Izaiya 62
62
Undimuwa unafuna kana sidadi ya Jeruzalemu sogolro
1Na mwasa oira dihiiziveliwa sidadi ya Siyawu, miyo kannamiyala eto na mwasa oira dihikana zivela zela Jeruzalemu, miyo kannagarati wene, fiyeda wongowa ukumelele Jeruzalemu nnga wareya eto vulusa umoneyele sidadi ya Jeruzalemu nnga mwendje ohinda. 2Atu a vilambo datene anoza kaone wongowa unafuna we kana eto amwene atene anoza kaone undimuwa wawo. Weyo unoza uitaniwege na nzina nixa neno Yehova nnafuna liye uvaha. 3Weyo unoza ukale nnga tchapowa wa undimuwa mmandani mwa Yehova eto unoza ukale nnga mwana tchapowa wa umwene mmandani mwa Mulugu wawo. 4Weyo kuza uitaniwaga akoka <<Sidadi Yonyanyaliwa>> eto nne ilambo yawo kiza iitaniwaga <<Ilambo Yotolotchiwa.>> Mbwenye unaza uitaniwege Efiziba [ku wonga Oziveliwiwa] eto ilambo yawo inaitaniwege Bewula [ku wonga Muhiyanaga], mwasiwa Yehova uhuuziveliwa eto Yehova unoza atele ilambo yawo.#62:4 Yehova unoza atele ilambo yawo. Ku wonga ira ilambo ya Jeruzalemu inafwanyeya yagali ilambo yenno Yehova unafuna liye iziveliwa nnga mulombwana unamuziveliwa liye muhiyanaye. 5Atu anakala muwari mwa weyo Jeruzalemu yofuna yewa inokalave weyo nofuna umohive unakana muzombwe amutelaga namwali.#62:5 yofuna yewa inokalave weyo nofuna umohive unakana muzombwe amutelaga namwali: MaBibiliya amohiwa anawonga Ahimawo a anapongwe anoza kautele nnga muzombwe amutelaga namwali. Eto Mulugu wawo unoza akayena hagalala na weyo nnga hagalala unakana muteli na namateliwa.
6Kaing'ana weyo Jeruzalemu. Muru wa sidadi yawo miyo dihimala ahelamo anamaing'anela. Aliwa kinamiyala malambo matene, ntana na mahiyu, kaulobelelagani. Nyo atene munavepa na nzina na Yehova, kamumiyale, 7eto kavikale tempu yahanavwa Yehova yovepa yenyu fiyeda Yehova amuvenyihede Jeruzalemu akoka eto fiyeda asakanye ira akale oteteliwa mwilamboni. 8Yehova uhuwonga ira: <<Muwari mwa ndanda naga nodjana na muwono waga wa kopolo, miyo nnolumbela ira kadiza ditukula akoka jodja jawo daavahaga amwidanawo. Eto nne atu amohiwene kiza kang'wa vinyu wawo, wenno umuzuzumele we valukulu. 9Mbwenye nyo munahanda jodja muli amohive munafuna dja jodja jile amala munerege mutamalela Yehova. Eto uva unafuna nyo hatcha, munerege sakanyana vinyu, nyo ng'waga vatando va Nyumba yaga.>>
10Kavirani, kavirani mmamilangoni. Kasakanyani ndila ira atu kaviremo. Kasakanyedani, kasakanyedani marampa. Mukumihemo mabwe matene eto muvenyihe bandera ira atu atene kaiziwe vovira vuwa. 11Kaing'anani, Yehova uhuvweyiha fiyeda magomelo wa ilambo yatene eraga: <<Mudowe mwamuwandele namwali mwana wa Siyawu, muire: <Kaing'ana, Nvulusi wawo unaza. Unaza aganna jitambilrile liye vamohi na jiganyalrile liye zela mabasa alabile liye.> >> 12Aliwa anoza kaitaniwege Atu Otchenihiwa, Atu Owomboliwa a Yehova. Eto weyo Jeruzalemu unoza uitaniwege Ofuneyetchetcha, Sidadi Yohonyanyaliwa na Mulugu.
လက္ရွိေရြးခ်ယ္ထားမွု
Izaiya 62: iLolo
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2018 Visão Integral