ठीक्नल 1
1
को़न्ज्योक्की छ्यो़त्तुम्ल गुक् गोगेन् १-५
1-2येशु तेङ् यी़ल ठीक्पे यङ्ल खोङ्गी दम्बे ठीक्नल घयेत्ल धम्बे थुगी लम्नी तम् ॱङान स्योक् स्योक् थुक्ल खोङ्गी हीदु गोमनी घङ् जेप्पे ले घयेत् धङ् ॱलोप्स ज्यब घयेत् ङे एल्लादु थीयोफीलस् नीज्यरङ्ल ढीन तङेन्। 3खोङ् ढोङ्नी यङ् ॱसोम्बुल लोङ्नी, स्यक्पु स्यीप्च्यु थुक् खोङ् गन्दीय ॱसोम्बु यो़प्प धक्च्येल खोङ् रोरङ्गी ठीक्नल दीबल लेम्म गज्येन् थो़न्न ठेप्प बेत्। ॱनी हुगी यङ्ल को़न्ज्योक्की ज्यागक्की ढीक्की केच्च्य दी इक् ॱस्येत्न टेप्प बेत्।
4ॱनी लेन् च्यीक् खोङ् थो़न्न हुबदङ् कङ्ज्यीक्ल सम सये यङ्ल खोङ्गी हुबल हीन्दुक् सीन्न तम् ॱङाब बेत्। ङे यप्की खीत्रङ्ल टो़प्पे छ्यो़त्तुम् झ्यीब दी नम् डुप् डुप् थुक्ल खीत्रङ् यरुशलेम् हीनी घल अक् मत् डोव, हीदुरङ् गुन दो़च्च्यीत्। हीगी छ्यो़त्तुम् हीगी ढीक्ल ङे एल्लादु उक् खीत्रङ्ल ॱस्येप्पेन्। 5युहन्ना बप्तीस्की छ्यी़ बप्तीस्लरङ् ॱलुक्प बेत्। ह अच्च्येत् च्यीक्नी खीत्रङ् धम्बे थुगी बप्तीस्ल ॱलुक्केन् बेत्।
येशु तेङ् यी़ल ठीक्नरे तम् ६-१४
6हीनी येशुदङ् ठीक्नल दीब जोम्नी, हुबे येशुल हीन्दुक् सीन्न ढीब बेत्। ह हीगी धी़ल चोव ज्यीन्दक् नीज्यरङ्गी इस्राएल्की ज्यागक् फीच्च्य यङ् चव चुक्केन् न? 7ॱनी येशुगी लेम्बुल यप्की ॱवङ्गी स्यक्पे छीरङ् धी़दोक् घयेत् खीत्रङ्गी ॱस्यी गो़ब मीप्प बेत्। 8धम्बे थु खीत्रङ्ल घप्न युङ्नी, हस्सो़त् खीत्रङ्ल ॱस्यीक् ॱङीक्केन् बेत्। हुनी खीत्रङ् यरुशलेम्नी झ्यीनी यहुदीया जेङ्ल हीनी सामरीयाल हुनी झ्यीनी जम्बुलीङ्गी थदक्ल ते ङे पङ्बुल थो़न्न ॱस्यो़क्केन् बेत् सीन्न ॱस्येप्प बेत्। 9हीगो ॱस्येत् छर्नी, हस्सो़त् येशु खोङ् रोरङ्गी ठीक्नल दीबे दोङ्नी हुबे तगीन् तगीर्रङ् तेङ् यी़ल ठीक्नर बेत्। ॱनी ॱनम्गी तोङ्ल ॱलीबे यङ्ल ॱमुबे कक् तङ बेत्।
10ॱनी खोङ् हुन्दुक् झ्यीन ॱनम्ल ठीक् डोव दील ठीक्नल दीब गन्दीक्म तगीन् यो़प्पे यङ्ल घो़ कप्पु घो़म्ब मी ॱङी हुब च्येल्ल ॱस्यरी थो़न्न युङ बेत्। 11ॱनी हुब ॱङीबी़ ठीक्नल दीबल गालीलागी मीसो, खीत् घन्डल ॱनम्ल तगो़प्प। येशु हुन्दो खीत्रङ्गी दोङ्नी तेङ् यी़ल ठीक्नर डस्सी खोङ् यङ् फीच्च्य जम्बुलीङ्ल झ्यो़ङ्गेन् बेत् सीन्न ॱस्येप्प बेत्।
12हीनी ठीक्नल दीब हुगी ओलीप्की लदोक् दीनी मल्ल यरुशलेम्ल भप्न युङ बेत्। हुगी लदोक् दी यरुशलेम्गी सार्नी ङीत्तुवे ङीङ्गी यङ्ल दोम्ब ज्यब ढुक्चो़त् च्यीक् डोज्ये युङ्गेन् बेत् सीक्केङ्गी ॱसनेजो़त् च्यीक् यो़प्प बेत्। 13हीनी हुब घयेत् हुगी सार्की रोरङ्सो़ दो़स्से खीम् दीगी तेङ्स्युक्मे कोट्ट दील स्युन देप्प बेत्। हुदु पत्रुस्, युहन्ना, याकुब्, अन्द्रीयस्, फीलीप्, थोमा, बार्थोलोमै, मत्ती, अल्फयस्की भु याकुब्, शीमोन् जेलोतेस् धङ् याकुब्गी भु यहुदा झ्यीब यो़प्प बेत्। 14ॱनी हुदु ठीक्नल दीबे दल येशुगी आम मरीयम्, येशुगी मीङ्बु दीब धङ् ॱनी भुमु ॱयोङ्म ॱयोङ्म आक् छीगङ् हुदु जोम्न ॱसीम् च्यीक् ली़ च्यीक् झ्यीन को़न्ज्योक्ल ॱसुव तप् तब झ्यीगो़प्प बेत्।
यरुशलेम्गी छ्यो़ छो चव छुब १:१५–८:३
यहुदागी छप्पुल ॱयोङ् दम्बे तम् १५-२६
15ॱनी हुगी धी़ल ङीन् च्यीक् छ्य स्योक्केन् मीरङ् ज्यदङ् ङीस्स्युजो़त् च्यीक् जोम्न यो़प्पे यङ्ल पत्रुस् हुब घयेक्की घुङ्नी लोङ्न 16-17हुब कुरीक्ल हीन्दुक् झ्यीब बेत्। पी़न्ज्यासो, ॱसुङ्रप्ल यो़क्केन् धङ्बु दाऊद् च्यानी धम्बे थुगी यहुदागी ढीक्ल ॱस्येप्पे केच्च्य दी ता गो़ ॱस्यर बेत्। यहुदा हुगो स्येन् हज्यरङ्ल को़न यो़प्पे ले च्यीक्की छ्यीट्टो बेत्। ॱनी गोत्तो़ छ्यीमनङ् झ्यीन येशु ज्यी़ तो़न्न सुङ्दु ची़प्प बेत्। 18ॱनी गोत्ते ङेम्ब झ्यीबे लेगी पयीसक् दीगी स्यीङ्ग च्यीक् नो़ब बेत्। ॱनी हुदु रोरङ्गी रोरङ् पीत्तीङ् मल्ल छर्न ढोप्प दी भोङ्न नङ्डो़ घयेत् दी ॱनम्ल थोर्न ॱस्यीनर बेत्। 19ॱनी हुगी केच्च्य हुगो यरुशलेम्गी मी घयेत् कुरीक्की ॱह घो छर बेत्। हुनी हुब घयेक्की रोरङ्सो़ तम्ल हुगी स्यीङ्ग दील आखेल्दामा सीन्न मीङ् ताब बेत्। हुगी मीङ्गी धो़न् दी ठक् खीसे स्यीङ्ग सीक्केन् बेत्। 20गोत्ते ढीक्ल ॱसुङ्रप्की गुल्लुल थो़ङ्गेन् बेत्।
हुगी खीम् दी खीम्दोङ् लेल ज्युक्च्यीत्। हुल मी ॱसु उक् दो़च्च्ये मीप्प तोङ्ज्यीत् सीन्न ढीन यो़क्केन् बेत्। (ॱसुङ्रप्की गुल्लु ६९:२५)
ॱनी हरुङ्द
हुगी गोयो़प्पे लेगी छप्पु दी ॱयोङ्गी झ्यीज्यीत् सीर थो़ङ्गेन् बेत्। (ॱसुङ्रप्की गुल्लु १०९:८)
21-22हुगो झ्यीनी येशु ढोङ्नी यङ् ॱसोम्बुल लोङ हीम्बल पङ्बु झ्यीक्केन्, ङीत्तङ् कङ्ज्यीक्ल मी घयेत्ल ॱस्यो़त्तु डोगेङ्गी मी च्यीक् दम् गोगेन् बेत्। ॱनी हुगी मी दी ङीत् डस्सी, चोव ज्यीन्दक् येशुदङ् दल गीर् ॱनोङे मी युहन्नागी येशु बप्तीस्ल ॱलुक्पनी झ्यीनी, खोङ् ङीक्की दोङ्नी तेङ् यी़ल ठीक्नर थुक् ङीत्तङ् देप्पे मी युङ् गोगेन् बेत् सीन्न पत्रुस्की ॱस्येप्प बेत्।
23ॱनी उन यो़प्पे मी घयेत् दीगी मीरङ् ॱङी दम्न तो़म्ब बेत्। हुबे मीङ् दील च्यीक्ल युसुफ् धङ् च्यीक्ल मत्तीयास् सीन्न सीगो़प्प बेत्। ॱनी युसुफ् दील मीङ् ॱयोङ्म आक् बार्साबास् धङ् युस्तस् सीन्न सीगो़प्प बेत्। 24हीनी हुब घयेक्की येशुल हीन्दुक् सीन्न ॱसुव तब बेत्। चोव ज्यीन्दक् नीज्यरङ्गी मी कुरीक्की ॱसीम्ब ॱह घोगेन् बेत्। हीगी मीरङ् ॱङीबु हीगो स्यप्च्यी़ ज्युक्केन् ठीक्नले लेल घङ्गो दम्गेन्? ङीत्ल ज्यी़ तो़र्रो झ्यी। 25यहुदागी रोरङ्गी लेगी गेन् दी ॱलो़ तङ्न रोरङ्ल ओ़ब यो़स्सल टप्नर बेत् सीन्न ॱसुव तब बेत्। 26ॱनी हुगी मी घयेत् दीगी ज्येन् पुर बेत्। ॱनी ज्येन् दी मत्तीयास्ल थोब बेत्। हुन्दुक् झ्यीन ठीक्नल च्युज्यीक्पु दील हुगो ॱनो़म्ब ज्यब बेत्।
လက္ရွိေရြးခ်ယ္ထားမွု
ठीक्नल 1: LHM
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 1995 Wycliffe Bible Translators, Inc. and Nepal Bible Society