Sáni Juánu 6
6
Jesusi uánekua t'irerpesti
(Mt 14.13-21; Mk 6.30-44; Lk 9.10-17)
1Tátsekua enka na ísï ampe úkorhepka, Jesusi Galilea anapu japuntarhu niraspti, enka Tiberiasi arhinhak'a, 2Uánekuaksï chúxapaxapti, jimpokaksï exespka eska xáni ampe xarhatempka p'amenchatichani ampakerantaani jámani. 3Ka Jesusi juátarhu karhamaspti ka jima jurhenkorheri jémpecha jinkuni uaxakaspti. 4Judiouecheri k'uínchekua páskueri antamutaxaptia. 5Enka Jesusi eraapka, ka exep'eni enka xáni uáni chúxapanhani jápka, arhispti Felipeni:
–¿Nanichi pía xáni t'irekua enka antankuaka iámentu t'irerpeni?
6Ísku ísï arhispti uékani kurhani Felipe néna arhipirini, jimpoka Jesusi sési mítespkia néna enka jámapirinka, 7Felipe arhispti:
–Témpeni ekuatse jurhiatekua antakata jimpo t'irekua piákata no antankupirinti ka útasï sánhantku intspeparini.
8Andresï, enka Jesusiri jurhenkorheripka, ka enka Simoni Pédrueri erachi jémpepka, arhispti:
9–Tumpi ma ixu jámaxati, enka iúmu (5) echakua tríjueri kurhinta kámani jaka ka tsimani (2) kuruchechani; nénat'uchi antankutaa xántku, uánenhasti.
10Ka tátsekua Jesusi uantaspti:
–Uaxastpe je.
Jima xúxunhantespti; ka achetichaksï iúmu míli isïspti. 11Jesusi p'íkuaspti imani kurhintechani, ka diósmaiamu arhintatini, arhustakuaspti enkaksï xáni uaxantetini jápka; ka kuruchechantu méntkueni íntspeaspti, anhaspti eska xáni anhech'anhapka. 12Ka enkaksï na uiniarhapkia, arhiaspti jurhenkorheri jémpechani:
–Tánantsï je enka xáni pakaraka, eska no sáni tsîncheaka.
13Ka témpeni tsimani tsïkiataksï uinirantaspti, enkaksï iúmu (5) tríjueri kurhinta pakatapka. 14Jimak'ani k'óru ísï exénhatini ampe enka Jesusi xarhatapka, uantanhaspti:
–Ístia sési jimpo ima Diósïri uantari enka parhakpeni jupirinka.
15Ka enka Jesusi exepka eskaksï uinhapetarhu Irecheni pérakuekaxapka, ménteru kéntikukuaspti, ka juátarhu jantiok'u niraspti.
Jesusi itsïrhu parhits'ïkusti
(Mt 14.22-27; Mk 6.45-52)
16Enka na chúrepkia, Jesusiri jurhenkorherichaksï japuntarhu kétsemaspti antamukuerani, 17icharhutarhu máksï jataspti, ka Kafarnaumi nirani jámanksï parhimexaptia. Chúresptia ka Jesusi útasï nótki antankuntaasïrempti. 18Ka japunta ísku úntaspti kánekua nósesi tarhameni jimpoka uinhamu tarhiaxapka. 19Enkaksï na iúmu o kuímu kilometrueni isï xanharapkia, eronukorhesptiksï Jesusini eska antarheraaxapka itsïrhu parhits'ïkuparini, ka chérakorhesptiksï 20K'óru ima arhiaspti:
–¡Ásï che je, jíska!
21Jámastiksï icharhutarhu jatsirakuekani, ka k'óruksï nóteru ióntasptia antamukuentani jima enkaksï niárapirinka.
Kafarnaumiksï niraspti Jesusini jirinhantani
22Pauantekuarhu, enka xáni jiniani parhimetini pakaranhapka, exesptiksï eskaksï jurhenkorhericha ma icharhuta jimpok'u niraspka enka jima jápka, ka eska Jesusi no jataspka imechani jinkuni, ka eskaksï jurhenkorheri jémpechak'usï nípka. 23Ka máteru icharhutechaksï Tiberiasi uératini niáraspti, jima no iauani enka t'irenhapka ka enka Acha urheta diósmaiamu arhintapka. 24Ka enkaksï exepka eskaksï nóteru jima jarhaspkia Jesusi jurhenkorheri jémpecha jinkuni, icharhutecharhu jatanhantaspti ka Kafarnaumiksï niraspti Jesusini jirinhantani.
Imani ampe jimpo ánchekorhe je enka no k'amakurhik'a
25Ka enkaksï na niárapka jiniani parhimetini, xéntasptiksï Jesusini ka kurhamarhesptiksï:
–Jurhentpiri, ¿Na jatiniri jurhaski xúeni janoni?
26Jesusi arhiaspti:
–Jíksïni sési jimpo arhixaka eskats'ïni cha jirinhantaxaka no jimpokats'ï kurhankukia milagruechani sánteru sáni jimpokats'ï niáchant'aska t'ireni. 27Ásï t'irekua jirinhani ánchekorhe je enka ísku k'amakurhik'a, sánteru sáni imani t'irekua jimpo ánchekorhe je enka no k'amakurhik'a ka enkaksïni méntku isï anapu ampakiti tsípekua íntskuk'a. Inteni jásï t'irekuaksïni íntskuati Acha Uáp'a, jimpoka Diósï erakuska enka Tátjempeka.
28Ka imaksï arhispti:
–¿Néna uétarhesïnki eskachi jámaaka Diósïni marhuakuni?
29Jesusi arhiaspti:
–Diósïni marhuakuni imak'uesti eskats'ï jakak'ukuaka imani enka ima axaka.
30Ka ménteruksï kurhamarhespti:
–¿Ampets'ïni ua xarhatacheni, eskaksïni jucha imani exerini jakak'ucheaka? ¿Amperisï úaia? 31Juchari sïrukuechaksï mana t'iresti jimesï enka no nema irekapka, eska karakatarhu na jataka: Auantarhu anapu t'irekua íntsaasti.
32Jesusi arhiaspti:
–Jurhimpitkuksïni aiankuxaka, nóksïni Moisesisï t'irekua auantarhu anapu íntskupti, jucheti Táteksïnisï ampakiti t'irekua auantarhu anapu íntskut'i. 33Jimpoka Diósïri t'irekuasï auantarhu uératini kétsek'a ka parhakpeni ampakiti tsípekua intspeni.
34Imaksï arhispti:
–Tata, méntkisïts'ïni inteni jásï t'irekua íntsku.
35Ka Jesusi arhiaspti:
–Jísïni t'irekueka enka ampakiti tsípekua íntspek'a. Ne enkarini antarhentak'a, nómeni k'arhimaati; ka ne enkarini míntsikak'a, nómeni k'arhichaati. 36Eskaksïni k'óru na arhikia, cháts'ï no jakak'usïnka náuek'its'ïni exekia. 37Imechani enkarini Táte íntsaak'a antarhentasïntits'ïni; ka imechani enkats'ïni antarhentak'a, ji sési eroasïnka. 38Jimpokani ji no juramukorheni antap'enuska, sánteru sáni imani marhuakuxamka enkarini axaka. 39Ka imeri eratsekuesti enkarini axaka, eskani nónemani uék'uaka enkarini ima íntsaaka, sánteru sáni eskani k'amarhuni jámani tsítant'a'uaka. 40Jimpoka Jucheti Táteri eratsekueska, eska ne enkaksï míteaka Diósï Uáp'ani ka mintsikanksï, eskaksï méntku isï anapu ampakiti tsípekua intsïnhaaka; ka eskani ji k'amarhuni jámani tsítant'a'uaka.
41Jimpoksïsï Judiouecha uénapti Jesusini uantatseni, jimpoka uantaspka: “Jíska t'irekua enka auantarhu uératini antap'enuka.” 42Ka uantasptiksï:
–¿Anti no ísï Jesusi Jose uáp'e? Míteskachi amampani ka tátjempani. ¿Néna jimposï uantak'i eska auantarhu úeratini antap'enuska?
43Jesusi arhiaspti:
–Ásteru uantatseni ja je. 44Nónemarini úsïnti jínteni antarherani, enka no Táte antarhetant'a'k'a; ka k'amarhuni jámani ji tsítant'a'aka. 45Diósïri uantaricheri karakatecharhu arhisïnti: Diósï iámentuechani jurhentauati. Ísï jimpo iámentu ima enkaksï kurhach'ak'a Táteni ka enkaksï kurhankuk'a imeri ampe, antarhentasïntits'ïni.
46“No jimpoka nema Táteni exerika; imak'usï exeriti enka imerika. 47Sési jimpoksïni arhixaka, ne enkarini mintsikak'a, méntku isï anapu ampakiti irekua jatsikorhestia. 48Jísïni t'irekueka enka ampakiti tsípekua intspek'a. 49Chári ióntki anapuechaksï mana t'iresti jimesï enka no nema irekaka, ka uarhistiksïa; 50ka ji imani t'irekuasïni uantani jaka enka auantarhu uératini jurhak'a; ne enka imani arhak'a, no uarhisïnti. 51Ji ima tsípiti t'irekueska enka auantarhu uératini antap'enuka; ne enka arhaska inteni t'irekuani, méntku isï ampakiti tsípekua jatsiati. T'irekua enkani ji íntspeaka jucheti kuiripuekuesti. Enkani ji iámentuechani jimpo íntspeaka.”
52Judiouechaksï arhinhaskperani uénaspti:
–¿Nénat'uts'ïni inte interi k'uiripuekuani íntskua?
53Jesusi arhiaspti:
–Sési jimpoksïnisï arhik'a eska enkats'ï Acha Uáp'eri k'uiripuekuani ka iurhirini no arhaska, nóts'ï p'iuaka ampakiti tsípekua. 54Ne enka jucheti k'uiripuekuani ka jucheti iurhirini arhak'a, méntku isï anapu irekua jatsisïnti; ka ji k'amarhuni jámani tsítant'a'aka. 55Jimpoka jucheti k'uiripuekua sési jimpo t'irekueska, ka jimpoka jucheti iurhiri sési jimpo itsïmakueska. 56Ne enka jucheti k'uiripuekuani ka jucheti iurhirini arhak'a, jínteni jinkunisïntia, ka ji imani jinkunisïnka. 57Ísï eskarini Táte enka irekani jaka na jínteni axaka, ji Táteni jimpo irekaxaka; ka ne enkarini p'iuaka, ji irestani jauaka. 58Imani t'irekuanisïni arhik'a enka auantarhu uératini antap'enuka. No manani enkaksï chári ióntki anapuecha aka ka uarhinksï; ne enka arhak'a íni t'irekuani no méni uarhiaati.
59Jesusi íni ampe, Kafarnaumi tánkorhetskuecharhu jurhentpespti.
Méntku isï anapu tsípekueri uantakua
60Uánekua jurhenkorheri jémpechaksï ísï kurharini uantaspti:
–Inteni ampe enka uantak'a kánekua ts'unhapesti kurhankuni; ¿Nét'u kurhankua?
61Jesusi mítetini ampe enkaksï arhintikperani jápka, kurhamarheaspti:
–¿Nósesiksïni pásïni inteni ampe kurhani? 62¿Nénats'ï jámapirini jimak'ani enkats'ï exepirinka Acha Uáp'ani karhanchent'ani jarhani jini niántani enka jápka? 63Espiritusï ampakiti tsípekua íntspet'i; k'uiripuekua nómpema marhuasïnti. Ka inteni ampe enkaksïni arhika espirituesti ka tsípekuesti. 64Jarhaskats'ï k'óru cha máru enkats'ï no jakak'uk'a.
Jimpoka Jesusi uénani jámantki mítetixaptia ne enkaksï no jakak'upirinka ka ne enka imani intsïnharhitpepirinka. 65Ka uantasptiteru:
–Inteni jimpoksïnisï arhik'a eskarini nónema úaka antarherani, enka no Táte jimpoeuaka.
66Jimak'ani uératinksï uánekua jurhegorheri jémpecha kéntikukuspti enkaksï ima jinkuni jámani jápkia, ka nóteruksï chúxapasptia. 67Jesusi jimak'ani témpeni tsimani jurhenkorherichani kurhamarheaspti:
–¿Chát'u ninhech'antaxakiia?
68Simoni Pédru arhispti:
–Tata, ¿Nénkuntuchi niua? T'úrisï méntku isï anapu ampakiti tsípekueri ampe uantak'a. 69Jucha jakak'uskia ka míteskachi eskari t'u Diósïri Úch'akurakateska.
70Jesusi arhiaspti:
¿Anti nóksïni ji chánksïni témpeni tsimani erakuski? Ka náuek'i isï, cha ma isïts'ï nóampakitiska.
71Ísï uantarini, Jesusi Júdasïnisï arhini jápti, Simoni Iskariote uáp'ani, jimpoka Júdasisï intsïnharhitpepirinka, náuek'i imechani jinkunipka.
လက္ရွိေရြးခ်ယ္ထားမွု
Sáni Juánu 6: BI-PURHE
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Biblia en P´urhépecha, Michoacán, México © Sociedad Bíblica de México, A.C.