Sáni Juánu 1
1
I. DIÓSÏ UÁP'A PARHAKPENI ANTAP'ERAXAMPTI. JÁNHASKUA KA AINKPERATA
(1—12)
Uénatarakua
1Uénantki jámani jarhasptia Uantakua, ka Uantakua Diósï jinkuni jarhaspti, ka Uantakua Diósïspti. 2Ima, uénani jámani Diósï jinkuni jarhaspti. 3Iámu ampe ima jimpo kueraanhasti; nómpema no ima kueraasti. 4Tsípekua ima jinkuni jarhaspti, ka tsípekua parhakpeni anapuecheri eramarhantekuesti. 5Ima eramarhantekua páp'akantu t'íntskarasïnti ka páp'akantekua no ústi antani.
6Jurhaspti acheti ma, enka Diósï axaka, enka Juánu arhinhak'a. 7Inte eramarhantekueri ampe jurhasti xarhatani, uantant'a'ni eska jupirinka, ka eska iámentu jakak'unhapirinka imani jimpo enka ima uantempka. 8Juánu no eramarhantekuespti, ima eramarhantekueri ampesï juti xarhatani ka uantant'a'ni. 9Ampakiti eramarhantekua enka iámu parhakpeni anapuechani erak'utak'a, íni parhakpeni antap'eraxamempti.
10Ima enka Uantakueka parhakpeni jarhaspti, ka náuek'i enka parhakpenini ima kueraaka, parhakpeni anapuechaksï no mítent'asti. 11Imeri iretarhu jurhasti ka ima enkaksï imerika nóksï jiókorhesti. 12K'óru, imechani enkaksï jiókorheka ka enkaksï jakakuka, íntsaasti sésekua eskaksï úaka Diósï uáp'eni. 13Ka Diósï uáp'estiksï, no jimpokaksï ísï antap'enuka, ka nít'u jimpoka k'uiripu erakuaska, sánteru sáni, jimpoka Diósï kuerauaska.
14Ima enka Uantakueka parhakpeni anapu úkorhesti ka jucha jinkuni irekaspti. Ka imeri t'íntskuachi xériskia, enka tátjempa íntskuka, jimpoka imak'usï Diósï Uáp'eka, enkamentu k'amak'amasï sésika eska néka ka enka xénhchpirika. 15Juánu uantant'a'spti Jesusiri ampe, uantaparini: “Ínisïni arhimpka enkani uantapka eska ima enkarini chúxapuni jaka sánteru k'éri ampeska jínteni jinkuni, jimpoka ima jínteni jinkuni t'uínispkia.” 16Jimpoka ima xáni jatsïkorheska, auantarhu anapu jatsikorhekuechantsïni kónteasti; 17jimpoka Moisesi íntspeska juramukuani, k'óru, xénhchperakua ka ima ampe enka ísïka Jesukristu xárhatasti. 18Nónema exesti Diósïni, nómeni; Uáp'ats'ïnisï mítetarati, enka Tátjempa jinkuni mák'uentatini jaka, Ima mítetarpesti.
1. Jesusiri xarhatakua ka uantakua: Jakak'ukueri uantantskua
(1.19—3.36)
Juánu Itsï atats'ïkpiri Jesukristueri ampe uantant'a'sti
(Mt 3.11-12; Mk 1.7-8; Lk 3.15-17)
19Enkaksï judiouecheri urherukuticha, tátechani ka lebitechani Jerusaleni uératini axaapka, eskaksï nipirinka Juánuni kurhamarheni ima néspki, 20Juánu k'amak'amasï uantakorhent'aspti.
–No jísïni Krístueka.
21Ménteruksï uéntaspti kurhamarheni:
–¿Ka anti jimak'ani t'u néski? ¿Eliasï Diósïri uantariskiri?
Juánu uantaspti:
–No imeska.
–Jimak'ani, ¿Diósïri uantariskiri enkachi erokani jaka?
Ima uantaspti:
–Nómpe.
22Ka arhisptiksï ménteru:
–¿Néskichkari? Jucha jatsiska aiankuani imani enkats'ïni axaka. ¿Ampets'ïni sáni ua aiankuni chéti ampe?
23Juánu arhiaspti:
–Jíska enkani jimesï uinhachak'a enka nónema irekaka: Achani jurhimpentskakuntsï je, ísï eska Isaiasï Diósïri uantari na uantak'a.
24Ima enkaksï fariseouecha axaapka Juánuni uantaxekuni, 25kurhamarhesptiksï:
–Enkachkari no Krístueka, nít'uri Eliasïni, ka nít'uri Diósïri uantarini, ¿Antirisï itsï atats'ïkpek'i?
26Juánu arhiaspti:
–Ji itsï jimpo itsï atats'ïkpexaka; k'óru cha jinkuni jámaxati ma enkats'ï cha no míteka 27enkarini chúxapuni jaka, enka jínteni jinkuni t'uínipkia, enkani ji no jamperini nitatarheka kuarhachichani kuerantukuani.
28Iámu i ampe Betania úkorhespti, Jordani iurhekuarhu parhikutini, jima enka Juánu itsï atats'ïkpeni jápka.
Jesusi, Diósïri Karichi
29Pauantekuarhu, Juánu exespti Jesusini eska antarheraxapka, ka uantaspti: “¡Exe je, intesï Diósïri Karichiti, enka k'amanharhintskuechani euarhpeantak'a! 30Intenisïni arhimpka enkani uantapka: ‘Ima sánteru k'éri ampesti jínteni jinkuni enkarini chúxapuni jaka, jimpoka ima t'uínispkia jínteni jinkuni. 31Jít'uni no mítespka néspki; k'óruni itsï atats'ïkpepuska, eska ísï jámani Israeli ireta míteaka.’ ”
32Juánu itsï atats'ïkpiri uantasptit'u: “Exeska Espiritu Sántuni kétseni jarhani jipunhini jásï ma, ka inteni antats'ïkuerani. 33Ji nótkini mítesïrempka néspki; ka ima enkarini axaka itsï jimpo itsï atats'ïkpeni, arhistirini: ‘Néni enkari exek'a eska Espiritu antats'ïkueraska imasï Espiritu Sántuni jimpo itsï atats'ïkpet'i.’ 34Ji exeskia ka uantant'a'xaka eska Diósï uáp'eska.” 35Pauantekua, Juánu ménteru jima jarhaspti, máteru tsimani jinkuni, enkaksï márku jámempka. 36Enka erankuerapka Jesusini jimesï nitamani, Juánu uantaspti:
–¡Exe je, inte Diósïri Karichisti!
37Imaksï tsimani enkaksï Juánu jinkuni jámani jápka, kurhach'asptiksï ka chúxapasptiksï Jesusini. 38Jesusi eraparhasti, ka enka exepka eskaksï chúxapaxapka kurhamarheaspti:
–¿Ampets'ï jirinhantasïnki?
Imaksï arhispti:
–Jurhentpiri, ¿Naniri irekaski? 39Jesusi arhiaspti:
–Ju je exeni.
Nirasptiksï, ka exesptiksï nani enka irekapka, ka jimaksï pakaraspti imani jinkuni, jimpoka xatinispkia.
40Ima ma isï Andresïspti, enka Juánuni kurhach'apka, Simoni Pédrueri erachi jémpa. 41Andresï imeri erachi jémpani urheta xéntaspti, Simonini, ka arhispti:
–Xéntaskachia Mesiasini, (enka Krístu, arhikuekak'a.)
42Tátsekua Andresï jima páspti enka Jesusi jápka; ka enka Jesusi exepka, arhispti:
–T'úri Simoniska, Juánu uáp'a, ka iásïri Séfasi arhinhaakia (enka Pédru arhikuekak'a, ka Pédru tsakapu arhikuekasïnti).
Jesusi Felipeni ka Natanelini uantap'aaspti
43Pauantekuarhu, Jesusi eratsespti Galilea isï nirani. Felipeni jima xént'aspti ka arhini:
–Chúxapurini.
44Ima Felipe, Betsaida anapuespti, jima enkat'u Andresï ka Pédru anapuepka. 45Felipe, Natanaelini niraspti jirinhantani, ka arhispti:
–Xéntaskachi imani enka Moisesi juramukuarhu arhik'a, imani enkaksï Diósïri uantarichat'u karaka. Jesusini, Jose uáp'ani, Nasareti anapu.
46Natanaeli uantaspti:
–¿Anti ua Nasareti nema sáni ampakiti ampeni uérani?
Felipe arhispti:
–Ju exekorheni.
47Enka Jesusi exepka eska Natanaeli antarheraxapka, uantaspti:
–Ampakitimentu Israeli uáp'a ma jurhaxati. 48Natanaeli kurhamarhespti:
–¿Nénarini jámani mítespkia?
Jesusi arhispti:
–T'uínkini xéspkia enkakini Felipe nótki jamperi uantap'ani jápka, enkari jígusïrhu jantukutini jápka.
49Nataneli arhispti:
–Jurhentpiri, ¡T'úri Diósï Uáp'eska, t'úri Israeliri Irecheska!
50Jesusi arhispti:
–¿Anti imani jimpok'urini jakak'uchexaki enkakini arhika eskakini jígusïrhu jantukutini exespka? Sánteruri k'éri ampeterurisï exeaka. 51Jesusi uantasptit'u:
–Sési jimpoksïnisï arhini jaka, eskats'ï iásï uératini cha auantani mítakorhetini exeaka, ka Diósïri ánjelichantsï exeauaka enkaksï kétseni ka karhanchent'ani jauaka Acha Uáp'ani antarhentani.
လက္ရွိေရြးခ်ယ္ထားမွု
Sáni Juánu 1: BI-PURHE
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Biblia en P´urhépecha, Michoacán, México © Sociedad Bíblica de México, A.C.