26Godeme nimi ambe na-wili ainya nimina ambala ariminde rupa kone sialepape. Su wenaalina lee angaanare nimi repondare olemole waru ande alinu ariminde pange olemole waru wi repaa ariminde pange bi wi alinuna si wanenu ao-pamende. 27Go peapare su alinumi lalo ara pamba na-pi aunu puaeme loaeme eiri Godeme kone waru wi alinu yala meao-aya. Gupuma su alimi lalo ara puri na-palea leme alenuri Gode puri pale alenu yala ma-pola aya. 28Godemere go suna bi na-wi alenu muaya. Gupuma koae alenu kone wimi alenu muaya. Go au pe auri ande su wenaalimi ora alenu kone wimi alenu ma-koyaluameyanda pea. 29Go pea eiri mendame Godena lee rona ako lambi dimiya pea. 30Go peapare Godeme nimi Yesu repara karu epea. Gupuma naana konenuri Yesu repara epea. Nipu rapuri naa aemandare Godena lee wilina naa rendepona aema. Naa ale mendame na-koraya pange naare Godena yaakopi repaa aema. 31Go einare ande Godena angele wia bukamere gupi lea:
Mendaa apimi ako lambi duame piliandare gore ande
Realimi paya aununa komea ako lambi liape, lea.
လက္ရွိေရြးခ်ယ္ထားမွု
1 Korindi 1: POLENT23
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.