Sáni Lúkasï 22
22
2. K'amenchantskua, uarhikua ka tsíntskua
(22.1—24.53)
Teruatperanhasti Jesusini jupikani
(Mt 26.1-5,14-16; Mk 14.1-2,10-11; Jn 11.45-53)
1Antamutaxaptia k'uínchekua enka kurhinta no xarhipiti jukari anhak'a enka Páskua arhinhak'a. 2Ka tátecheri juramutichaksï ka juramukua jurhentpirichaksï chérhpeparini jirinhakuntaxapti néna Jesusini atani uántikuni.
3Jimak'ani Nóampakiti Judasïni incharhespti, enka Jesusiri témpeni tsimani jurhenkorheri jémpa mépka, enkaksï Iskariote arhimpka. 4Ima niraspti tátecheri juramutichani ka tiósïo kuarichani uantaxekuani, ka aiakuaspti Jesusini intsïnharhitaani. 5Imaksï tsípespti ka Judasïnksï tumina aiakuspti. 6Ka ima aiakorhespti ka úntaspti jirinhakuntani néna ka nani Jesusini intsïnharhitaani jima enka no jánhapirinka.
Acheri Páskua anapu t'irekua
(Mt 26.17-29; Mk 14.12-25; Jn 13.21-30; 1~Ko 11.23-26)
7K'uínchekua janospti enka no xarhipiti jukari kurhinta anhak'a, jiák'ani enka karichi Páskua anapu atanhempka. 8Jesusi Pédruni ka Juánuni axaaspti, arhiaparini:
–Níts'ïni je Páskueri chúrekua t'irekua tánacheni.
9Imaksï kurhamarhespti:
–¿Naniri uéksïni eskachi tánakata ampe péraaka?
10Jesusi arhiaspti:
–Iretarhu ínchaakuni jámantsï achetini ma kúmaaka enka k'amukua ma jimpo itsï páni jauaka. Chúxapa je nani enka inchant'ak'a, 11ka imani k'umanchekuarhu anapu k'érini arhi je: Jurhentpiri uéksïnti míteni: ¿Nánisïni jucheti jurhentpirichani jinkuni chúrekua anapu t'irekua Páskueri t'irea? 12Imaksïni exeraati k'umanchekua k'éri ma sési jántskantskata, enka karhakua jaka, enkachi chúrekua t'ireaka. Jima péra je ampe enkats'ï xáni tának'a.
13Nirasptiksï ka iámu ampe ísï úkorhespti eska Jesusi na arhiapka, ka chúrekua anapu t'irekuaksï Páskueri tánaspti.
14Enka na t'irekuepkia, Jesusi ka jurhenkorherichaksï uaxakaspti t'ireni. 15Ka Jesusi arhiaspti:
–¡Xáni enkani uékani jápka Páskueri t'irekuani cha jinkuni arhani, jimpokani nósesi kánhaaka! 16Aiankuxakaksïni eskani jiák'ani jamperi nóteru auaka, enkachi na ménteru Diósïri irechekuarhu márku auakia.
17Ka enka na tsúntsuni p'íkupka, diósmaiamukua arhintaspti, ka uantani:
–Inte je ka intsïmpera je; 18jimpokaksïni arhixaka eskani nóteru itsïmaaka uberi itsïrhukua enka jamperi Diósïri irechekua janonkuaaka.
19Tátsekua kurhinta p'íkuspti ka diósmaiamukua arhispti, k'epekuspti ka íntsaaspti, uantaparini:
–I jucheti anhanhatakuesti, enka chári sési jimpo intsïnharhitpenhaaka ka atanhani uántikunhani. Ísïts'ïni míantsï je.
20Enkaksï na k'amarapkia t'ireni, tsúntsuni mák'ueni kámaspti, uantaparini:
–I itsïmakua jimpanhe pakatperakuesti enka jucheti iurhiri jimpo ts'ïrimeranhaka, enka chári sési jimpo tsîtakorheaka. 21K'óru míte je, eska ixu jarhaska ima enkarini sïpataaka, jínteni jinkuni t'irexati. 22Jimpoka acheti Uáp'a jatsiska imani xanharini jatani enka míntanhaka ka ¡Jarhonheni ima enka intsïnharhitpeaka!
23Jimak'anksï ima uénaspti kurhamarhperani:
–¿Néxamu ísï kámaa?
Nésï sánteru k'ériua
24Ka tátsekuaksï jurhenkorhericha uinhamu jupiperaspti míteni uékani néxamusï sánteru k'éri ampepirini. 25Enka úpka, Jesusi arhiaspti: “Irechechaksï uinhantirasïnti juramukuaani iretechani ka juramutichaksï uantakorhesïnti eskaksï iretani marhuakuxaka. 26Ka cháts'ï no xáxeaka. Jimini ménterueniaru, ne enka sánteru k'érika chánksïni jinkuni jatsisti ima sánteru sapichueni, ka urherukuti máteruechani marhuakuaue. 27Jimpoka ¿Anti ne sánteru k'éri ampeski? ¿Ima enka uaxakakorhek'a t'ireni o ima enka kéntpek'a? ¿Anti no ima sánteru k'ériski enka uaxakak'a t'ireni? Ka ji cha jinkuni kéntpiriska.”
28“Cháts'ïni nómeni jurak'uska enkani nósesi nitamakorheka. 29Jimpoksïnisï juramukua ma jurak'ucheni jaka, ísï eskarini jucheti Táte jínteni na juramucheka, 30ka cháts'ï jínteni jinkuni jucheti irechekuarhu t'ireaka ka itsïmantani, ka k'érikuarhuecharhuts'ï témpeni tsimani Israeli anapu iretechani uaxakaaka útakuani.”
Jesusi uantant'a'sti eska Pédru no míteni uantaaka
(Mt 26.31-35; Mk 14.27-31; Jn 13.36-38)
31Acha uantasptiteru:
–¡Simonita! Exe, Nóampakiti sésikua kurhak'orhesti chánksïni tríjueni uauatani; 32ka jíkini arhip'echeska, eska chéti jakak'ua no xántkueuaka. Ka enkari na jínteni jinkuni k'uanhatseaka, jarhuataa chéti erachichani sési anhaxurhikorhetini jakak'iuni jarhani.
33Simoni arhispti:
–Acha, t'u jinkuni k'ataperakuarhu jamperi niuaka, ka t'u jinkuni jamperi uarhiaka.
34Jesusi arhispti:
–Pédru, arhixakakini eska iásï t'arhechu nótki jamperi uerani jauaka, enkarini t'u t'uíni tanimu xanhari no míteni uantaakia.
Jesusi ts'ék'ukua niáranchasti
35Tátsekua Jesusi kurhamarheaspti:
–Enkaksïni nóma tumina jinkuni axapka, ka enkaksïni nóma t'irekua ampe jinkuni axapka, ka enkaksïni xánturharku axapka, ¿Ampets'ï uétarhenchaspki?
Ka imaksï arhispti:
–Nóma ampechi uétarhenchaspka.
36Jimak'ani arhiaspti:
–Iásï jimini ménteruenia, ima enka jatsika tumina juáe, ka ístu akua ampe juáe; ka ne enka tiámu atap'etarakua no jatsikorheka, chereparhakua atarante ka piákorhe. 37Jimpokaksïni aiankuxaka eskani jatsiska ísï úkorhenchani eskaksï karakatecha na arhik'a: Ka nósesi járhatichani jinkuni miuinhantasti. Jimpoka iámu ampe enka jucheti ampe xáni karakata jaka jatsiska úkorheni.
38Imaksï arhispti:
–Acha, tsimani tiámu atap'etarakuachi kámaxakaia.
Ka ima arhiaspti:
–Sésku jauatia.
Jesusi Getsemani uantamukukorhesti
(Mt 26.36-46; Mk 14.32-42)
39Tátsekua Jesusi uéraspti, ka eska na p'intekua jatsipka, Olibu juátarhu niraspti; ka jurhenkorherichaksï chúxapaspti 40Enkaksï niárapka, arhiaspti:
–Uantamukukorhe je, nóksïni terunkutpiri antani.
41Xáni jarhareaspti eska ma xáni iauiani pérak'a tsakapu k'uanirani, ka tinkuixurhispti uantamukukorheni. 42Uantaparini: “Táte, enkari uék'a, íni k'amek'amechantskuarini kéntitache; k'óru ásï ima úkorhe enkani ji uék'a, ima úkorhe enkari t'u uék'a.”
43[Enka ísï úkorheni jápka, auantarhu anapu ánjeli ma xarharaspti uinhapekua íntskuni. 44Ka náuek'i xáni nósesi p'ikuarherani jápka, Jesusi sánteru uinhamu uantamukorhesïrempti, ka iurhirini jásï aparheta kánekua iurhuiurhuk'utaxapti.]
45Enka na jauarapka jima enka uantamukukorheni jápka, niraspti jima niántani enkaksï jurhenkorhericha jápka, ka imaksï t'uíni k'uíxaptia jimpoka mískorhekua antaaspkia 46ka arhiaspti:
–¿Antits'ïsï k'uíni jaki? Jauara je ka uantamukukorheni je, ásïksïni terunkutpiri ante.
Na enka Jesusi jupinhaka
(Mt 26.47-56; Mk 14.43-50; Jn 18.2-11)
47Jesusi útasï uantaxapti, enka uánekua niáranhapka. Ima enka Judasï arhinhempka ka enka imeri jurhenkorheri mépka urhekupaaxapti. Antarheraspti Jesusini ka putinharhikuni, 48ka Jesusi arhispti:
–Judasï, ¿Putinharhikua ma jimpok'uri intsïnharhitpexaki Acheti Uáp'ani?
49Ima enkaksï Jesusini jinkuni jámani jápka, ísï exerinksï kurhamarhespti:
–Acha, ¿Akuarheauachi?
50Ka ima ma isï k'éri táteri jántspirini ataspti, ma akantani kachup'antikuspti. 51Ka Jesusi uantaspti:
–Jurak'ua je jauatia.
52Ka Jesusi táta urhets'ïkurichani ka k'éri tiósïo kuárichani ka arhits'ïkpirichani enkaksï jupikani niárapka arhiaspti:
–¿Antits'ïsï tiámu atap'etarakua ka chkári anhak'utini juki, enak'ini ampe ji sïpak'urhe? 53Mántani pauani k'éri tiósïo chánksïni jinkuni jámaxaka, ka nóts'ïni méni jupikaska. K'óru i jántu cháristi, enka páp'akanteni jarhak'a.
Pédru Jesusini no míteni uantasti
(Mt 26.57-58,69-75; Mk 14.53-54,66-72; Jn 18.12-18,25-27)
54Jesusinksï jupikaspti ka k'éri tátoksï páspti. Pédru sántku jarhaxapaxapti. 55Jima terunukuaksï kurhikaspti, ka uaxaparhakusptiksï; ka Pédrut'u imechani jinkuni uaxaparhakuspti. 56Enka ísï úkorheni jápka, uarhiti jántspiri ma enka exepka imat'u jurhentani jarhani jatsikueraspti erateni ka uantaspti:
–Ít'u ima jinkuni jámaxapti.
57Ka Pédru no jiókorhespti uantaparini:
–Nana, ji no míteska imani.
58No sáni ióntani, máteru nema exespti ka arhini:
–T'út'uri imechani jinkuni jámsïnka.
Ka Pédru uantaspti:
–Nóchka ampeta, ji no imecha jinkuniska.
59No ióntani, máteru ménteru inchantimentaspti arhini:
–Sési jimpo i imani jinkuni jámaxapti. Ka támu Galilea anapuesti.
60Pédru uantaspti:
–Nóchkanta míteska, t'u ampenti uantak'i.
Enka Pédru nótki k'amarani jápka ísï uantani, t'arhechu ma ueraspti. 61Jimak'ani Acha p'irhikorhespti Pédruni erani, ka Pédru míp'aani eska Acha arhispka: “Iásï t'arhechu nótki uerani jauati enkarini t'u t'uíni tanimu xanhari no míteni uantaakia.” 62Ka Pédru uéntaspti, ka k'amek'amechant'aspti uerani.
Na enkaksï Jesusini teresmarhupka
(Mt 26.67-68; Mk 14.65)
63Ima acheticha enkaksï Jesusini kuáni jápka teresmarhusïremptiksï ka atanksï. 64Jónharhikusïremptiksï ka kurhamarhenksï:
–¿Arhitki nékini ataia?
65Ka nósesi ampeteruksï arhisïrempti.
Jesusi k'éri tánkorhentskuarhu
(Mt 26.59-66; Mk 14.55-64; Jn 18.19-24)
66Enka na erantepkia, judiouecheri arhits'ïkpirichaksï ka tátecheri juramuticha ka juramukua jurhentpirichaksï tánkorhent'aspti, ka Jesusinksï k'éri tánkorhentskuarhu páspti. Jimaksï kurhamarhespti:
67–Arhits'ïni, ¿Jeteru t'úsï Krístue?
Ka ima uantaspti:
–Enkaksïni jo arhiska, nóts'ïni jakak'ucheaka. 68Ka enkaksïni ampe ma kurhamerheska, nóts'ïni úaka mókucheni. 69Enka úka, iásïtki uératini acheti Uáp'a, Diósï uinhapitini t'irek'antani uaxakakutini jauatia.
70Tátsekuaksï iámentuecha kurhamarhespti:
–Jiák'ani, ¿T'u Diósï uáp'eski?
Jesusi arhiaspti:
–Cháts'ï uantaska.
71Ka imaksï uantaspti:
–¿Ampeteruchi úraua uantantstichani? Kurhach'akorheskachia.
လက္ရွိေရြးခ်ယ္ထားမွု
Sáni Lúkasï 22: BI-PURHE
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Biblia en P´urhépecha, Michoacán, México © Sociedad Bíblica de México, A.C.