Yakub 5
5
Tepbhellepp mhilong mwopp
1T'o, mhilong mwopp, wu lang kom wu. Wu wall, w'u shwat maab p'ee zheell w'u p'ee taah kaah wuh. 2Long keewu mwopp w'am vub, yakhal zh'ar so looh'lop keewu. 3Zinarya keewu kihh azurfa keewu mwopp lapp'zhelleng. Zhi'leng khimwopp a bii w'u p'ee p'ar tupp'pwoo kaah wuh, yakhal nyi p'ee p'ar so lwaa shoopshik wu kaa wus se. Wu chakk long wu zok lhidyarrang shuk dhighin t'eer mhi kyess khi yill mhize.#Mat 6:19
4Wu klihng kihpee shaghaldhakk khi mwooh mwopp tu'chall bhokk wuh dhangg wu shiih kwatt mwopp seh kihh wall diy kaah wuh. Wall khi mhi dyiip dhebhenn bhokk wuh wull kom Daah Naan W'u Bhall mettweett.#WSW 24:14,15 5Kai, wu sh'in t'ong mhi klihngshangg dhighin yill mhize, harr wu so wu shenn shuk pwetd. Wu m'ang shuk wu kyeer mwakhal-mwakhal tapp puus w'u mwopp p'ee twa wunn diy. 6Hah, wu shandyeell muutt mhi-shigrett mwopp sarr'paad harr wu twa mwopp, baah kihshag kihh rooh mwopp d'aam wunn mee'bii maah!
Gung dhighin zheell
7T'o, wu'wunn em'naa mwopp, wu m'ang gung harr p'ar ji khi Puup mu Jesu. Wu naah gung w'u gumaarr kihh m'ang harr bhokk khinyi putshiin, pihh dhebhenn wu'rett nyi. Kihh tong dhighin gung gongg ji mhi fwan w'u tarr log kihh rooh tarr waapp zag. 8Yet tihh wu'wunn wu g'ung a kihhsheh zag, wu dyarrang bhall-bhall, p'ee ji khi Puup mu Jesu l'ang kuss. 9Em'naa mwopp, tapp wu kihh tong nyakhar shag mou, tapp'baa Naan diy togdyeell wunn. P'ee Gu-togdyeell ni dheeh kihh dharr a kuss pwooluh!
10Em'naa mwopp, yet tihh wu m'ang mhi-wanggshiiy w'u gyet mwopp kadpwoo dhighin shumm Puup mu Naan mwopp dheeh wunn a bii'kattshiiy mhi g'ung dhighin zheell. 11Wu naah, mu kihh le mwooh gyet mwopp g'ung a mhi-rettyit. Wu klihng gung w'u gyet Ayuba sh'in, yakhal wu man bii wu'kyess ni bhi Daah Naan yakhal sh'in nyi. Daah Naan a gu-kaahdhoonn, nyi a gu-naahchikhirr pwetd.#Ayu 1:21, 22; 2:10; KN 103:8
12T'o, em'naa mwopp, bii w'u mett mihhse mwopp weett, bhi tapp wu kihh choorshig mou. Tapp wu kihh choor dhengNaan kooh yill, kooh mee'bii wu'zeh mou. Yet tihh “Ee'h,” keewu dhen “Ee'h,” yakhal “Haiyou” keewu dhen a “Haiyou.” Kihhsheh mou bhi Naan p'ee togdyeell wunn.#Mat 5:34
DhangNaan sh'i pihhzeenn
13T'o, mihh meeh wuh dhighin zheell, bhi dhangNaan. Mihh meeh wuh dhighin rettyit, bhi sh'in koog KwoobNaan. 14Mihh meeh wuh dhighin shw'al bhi peet mwoohnan Ekklesiya tihh mwopp dhangNaan diy kaah niy, mwopp m'um nyi kihh mw'oor dhighin shumm khi Puup mu Jesu.#Mar 6:13 15Bhi dhangNaan w'u mwopp sh'in sh'i pihhzeenn p'ee bham gu'shwal ni, bhi Puup mu Jesu p'ee bar nyi. Mihh deh gwoh ni sh'in a m'ee shigbis, bhi Naan p'ee fwa nyi nyi. 16Pee'mhinyi, bhi wu kihh lapp'iih shigbis keewu shag, yakhal wu kihh dhangNaan p'ee shag tihh wu kad kakhamm diy, dhangNaan khi gu-shigrett kihh bhall yakhal kihh sh'in dhakk pwetd.
17Iliya gyet a laa'gurum w'u kaahtihb kaa wu'munn se zag. Weett kihhsheh bhi dhangNaan bhall-bhall le tapp fwan diy ji mou, bhi baah fwan ji dhighin yill ni p'ee byitt kunn kihh kakharr.#1Das 17:1; 18:1 18Bwoon kihhsheh, bhi waa dhangNaan dyi, bhi phikihtihngg chiit fwan, bhi biikopp tang harr la zhepp dhighin yill ni.#1Das 18:42-45 19Em'naa mwopp, mihh meeh muh pal dhighin pihhzeenn yet arr zeenn, dhangg menguh b'aa ji kihh nyi kih arr, 20bhi yet tihh gwoh ni man le gwooh l'e tihh gu'shigbis shikhir yet arr wu'bis, sh'in a bii w'u p'ee bar seen gu'shigbis ni pwoo muutt, yakhal kihh mak sh'in kaahdhoonn kaah dw'uu shigbis.#Smp 10:2; 1Bit 4:8
လက္ရွိေရြးခ်ယ္ထားမွု
Yakub 5: Chakfem
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
©️2022 Luke Initiative for Scripture Translation