HOSEA 13
13
Israel Re Lo" Thao" Dao: Kho' Nae" Ru
1Lai: lo" va" ayo, mae Ephrim kaung bao: jhau: ra" au: re Israel mae" gakaung boe: wa gyaug: ako". Yao: bam wa Ephrim re ceim" tau: qu" ako". Ngadqere: ai: byumyu" qe wa Bala re caung:pa" mung: qobo shad' ako". Aimung: ce: mathao mae yao: bam shid qhug' li" genae". 2Yao: bam wa jo, to' yang solho jham- xao su byu: nho: au: naug' yang akhyao tung" mung: xao su byu: qe: lo; yang kad' ra" ngaui solho jham kad' ra" khyo" xo' yang: qobo shad' na: ashiko". Aimung: thao re lao" yao: bam wa- yao: bam re xeim: ngaui" byid: ge,- ga: ta" ako". Xao su byu qe wa- ai: nung: jaung lo: jham: alho gaung khyao we' dakhyo: kad' to" ra" ai: solho jham re- khoru: mung: babaug qo" baug nae" i? 3Aimung: ce: byu qe wa- ne, seim mae" lao" khyam" we' dakhyo: ne, kao no' mae" baui" lo" ra" nghin we' dakhyo: byaug: lo" li" genae". Yao: bam wa gaug nao: jao: mae" la: yang hug' tao" pye' ra" gaug seim we' myikhug' zang mae" myikhug' we' dau: li" genae".
4 Asang wa- Naonhaung" re Egutu mae" jhui" lo: ra". Ngo wa naonhaung" nho: Mao"So Asang ngad:- naonhaung" wa ngo mae" lai yang Mao"So gatau maqo" ngad: ako". Ngo dayaug za: naonhaung" khyad: yu: Asang ngad:- 5Ngo wa nao re kyaug' khyi li: ra" din"pyad' yo mae gun caung: lo: va". 6Ngadqere: naonhaung" wa mug:myid gai khyo vao ye" lo" mung: naonhaung" wa gyi: gyi: the' zo" ru we' nhag' shid nhag' dag: gelao"- ngad beim" li" mung: ngore to" myhid' pye' ava". 7Aimung: ngo wa khang khyi we' dakhyo: nao re khe' zhaug' nae". Nin tin we' dakhyo: ni" khyo cao" yang: mae ngo lham: na nae". 8Ngo wa yao: zo: ci: phyaug' pye' ra" vae myhi" we' dakhyo:- nao re khe' zhaug' mung: nao re ngoyang phyo' cad' pye' nae". Ngo wa khang khyi dadau: we' dakhyo:- nao re aimae yao: zo" pye' nae". Aimung: ngo wa seyo: gug'nyhug' we' dakhyo: nao re phyo' cad' pye' nae".
9Israel byu qe we"- naonhaung" re ngo phyo' qheim" pye' nae"- ailao" naonhaung" khag' re qo" bao" yu nae" i? 10Naonhaung" wa kho:kham we' au: jhaung jham mho' ako". Ngadqere: yao: bam: yang byumyu" mung"dan: re khoru: qo" khyad' yu ko" ra" i? 11Ngo nhag' yo" ru we' naonhaung" re kho:kham jham byid: va"- aimung: nga" nhag' jam: yo" ru: yang yao: bam re yu: pye' va".
12Israel nho: yug: no qobo we' shad' nghung" rure tung" xam" to: va". Aimung: ai: tung" xam: jham re gug:gam taung" shaung: to: va". 13Israel wa kao so' daui: na nae" agu qo" ngadqere:- khau: thug' li" nae" za: ngad va" zonau" wa yao: myhi" bota" yham mae" mathug' li" qad: ru we' dakhyo: nhag' magyang: mung:- saung" go yang: ai: agu re maqo" khae: yu ngad: ako". 14Ngo wa ce: byumyu" re movo: mug: mae" makhyad' yu nae"- shid: ra" kheim: so' mae" re: yao: bam re makhyad' khyui: yu nae". Shid: ru we"- ni" nho: qam" no re xo' boe" nhao wa,- movo: mug: we"- ni" nho: phyo' qheim" rure xo' boe" nhao wa,- ngo wa ce: byumyu" re nhag' makhyag' lo nae". 15Israel wa myo, gae we' dakhyo: yaug: maung" li" ngadqere:- ngo wa din"pyad' yo mae ba thug' shad' mae" la laung re nhao: ke' byid: mung: ai: la laung wa yao: bam: qid baug: jham we' qid thaung: jham re kyaug' ho: pye' nhao nae". Ai wa phug' de; ru: ja: khao: ngo" re yu: pye' byid' li" nae". 16Samari wa ngore tau: lhan" ra" yao" qobo: mathao mae qobo dae byid: ca" ra". Yao" vobyu qe wa mang: zin: jao: mae shid: byaug genae" nau" nin" qe wa myidgaung mae thaung" khyoe' se' pye' ru qhug' genae". Aimung: gaung la" ra" myiqe: qe wa shae pyang" yang kyo' kho' sin" pye' byid' ru qhug' genae".
လက္ရွိေရြးခ်ယ္ထားမွု
HOSEA 13: LHCL
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© Bible Society of Myanmar 2009