Izaiya 21
21
Gwihiwa wa Babiloniya
1Ula gu muselu owonga zela kokola inakala pandi ya bara. Udilu unakuma ilambo yorendjetcha, nnga nalripembezu wenno unakumetcha kokola inakala pandi ya suli. 2Miyo dihionihiwa jengo jowopiha. Maliba nyenga unanyenga. Maliba nonga unanonga. Anyakondo a Elamu romani kondo. Nyo anyakondo a Mediya, rindjani sidadiyo. Miyo Nabwiya nnomaliha makatamiho matene azihetcha akuda Babiloniya.
3Na mwasa wa ejo, miyo Izaiya dili okukumuwene, eto dinna upa nnga muhiyana afunaga bala. Miyo dili okungeyene na upa eto kannawanda vwa. Muwari morendjeya miyo kannawanda ona. 4Murima waga unaguguda, dili orendjeyene moova. Miyo dadediha kupa wa nzuwa mbwenye wagazile, ova waga werave simbwa.
5Akuda Babiloniya kohosakanya meza yodjelavo, kohotandela nipawu, anadja, anang'wa. Mbwenye anavwa ira: <<Kavenyani andimuwa nyo. Muhele makura defeza denyu. Kondo ihivenya!>> 6Mwasiwa Nabwiya ohodiwandela ira: <<Mwamuhele mutu oing'anela, awonge jejo jinaonege liye.>> 7Aaona atu kawendaga ambinli ambinli ogwela vakavaloni, nari ogwela vaburuni nari ogwela vakameloni, aing'anege pama pama, eto aing'anetchetche. 8Evale gwarda ohokuwa ira: <<So Nabwiya, miyo ntana watene dili va nyumba yolapa ya gwarda. Mahiyu matene nnokala va nimburo naga noing'anela. 9Dionne atu kazaga kagagwenle kavalo, kawendaga ambinli ambinli.>> Evale ohokala awongile ira: <<Ugwa, Babiloniya ugwa. Jolandaniha ja amilugu aye jagali josemiwa jihimala nyenyeyela vati.>> 10Nyo aIzarayeli afwaga muhumala bubudiwa no vetiwa nnga jodja! Peno dihimala uwandelani muselu uvwile miyo na Yehova wa Makuru Matene, Mulugu wa Izarayeli.
Zela Edomu
11Ula gu muselu owonga zela Edomu. Mutu mmohi wa Seyire unawonga na miyo mokuwa eraga: <<We gwarda, kodi umahiyu wu unamala alini? We gwarda, kodi umahiyu wu unamala alini?>> 12Gwarda unawakula ira: <<Unde unoza utche. Eto unoza udibe akoka. Wafuna fuka akoka, uwele, uze ufuke akoka.>>#21:12 Gwarda unawakula ira: <<Unde unoza utche. Eto unoza udibe akoka.>> Unde watcha ku wonga unoza upama. Unde wadiba ku wonga unoza ubure. Ku wonga ira yokala tempu akuda Edomu kafuna atu ona upama eto yokala tempu yafuna mala upama wanna atu.
Zela Arabiya
13Ula gu muselu owonga zela Arabiya. Nyo makuru owenda a Dedani, na mahiyu munogona guguruni wa Arabiya. 14Mwaavahe mahindje aliba ntona ira kang'we. Nyo atu a Tema, mwaavahe jodja aliba tawa kondo. 15Mwasiwa aliwa katawa masupada, kagali masupada oreyene. Katawa eto maurwa okungiwene, na kondo yowopiha.
16Tchoira Nabwiya udiwandela ira ihanle yaka imohi mohara mwemo nnga munyaganyo munakontaretcha liye yaka daye ira upama watene wa akuda Kedari umale. 17Mwa aliba maurwa a kopolo a akuda Kedari, anafuna hala ba vang'onove bahi mwasiwa unawonga gu Yehova Mulugu wa Izarayeli.
လက္ရွိေရြးခ်ယ္ထားမွု
Izaiya 21: iLolo
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2018 Visão Integral