ठीक्नल 15
15
यरुशलेम्दु ठीक्नल धङ् गोयो़प्प घयेत् जोम्ब १-२१
1हुनी यहुदीयानी एन्टीयोक्ल मी यरी युङ्न हुगी छ्यो़ छोगी पी़न्ज्या घयेत् दील खीत्रङ्ल मोशागी लम्नी युङे लुस ॱसम्न, सी़बुल यहुदीगी दक् ज्यप्न मेन्द, थर् ॱमीत् छुगेन् बेत् सीन्न ॱलोप्स ज्यब बेत्। 2ॱनी हुगी ॱलोप्स ज्यक्केन् दीबे डल पावल् धङ् बार्नाबास् लोङ्न हुगी ढीक्ल केच्च्य थुक्री चीय बेत्। हुनी पावल्तङ् बार्नाबास्की दल हुगी छ्यो़ छोनी मी यरी दम्न यरुशलेम्ल ठीक्नल दीब धङ् हुगी गोयो़प्प घयेत् च्याल हुगी धो़न् दी ढीदु तङ बेत्।
3ॱनी एन्टीयोक्की छ्यो़ छो दीनी फीन्नी, पावल्सो फोनीसीया धङ् सामरीयागी लुङ्बे लम्नी झ्यीन फीम्ब बेत्। ॱनी हुगी लुङ्बे पी़न्ज्या घयेत् घदु ठेत्न आक्, हुब घयेत्ल ज्यी़त् ॱयोङ् ॱयोङ्गी मी इक् गज्येन् छ्य स्यक्पे लम् ङो़ल ॱलीच्च्युङ् सीन्न हुबे ॱस्येत्न टेप्प बेत्। ॱनी हीगो ॱह घोनी, हुब घयेत् गेस छ्यीम्मु लङ बेत्। 4हुनी पावल्सो यरुशलेम्ल ॱलीत्नी, हुगी छ्यो़ छोगी मीस्सीर् दीबे, ठीक्नल दीबे धङ् गोयो़प्प घयेत् दीबे हुबल ॱसुमी़ झ्यीब बेत्। हुनी हुब घयेत्ल पावल् धङ् बार्नाबास्की रोरङ्सो़ लम्नी को़न्ज्योक्की घङ् जेप्प घयेत् दी कुरीक् ॱस्येत्न टेप्प बेत्। 5हीनी हुदु फरीसी छ्योनी छ्य स्यक्न युङे मी यरी लोङ्न ज्यी़त् ॱयोङ् ॱयोङ्गी मी घयेत्ल अक् हज्यरङ् यहुदीगी दक् ज्यप्न मोशागी छ्यो़डीम्ल नेन्दु ची़त् गोगेन् बेत् सीन्न झ्यीब बेत्।
6हीनी हीगी धो़ङ्गी ढीक्ल ठीक्नल दीब धङ् हुगी गोयो़प्प घयेत् दी जोम्न केच्च्ये ज दुङ बेत्। 7ॱनी केच्च्य गज्येन् लप्री चीनी, हुनी पत्रुस् लोङ्न हुब घयेत्ल पी़न्ज्यासो, ज्यी़त् ॱयोङ् ॱयोङ्गी मील अक् केच्च्य ॱनेम्बु ङे खनी ॱह घोन हुब घयेत् एत् छ्य स्यक्पे लम्ल युङ् छुज्ये यो़प्पल खीत्रङ्गी छीक्नी को़न्ज्योक्की ङ एल्ला दम्ज्युङ्। हीगो खीत्रङ्ल ॱस्यो़च्च्ये यो़क्केन् बेत्। 8को़न्ज्योक्की मी कुरीक्की ॱसीम् ॱह घोगेन् बेत्। को़न्ज्योक्की ढुङ्दु ज्यी़त् ॱयोङ् ॱयोङ्गी मी इक् ओ़ब डीक्प यो़प्प दी ॱह घोज्येल खोङ्गी हज्यरङ्ल ॱनङ डस्सीरङ् ज्यी़त् ॱयोङ् ॱयोङ्गी मील अक् धम्बे थु ॱनङ्सोङ्। 9दम्ङीत् मीप्प हज्यरङ् डस्सीरङ् हुबे ॱसीम् दी इक् छ्य स्यक्पे लम्नी खोङ्गी टी़ब बेत्। 10हुगो झ्यीनी हज्यरङ्गी पुबु ॱमुमु धङ् हज्यरङ्गी इक् खुर् ॱमत् छुबे ॱनेक्स्यीङ् हुगो ज्यी़त् ॱयोङ् ॱयोङ्गी मी ॱलोप्टुक्ल स्युन यो़प्प घयेत्ल घन्डल केन को़न्ज्योक्ल ङङ्रीङ्गी छो़त् तगेन्। 11हुन्दुक् मत् झ्यीदोङ्। हज्यरङ्ल छी थर्व दी चोव ज्यीन्दक् येशुगी थुज्यीगी लम्नी मेन्द, मीत् युङ्गेन् बेत्। ॱनी हुब घयेक्की छी थर्व दी हुगोरङ् बेत् सीर हील हज्यरङ्गी छ्य स्यक्न यो़क्केन् बेत् सीन्न ॱस्येप्प बेत्।
12हीनी बार्नाबास् धङ् पावल्की रोरङ्सो़ लम्नी ज्यी़त् ॱयोङ् ॱयोङ्गी घुङ्दु को़न्ज्योक्की यीक् छ्यीम्मी़ लेगी ता धङ् यम् छेम्मे ले घङ् जेप्प घयेत् दी ॱस्येत्न टेप्प बेत्। ॱनी हील हुगी मी घयेत् दीब ॱसीङ् थागील देत्न नेम्ब बेत्।
13ॱनी हुब ॱङीबी़ तम् दी ढुप्नी, हुनी याकुब् लोङ्न पी़न्ज्यासो, ङे तम्ल नेन्दे। 14को़न्ज्योक्की ज्यी़त् ॱयोङ् ॱयोङ् घयेत्ल अक् थुज्यी सीन हुब घयेक्की छीक्नी इक् खोङ् रोरङ्गी मीस्सीर् युङ्ज्येल दम्ब बेत्। गोम ॱएन्स्युक्ल झ्युङ हीगो हुन्दोरङ् शीमोन्गी हज्यरङ्ल ॱस्येच्च्युङ्। 15हील डीक्पे तम् कलुङ् ॱस्यो़क्केन् घयेक्की ॱसुङ्रप्ल हीन्दुक् सीर च्यीक् ढीन यो़क्केन् बेत्।
16हीगी तीङ्ल ङ युङ्न दाऊद्गी खीम् भोक्नर दी ङे सो़न बीन् योङ्। रम्नर घयेत् दी फीच्च्य यङ् ङे सो़न पुक्न बीन् योङ्। 17हुनी क ङे मीङ्गी ढीक्ल भो़बे मी ॱयोङ्म ज्यी़त् ॱयोङ् ॱयोङ्गी मी घयेक्की चोव ज्यीन्दक् चर च्येत्न युङ्गेन् बेत् सीन्न 18धङ्बुदु चोव ज्यीन्दक्की ॱसुङ्न यो़प्प थो़ङ्गेन् बेत्। (आमोस् ९:११-१२)
19हुगो झ्यीनी ङे ॱसीम्ल हीगी ढीक्ल हीन्दुक् ॱनो़गुक्। ज्यी़त् ॱयोङ् ॱयोङ्गी मी को़न्ज्योक् छ्योल युङ्गेन् घयेत्ल हज्यरङ्गी नुक् झ्यीबे घाब ॱमत् ॱलङ्दोङ्। 20हुब घयेत्ल हीन्दुक् झ्यीबे यीगी च्यीक् ढीन तङ्दोङ्। ॱल्ह धङ् कु घयेत्ल पुन स्यीलोक्सील ॱसोङे समे ढङ् घयेत् मत् सज्यीत्। छ्येगी ढङ्नी जीम्न दो़च्च्यीत्। ठक् ॱमत् तो़म्बे ॱस्य मत् सज्यीत्। ठक् म दीरङ् मत् सज्यीत् सीन्न हीजो़त् च्यीक् ढीन तङ्दोङ्। 21घन्ड हीन् सीन्न मोशागी छ्यो़डीम् त धङ्बुनीरङ् सार् धङ् युगङ् घयेत्ल हज्यरङ् यहुदीगी छ्यो़गी छोगङ्दु ङीत्तुवे ङीङ्गी यङ्ल छीगङ् डोन टो़क्केन् बेत् सीन्न ॱस्येप्प बेत्।
ज्यी़त् ॱयोङ्गी मी घयेत्ल यीगी तङ २२-२९
22ॱनी याकुब्गी केच्च्य हील ठीक्नल दीब, हुगी गोयो़प्प घयेत् दी धङ् हुगी छ्यो़ छोगी मी ॱयोङ्म घयेत् दी थी़न्न रोरङ्सो़ घुङ्नी मी यरी दम्न एन्टीयोक्ल पावल्तङ् बार्नाबास्की दल तोङ्ज्येल ढो़गो डीक्प बेत्। पी़न्ज्या घयेक्की नङ्दु गेन् खुर्केन् मीरङ् ॱङी यहुदा बार्साबास् सीक्केन् च्यीक् धङ् सीलास् सीक्केन् च्यीक् दम्ब बेत्। 23ॱनी हुब ॱङीबी़ लक्ल हीन्दुक् झ्यीबे यीगी ढीन तङ बेत्। एन्टीयोक् सार्, सीरीया लुङ्ब धङ् सीलीसीया लुङ्बन यो़क्केन्, ङीक्की छ्य च्यीक्की पी़न्ज्या, खीत्रङ् ज्यी़त् ॱयोङ् ॱयोङ्गी मी घयेत्ल ङीत् ठीक्नल धङ् गोयो़प्प घयेक्की छ्यक्सुम् थेमु यो़दो। 24ङीक्की हीनी ॱमत् तङे मी यरी खीत्रङ् च्याल फीन्न हुबे तम्गी खीत्रङ्ल च्युगा लङ्न ओ़न् थोम्दु ची़त्तुक् सीर ङीक्की ॱह घोज्युङ्। 25हुगो झ्यीनी ङीत् कुरीक् ढो़गो च्यीक्ल देत्न खीत्रङ् च्येल्ल मीरङ् ॱङी दम्न तङेन्। हुब ॱङीबु ङीक्की झ्यम्बे दगु बार्नाबास् धङ् पावल्की दल युङ्गेन् बेत्। 26बार्नाबास् धङ् पावल् हीब म दीरङ् हज्यरङ्गी चोव ज्यीन्दक् येशु ख्रीष्ट्की छेङ्गी ढीक्ल ॱरोक्रङ् च्यो़ गो़ ॱस्यर्न आक्, च्यो़गेङ्गी मी बेत्। 27ॱनी खीत्रङ्ल हीगी तम् घयेत् हीगो यहुदा धङ् सीलास्की इक् कुरीक् ॱस्येत्न टो़क्केन् बेत्। 28ॱनी खीत्रङ्गी नेन्न ॱसम् गोगेन् दी हीजो़त् च्यीक् मेन्द, हीले ॱल्हक्मु गेन् ॱमीत् को़ज्येमल धम्बे थुदङ् ङीत् डीक्च्युङ्। 29ॱल्ह धङ् कुल पु तङे समे ढङ् मत् सज्यीत्। ठक् मत् सज्यीत्। ठक् ॱमत् तो़म्बे ॱस्य मत् सज्यीत्। छ्येगी ढङ्नी जीम्न दो़च्च्यीत्। हीजो़त् च्यीक्ल धोजीम् झ्यीन देत्न ॱनी, खीत्रङ्ल गस्सी युङ्गेन् बेत्। खीत्रङ् थङ्बुव ज्याबुव युङ्ज्ये यो़प्प स्योक्च्यीत्।
30हीनी हुगी यीगी दी हुब स्यीबी़ लक्ल तङ बेत्। ॱनी एन्टीयोक्ल हुब ॱलीत्नी, हुदु हुगी छ्यो़ छो जोम्दु ची़त्न यीगी दी टेप्प बेत्। 31ॱनी हुगी मी घयेत् दीगी यीगी दी डोनी, हुनी ॱलोप्स्यीक् ॱङीत्न गेस लङ बेत्।
32ॱनी यहुदा धङ् सीलास् हुब अक् को़न्ज्योक्की कलुङ् ॱस्यो़क्केङ्गी मी झ्यीनी, हुबे हुगी पी़न्ज्या घयेत्ल छ्य डम्दु युङ्ज्येल ॱलोप्स्यीक् युङे तम् गज्येन् ॱस्येप्प बेत्। 33ॱनी हुदु स्यक्पु गज्येन् देत्नी, हुगी पी़न्ज्या घयेत् दीगी खीत्रङ्ल ॱसीम् दीव युङ्ज्ये यो़प्प तोङ् सीन्न हुब ॱङीबु ॱलोक्न तङ बेत्। हुनी रोरङ्सो तोङ्गेन् घयेत् दीब च्याल लोक्न युङ बेत्। 34[ॱनी तङ्न आक्, सीलास् देत् तङ बेत्।] 35ॱनी पावल् धङ् बार्नाबास् हुदु देप्प बेत्। हुब ॱङीबी़ इक् ॱयोङ्मदङ् दल हुदु चोव ज्यीन्दक्की केच्च्य मी कुरीक्ल ॱस्येत्न ॱलोप्स ज्यब बेत्।
पावल्सो एशीया धङ् ग्रीक्की लुङ्बल १५:३६–१९:४०
पावल् धङ् बार्नाबास् घीबे तम् ३६-४१
36हुनी तीङ्ला पावल्की बार्नाबास्ल एल्ला सार् घयेत्ल गीर्न चोव ज्यीन्दक्की केच्च्य ॱस्यो़स्स घयेत्ल हज्यरङ् फीच्च्य यङ् गीर्न पी़न्ज्या घयेत् घन्दुक् झ्यीब यो़दङ् तदु डो झ्यीब बेत्। 37ॱनी बार्नाबास्की लेम्बुल नुक्म हीन्न, युहन्ना मर्कुस् हुगो ओक् कङ्ज्यीक्ल ठीक्न डो सीन्न झ्यीब बेत्। 38युहन्ना मर्कुस्की म दी एल्ला कङ्ज्यीक्ल गीरे यङ्ल पम्फीलीया लुङ्बनी रोरङ्गी ले दी ॱलो़ तङ्न लोक्प हीङ्गो़प्प बेत्। हुगो झ्यीनी पावल्की हुगो ॱमत् ठीक्तोङ् झ्यीब बेत्। 39ॱनी हीगी ढीक्ल पावल् धङ् बार्नाबास् खन्डुक् ॱस्योर्न, हीनी घीनर बेत्। हीनी बार्नाबास्की युहन्ना मर्कुस् ठीक्न ढु छ्यीम्मुल स्युन सैप्रस्की लुङ्बल टप्नर बेत्। 40ॱनी पावल्की दगुल यङ् सीलास् दम्ब बेत्। ॱनी एन्टीयोक्की पी़न्ज्या घयेत् दीगी हुब ॱङीबु चोव ज्यीन्दक्की थुज्यीगी लक्ल च्योन, हुनी हुब ॱङी फीम्ब बेत्। 41फीन्नी हुब ॱङी सीरीया धङ् सीलीसीया लुङ्बे घुङ्नी फल्ल फीन्न हुगी छ्यो़ छो घयेत्ल ॱलोप्स्यीक् टो़क्कील्ल गीर बेत्।
လက္ရွိေရြးခ်ယ္ထားမွု
ठीक्नल 15: LHM
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 1995 Wycliffe Bible Translators, Inc. and Nepal Bible Society