Izaiya 22
22
Mulugu unoza aanonge akuda Jeruzalemu
1Ula gu muselu owonga zela ndabo na Joonihiwa. Kodi iireyile nni ira nyo mwatene mugwele vazulu va nyumba denyu?#22:1 vazulu va nyumba denyu: Malambo a mundulrimu atu komangetcha nyumba dokana nimburo eni notandeleya nakala vazulu va nyumba dile. Ora ya tchiguwo atu keretcha gwela vazulu vale, aliwa walredaga eto vumaga jiwa. Va inakala nnga atu kawalreda vazulu va nyumba diwa agali yali tempu yofwanela nla na mwasa wa atu kapiwe. 2Nyo munakuwakuwa, eto munohagalala. Mwasiwa gwa nni atu musidadi mu iragana madugudugu eto kahagalalaga? Nyo munopiwa mbwenye kamunapiwa na supada, eto kamunapiwa kondoni. 3Asogolrelri enyu katawile kohomala hindiwa kahaponyiwile na mafumo. Nyo mwatene mwagafwanyiwe, muhumala hindiwa masiki mwagatawenle olapela wene.
4Na mwasa wenno miyo dohowonga ira: <<Mukumevo, mudihiye miyo dinle na rayiva. Kamuxixe dididiliha murima zela abalaga kanongeyile. 5Tchoira Nabwiya Yehova wa Makuru Matene gusakannye siku, nagali siku na goyi no nyingaleliwa no balaletchiwa ira nifiye ndabo na Joonihiwa. Miru da sidadi nnomala gudjuliwa, eto atu anodowa kanlelege mwangoni. 6Anyakondo a Elamu kohoza kaganna mmandani mwiwa mafumo kagagwenle aaterelado a kondo eto amohiwa kagagwenle vakavaloni. Eto anyakondo a Kiri kali okozeyene kagatukunle defeza diwa. 7Madabo enyu apama kohomala zala aaterelado a kondo, eto anyakondo kagwenle vakavaloni kohoimela sogolro wa milango da sidadi. 8Yehova umala awaka akuda Juda jatene jaroromela atu ira kavilimbihedegena amwidani kafiyaga.
<<Siku neno nyo akuda Juda mohodowa nyumba ya Guguru,#22:8 nyumba ya Guguru yali nyumba yamangile Salomawu eto yali nyumba mwakoya amwene a Juda fwaramento dowanana kondo. (1 Amwene 7:2, 10:16-17) roromelaga fwaramento da kondo dafwanyeya emule. 9Mohofwanyeya mamburo amohiwa muwari mwa muru wa sidadi kagali ogumuwene. Mohokoya mahindje a ntiya na pedi. 10Nyo mohokontari nyumba datene da mabwe dafwanyeya muwari mwa sidadi ya Jeruzalemu, nyo bwanyula nyumba dimohi diwa, nyo tukula mabwiwa sakanyedena muru ule. 11Nyo muhusakanya eto ntiya na mahindje vari va miru minli ira mukoyemo mahindje a ntiya na wanle. Mbwenye kamuwandile muumbuwela Mulugu wenno airihile jatene eji. Kamwambanlre wenno asakannye jatene eji na wanle. 12Tempu yenno Nabwiya Yehova wa Makuru Matene, ouitanani ira munle, mukumihe misodi, musate mpalra eto muwarege masakwi. 13Mbwenye nyo mwere ziveliwa, nyo hagalalaga, mupaga ng'ombe denyu na mabila enyu, mudjaga nyama eto mung'waga vinyu, mwiraga: <Ndoweni nidjeni, ning'weni mwasiwa metchelo nnokwa.> 14Nabwiya Yehova wa Makuru Matene ohodiwandela adinong'onelaga baruni ira: <Na ibaribari yotega yenno kiza imalihiwe fiyeda ukwa wewa.> Unawonga gu Yehova wa Makuru Matene.>>
Muselu owonga zela mulombwana Sebina na mulombwana Eliyakimu
15Nabwiya Yehova wa Makuru Matene unawonga ira: <<Udowe wa Sebina, musogolrelri wa nyumba ya mwene, wanfuke ira: 16<Kodi wewuno unahindawo nni? Ulimbile avi murima fiyeda timba masiye wewuno, vitimbelaga masiye mwangoni eto semaga movuma mwawo mabweni? 17Kaing'anani, Yehova unoza autatilele unde na kopolo, weyo mutu wa kopolo we. Unoza auhinde pama, 18auzunguze, auponye nnga bola, umorele ilambo yotandeleya. Unokwela wewo eto aaterelado awo apama anahala wewo. Unagomela eno, unyaswihiwe vande va mbwiyawo. 19Yehova unoutamangiha mabasawo eto unoutitiha izo inna we.>
20<<Siku neno nnoza dimuitane namalabaga Eliyakimu mwana Hilikiya, 21dimuwarihe bata ya Sebina eto dimuwarihe sintu naye, dinvahe utongi waye mmandani mwaye. Eliyakimu unoza akale nnga babi wa atu anakala Jeruzalemu vamohi na nlogo natene na Juda. 22Nnoza dinvahe xavi na utongi wa vande va Davi. Aza ahula, kalivo unafuna funga. Eto aza afunga, kalivo unafuna hula. 23Miyo nnoza dimulimbihe pama nnga peregu yokapatchihavo jengo ikomeliwe pama. Atu atene a muibalini mwa babaye anerege rihediwa na mwasa waye. 24Anoza katomeye va liye undimuwa watene wa ibali ya babaye na ahimaye na azuliye. Anoza kakale nnga mitolro domunyemela liye nnga fwaramento nnatomeya atu vapereguni. 25Siku neno peregu yolimba ile inoza igedegedeye, igwadiwe, imore. Nomala eno, jatene japama jatomeyiwe vapereguni vale jinoza jimorevo. Mwasiwa unawonga gu miyo Yehova.>>
လက္ရွိေရြးခ်ယ္ထားမွု
Izaiya 22: iLolo
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2018 Visão Integral