Izaiya 57
57
Mulandu wa ale anahara vikwamutu josema
1Atu apama anakwa eto kalivo unaabalra. Atu omuriheda Mulugu anadowa eto kalivo unaiziwa ira atu apama anadowa ira ubure wafiya, wahaafwanye. 2Ale anawenda na upama, kakwa anavolowa mmurendeleni eto anavuma vuma wa ukwa. 3Mbwenye nyo ahima a aliba wonga ja mitalre na nyo ahima a aliba raruwa, na ahima okuma uputani mususede uno ira mutongiwe. 4Munawanda avi muteya Yehova no mpeta no wonga mazu abure zela liye? Nyo ahima otega, vamohi na owonga jonama nyo! 5Munararuwa muwari motamalela vikwamutu josema vati va mutengo wa karvaliyo vamohi na mutchindo mwa mutengo uli watene okana matakuru gubugubu. Munaapela amilugu ale ahiminyu nnga mikuto mmadaboni vamohi na mmapawoni mwa mabwe. 6Munatukula mabwe opelrepeteya a munkolopani, nyo tamalelaga nnga amilugu. Munavelela jovelela ja jong'wa na jodja wa mabwe anno. Kodi miyo nnoziveliwa na jejo? 7Nyo munohela kama yenyu mwango olapa na ogwela bure ira muraruwegevo. Nyo munodowa gwelaga wewo ira mwavelelege mikuto. 8Eto muwari mwa nyumba yenyu muhumala imetchamo jofwalrafwaniha ja amilugu enyu, nyo roma raruwaga na vikwamutu josema jile muwari mojitamalela, hiya ditamalela miyo. Munopangana wandana na vikwamutu josema, nyo hagalalaga na kama yewa, nyo ing'anaga umandave wewa.
9Nyo mohotukula makura na jonukela pama, dowa velela wa mulugu wenyu Moloki. Mohowanda aruma atwinyu ira kadowege olapela wene kaavende amilugu. Eto ahakale muwandaga, mwerege dowa masiki Nimburo na Anokwa ira muwande afwanya amilugu amohiwa ira mwaatamalelege. 10Muwari mwa ulrendo olapa mwawendile nyo, mohofiyeda waheya. Mbwenye masiki mwagawaheyileve, kamwawongile ira: <<Nnawendela vasayi.>> Mwerave vilimbiheda mofuna ira mufwanye yenno yavenda nyo. Kamwawaheyile.
11Kodi mwasiwa gwa nni nyo ovaga vikwamutu josema jile, fiyeda rendjeyana, fiyeda hawendaga na miyo mwa ibaribari, nyo hadiumbuwelaga, hadibalraga? Kodi muhiyile diova miyo vano na mwasa oira dihimala tempu ilukulu dagali omiyalene? 12Miyo nnoza divweyihe jolaba jenyu jejo jinaona nyo nnga japama. Mbwenye inafwanela muiziwe ira kajinaupindulrani yengo. 13Mwakuwa ira mukamihediwe, inafwanela muiziwe ira amilugu enyu kinawanda ukamihedani. Tchoira nipevo nnomala aveverutchela amilugu enyu ayo olapela wene. Mwelra waga unoadimeliha. Mbwenye ale anatawela mwa miyo, anoza kawatchele ilambo yokalamo eto anoza kavahiwe mwango waga otchena.
Mulugu unawenda na atu oviyeviha
14Anoza kavweye mazu owonga ira: <<Kamangani, kamangani! Kasakanyani rampa! Mukumihemo magodo matene ira atwaga kaviremo pama.>> 15Tchoira wenno uli vazulu va atene eto wenno uli otukuleleya, wenno uliwo tempu datene, wenno unna nzina na Otchena unawonga ira: <<Miyo nnakala nimburo na zulu eto nagali notchena. Mbwenye eto miyo nnokala vamohi na mutu wenno unatwaruwa eto unaviyeviha. Nnomulimbiha wenno uli oviyeviha eto nnoalimbiha murima aliba twaruwa. 16Miyo kadiza dikangana na aliwa kala no kala. Eto nne kadiza ditakaleliwa zela aliwa tempu datene, tawiha ira daira eno, atu ovuma daapandutchile miyo anamale kwamo. 17Miyo dohatakaleliwa na mwasa wa jotega jaira atu kavendaga jorayela muwari mwa makalelo abure, fiyeda miyo atonga. Dohokumihawo kove yaga wa aliwa muwari motakaleliwa. Mbwenye masiki eno aliwa kohodowave sogolro kairaganave jotakala jafuna atu mmirimani mwewa. 18Dihiona makalelo kaira atu mbwenye nnoza daavulumutche. Nnoza daasogolrelre, daadidilihaga mirima aliwa vamohi na afwiwa ananla 19ira kakale atu oditamalela miyo. Nnoza daavahe murendele ale anakala olapela vamohi na ale anakala vakwikwive eto nnoza daavulumutche. Unawonga gu Yehova.>>
20Mbwenye atu otakala anakala ozuzumene nnga bara yotekenyeya mwa uwali, yahanawanda miyaliheya. Mahindje omanganyeya anovoka madogo na teya. 21Mulugu waga unawonga ira: <<Kavali murendele para atu abure.>>
လက္ရွိေရြးခ်ယ္ထားမွု
Izaiya 57: iLolo
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2018 Visão Integral