Izaiya 63
63
Nyingaleliwa wa uva
1<<Kodi ula bani unaza akumelaga sidadi ya Bozira, ilambo ya Edomu, agawarile jowara jofila, jijerimelaga eto unawenda na kopolo daye dindimuwa?>> <<Gu miyo Yehova nnawonga mwa ibaribari, eto dihikana kopolo dovulusa.>> 2<<Nnga mwasiwa gwa nni kapa yawo kala yofila eto jowara jawo kalaga nnga maliba nyingalela uva nimburo nonyingalela uva?>> 3<<Mwasiwa miyo dagali Yehova, miyo meka gunyingalenle uva nimburo nnanyingaleliwa uva, muwari mwa atu a vilambo datene, kalivo nne mutu mmohi azile dikamiheda. Miyo dohonyingalela mwa uwali waga eto dohomala tchila muwari motakaleliwa waga. Mwa enne sangiri niwa nohoroma wazeyela jowara jaga eto dohomala dugudeliha kapa yaga. 4Mwasiwa siku noweliha kunyakunya nohodifiyela eto yohofiya yaka yoawombola atwaga. 5Miyo dohoing'ana, mbwenye daonne ira kalivo afuna dikamiheda. Eto dagaonne ira kalivo nne mutu mmohi odikamiheda, kadaziveliwile. Na mwasa wenno muwono waga ohozana vulusa eto uwali waga undimuwa wohodivaha kopolo dindimuwa. 6Evale miyo dohanyingalela atu a mwilamboni muwari mwa uwali waga, dohalrezelriha muwari motakaleliwa waga undimuwa eto dohokutulela sangiri newa vati.>>
AIzarayeli kohomurungunuwela Mulugu wewa
7Miyo nnowonga upama watene wa Yehova, nnomutetela zela japama jinaira liye. Nnowonga mokwakwanela na jatene jejo Yehova unanivaha liye vamohi na upama undimuwa unaoniha liye nlogo na Izarayeli. Nnowonga zela tangaranga datene daairele liye eto nnowonga mokwakwanela no indjiva wa upama watene unna liye. 8Tchoira Yehova ohowonga ira: <<Na ibaribari aliwa ba atwaga eto ba ahima kahanaza dinyenga.>> Mwa eno, liye kala Nvulusi wewa. 9Na mwasa ozuzumihiwa watene wanna atwaye, na liyene ohokana zuzuma undimuwa. Evale liye ohomuruma mungelro waye ira adowe aavunele. Muwari moaziveliwa eto muwari mwa tangaranga daye, ohawombola. Evale ohatukula, liye roma asogolrelraga malambo matene kavirile. 10Mbwenye aliwa tchamuvwelenle eto kohomukumbanyiha Munemba waye Otchena. Na mwasa wenno, liye ohofiyeda kala mwidani wewa eto liyene mwinnya ohorungunuwa, roma wana na aliwa. 11Mwa enne atwale kohoumbuwela zela malambo a mundulri, zela Mozeji vamohi na atu a tempu yaye, keraga: <<Kodi Yehova uli uvi, wenne aalambutchile atwaye Bara Yofila vamohi na anamakumbuza a mabilaye? Uli uvi Yehova wenne awandile hela Munemba Otchena waye muwari mwa aliwa? 12Uli uvi wenne ahela muwono waye wa kopolo ndanda nodjana na Mozeji, atwaga ndila vari va bara vasogolro vewa, avweyihaga nzina naye malambo a mukalakala? 13Uli uvi wenne aasogolrelra atwaye muwari mwa mahindje odihetchetcha, fiyeda aliwa hagwagwaduwa, nnga jinaira kavalo yawendaga mwapama? 14Munemba wa Yehova ohavaha vuma nnga mwanainyama afiya mudaboni.>> Ayo ali makalelo mwaasogolrelre nyo atwinyu ira nzina nenyu nivweye, nititimihiwe.
Yolobela ira Mulugu awelele kala na aIzarayeli
15Yehova kaing'anani kumela zulu, muing'ane kumela wewo uli nimburo nenyu notchena eto notitimihiwa, wewo munakala nyo. Yehova kodi sandje mwanna nyo ile vamohi na jolaba ja kopolo jairetcha nyo jili uvi? Peno zivela wenyu na tangaranga denyu jili olapela wene na miyo. 16Mbwenye nyo muli Babihu, masiki Abarahamu ahaniiziwileve eto Izarayeli ahanionileve.#63:16 Mbwenye nyo muli Babihu, masiki Abarahamu ahaniiziwileve eto Izarayeli ahanionileve. Ku wonga agali aIzarayeli tchaiziweyile na makolwiwa anno kasakanyile yopangana na Mulugu, aliwa mbwenye kohoiziweya na Mulugu eto aliwa kamuona Mulugu makuona nnga Babiwa. Nyo so Yehova muli Babihu. Nzina nenyu nnafwanyeya nagali Namawombola wehu romanave wanle. 17Yehova kodi mwasiwa gwa nni nyo nipupurutchelaga olapela wene na ndila dinyu eto nyo nivandihaga mirima dehu ira nahauovegeni? Welani Yehova na mwasa oaziveliwa anamalaba enyu eto na mwasa oaziveliwa malogo anno anafwanyeya kagali yowatchela yenyu!#63:17 malogo anno anafwanyeya kagali yowatchela yenyu anawongiwa va ba malogo kumi na menli a aIzarayeli. 18Hiyo atwinyu otchenihiwa nohobabiha kala annya a Nyumba yenyu mwa tempu ya vang'ono. Mbwenye peno amwidanihu ananyingalela Nimburo nenyu Notchena. 19Peno hiyo nihisanduwa, nnakala nnga atu anno kali kahanababihege sogolrelriwa na nyo eto nnga atu anno kali kahanababihege itaniwa na nzina nenyu.
လက္ရွိေရြးခ်ယ္ထားမွု
Izaiya 63: iLolo
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2018 Visão Integral