Maroma 1
1
1Ami Pawulu nduŋu yambala yaYesu Kristu, antambikili niikalikapostolu, aŋambwilili nsaŋu yaNzambi yayiwahi, 2yakaniniyi dehi Nzambi nawatuprofwetu twindi munyikanda yajila; 3yakutena Mwanindi, wavwalikili kumutaŋa waDavidi chakumujimba; 4atenenuwu nawu diyi Mwana kaNzambi naŋovu, mwaya Spiritu wakujila nakusaŋuka kwawafu, yowu Mwanta wetu Yesu Kristu. 5Twatambwili luwi niwupostolu kudi yena, kulonda kwovwahila kukuhwelela mukachi kanyuza yawantu ejima, hansaŋu yejina dindi; 6mumwekala ninenu nawa, enu atambikawu dehi mwikali ambala aYesu Kristu.
7Nidi nakuyisonekela mukanda, enu ejima mudi muRoma akeŋawu kudi Nzambi, atambikawu kwikala akwakujila. Luwi lwikali nanenu nikuwunda kwakufuma kudi Nzambi, Tata yetu, nikudi Mwanta Yesu Kristu.
8Nukusambila kuyileja chinayisakililaŋa wejima wenu kudi Nzambi yami mudi Yesu Kristu, nanochu chikunatiyakani kukuhwelela kwenu mumatuŋa ampata yamunu mwishina ejima. 9Nzambi, inakalakelaŋa naspiritu yami munyidimu yansaŋu yaMwanindi yayiwahi, hichinsahuchami chinabulaŋa kukaŋanya kuyitena mukulomba kwami kwejima. 10Hinukulomba nami, neyi Nzambi neteji akaŋendeshi chachiwahi nakashiki kudenu mafuku anu. 11Muloŋa nakeŋaŋa nankashi kuyimona, kulonda nakayinki chamukunkulu chakudi Spiritu kulonda kuyikolesha. 12Kulonda twakakwashaŋani nakukuhwelela kwetu, nikwenwenu nikwa mami. 13Nochu enu ana kwetu, nakeŋi nami mwiluki chinakeŋaŋa kakavulu kwinza kudenu, kulonda nakamoni nyikabu kudenu, neyi chinamonaŋa mudi ajentili amakwawu acheŋi, ilaŋa ananfuntishumu nihanu. 14Ami nidi namukudi wakushimwina aHeleni, niantu ampata jacheŋi, niakwamaana, niabula maana. 15Dichi ami nakeŋi nankashi, mwashikila Ŋovu jami jejima, kushimwinenu mwashakama muRoma nsaŋu yayiwahi nawa.
16Muloŋa hinatiyaloŋa nsonyi yansaŋu yayiwahuku; diyi Ŋovu yaNzambi yakwamwina nachu antu ejima akukuhwelela, kusambila aYudeya, niaHeleni nawa; 17muloŋa dimu munamwekeni kuloŋa kwaNzambi nakukuhwelela kwakutwala kukukuhwelela; mwomwanasonekuwu nawu, Mukwakuloŋa wakahandila kukwitiya kwakukuhwelela.
18Muloŋa kuzuwa kwaNzambi kunamwekani kwiwulu, kwakuzuwila kasekesha kakusekesha Nzambi kejima, nikuheŋa kwawantu awa alabishaŋa nsaŋu yalala nakuheŋa kwawu. 19Muloŋa yuma yaNzambi yinatwesheki kwilukewa, yamwekana dehi mukachi kawu, muloŋa yomweni Nzambi nayimwekeshi kudi wena. 20Kufumisha haleŋeluwu mpata yamunu mwishina, yuma yindi yakadi kumonewa yalumbulukila, muloŋa ayilukaŋa nayuma yaleŋeliyi, joju Ŋovu jindi jahaya nyaka niwuNzambi windi; kulonda abuli mwakuleyela. 21Muloŋa chamwilukiluwu Nzambi, hiyamulemesheli nawu diyi Nzambuku, hela kumusakilila hiya musakilililuku, ilaŋa abalumukili kwikala antu akuhemesha muyitoŋojoka yawu; munyichima yawu mwadiŋi mwakadi maana himukwikala mwidima. 22Hiyakudishimuna nawu tukweti maana, komana anabalumuki dehi ayisupi. 23Kulema kwaNzambi wakatokaŋa hiyakukubalu muna nakulumbisha mukishi wamuntu watokaŋa, hela wakajila, hela wakanyama, hela wachuma chakayilaŋa.
24Dichi Nzambi wayilekeli kwindi, akoŋaŋa mwafwilaŋa nyichima yawu yazonda, nakudisawula nyijimba yawu awenawu wumu namukwawu. 25Muloŋa himpili nsaŋu yaNzambi yalala nansaŋu yakutwamba, hiyakudifukula kuyuma yaleŋeluwu kudi Nzambi nakuyikalakela, hiyakuleka Nleŋi wakisulewa haya nyaka.
26Dihu hafumini kuyileka kudi Nzambi akoŋaŋa mwafwilaŋawu mwatama; muloŋamba ndawu aweni hiyakushiya mwayileŋeleluwu nakwila yuma yabulili kuyileŋelawu. 27Amayala nawa hiyakushiya mwamuleŋeleluwu mumbanda, hiyakusweja lwisu lwakuditamisha nawakwawu amayala, hiyakuta mbwilamu wufwetu watelela kuluwa kwawu.
28Chalekeluwu kwikala nama ana akwiluka Nzambi, Nzambi hakuyileka ekali kwawu nayitoŋojoka yatama, akoŋaŋa yuma yakadi kutela. 29Hiyakusweja kukoŋa yuma yaheŋa yejima, nikutama, nilwisu, ninkunyi. Hiyakusweja ichima, niwubanji, nikuzuŋa, nimakasu, nimuchima wakujinda akwawu. 30Hiyakwakushawula, akwakutuŋula akwawu; ahelewa kudi Nzambi. Hiyakwachibeŋu, akwakudinka wanta, akwakuha mukanwa, akwakubuza yaaku yayiha yatama yeŋi nayeŋi, akwákubula kwovwahila anvwali jawu. 31Abula kashinshi, hiyakakelaŋa muyatiyaloŋana nawakwawuku, hiyakeŋaŋanaŋa mwasemwakenawuku, akadi luwi. 32Wenawa, hela eluka dehi nawu Nzambi nahoshi nindi antu ejima akoŋaŋa yumiyi anateli kufwa, hiyakuminaŋa dakuyila hohuku, atiyaloŋa kuwaha nanawa ayikoŋaŋa nawa.
လက္ရွိေရြးခ်ယ္ထားမွု
Maroma 1: MW62
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The Bible in Lunda: Ndembu (Lunda of Kalunda) © B. F. B. S. 1962.