'Olic 75
75
O Misawkitay ko Tapang a Kawas
O 'olic ni Asaf, o ccay no radiw. Mapatorod i kakridan no paradiway. O no <<Caay ko Tatastasen>> a hacong ko saparadiw.
1Kawasaw, mikansiya kami i Tisowanan,
mikansiya kami i Tisowanan.
Mipalosiyang kami to nika tadamaan Iso,
mipasowal kami to kafahka'an a dmak Iso.
2Sowal sa ko Kawas, <<Mapastekto Ako ko pisawkitan a romi'ad,
mo^celay ko pisawkit Ako.
3Ano mangiyangiyangi ko sra ato maro'ay itira a finawlan i,
patanekteken Ako ko paranaan nira.
4Aka pasneng han Ako ko misatakaraway a tamdaw,
aka ka lata'ang han Ako ko tatiihay a tamdaw.
5Aka pisapasnesneng,
aka pisalata'ata'ang kamo han Ako cangra,>> saan.
6Caay ko naniwaliay, caay ko nani^tipay,
caay ko nani'amisay,
caay ko nanitimolay a tayni ko misawkitay,
7deng o Kawas ko pakasawkitay,
sreren Ningra kona tamdaw, pacakaten Ningra kora tamdaw.
8Mitatoy ko Tapang to takid,
matomes to kter Ningra a ci'icelay a ^pah konini a takid.
Taktaken Ningra konini a ^pah i,
tayra a komaen ko tatiihay a tamdaw a ma^min,
tangasa i ka^minan no saikoray a tra' noya ^pah.
9Nikawrira, o mamida'oc kako a palosiyang to Kawas ni Yakop,
caay ko mamitolas kako a pahmek a romadiw i Cingraan.
10O papalasawaden Ningra ko 'icel no tatiihay a tamdaw,
Nikawrira, o tatongalen Ningra ko 'icel no mo^celay a tamdaw.
လက္ရွိေရြးခ်ယ္ထားမွု
'Olic 75: AMIS2019
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© The Bible Society in Taiwan, 2019