Likezo 27
27
1Chaneluwu nawu twakayi kuItaliya muwatu, hiyakumuhana Pawulu nawakwakaleya amakwawu kudi senturinu wumu, ijina dindi Yuliyusi, wamuchendu chaAgusitusi. 2Hitukwijila muwatu wakufuma kuAdamitumi, wukukeŋa kunyamuka henohu nakuya munjila yakukulisha Asiya, nakukunkakunka kunyikala yakwenoku. Hitukuya hakaluŋalwiji muwatu owu, tudi naArisitaka, kaMasidoniya wakuTesalonika. 3Chikunachi tudata nikuZidoni. Yuliyusi wamwilili Pawulu chachiwahi, hakumwiteja kuya nakudya nawamabwambu jindi. 4Hitukufuma kwenoku muwatu nakukulisha Kipirosi, muloŋa mpepela jadiŋi nakukeŋa kutufuntisha munyima ho-o. 5Hitukuketula muhoŋi wamukaluŋalwiji, wela Silisiya iku, Pamfwiliya iku; tushika nikuMira wamuLisiya. 6Kwenoku senturinu hakumona watu wakuAlesanderiya wudi nakuya kuItaliya; hakutwiŋijamu. 7Watu wetu hiwukwenda chovu chakukabakana hohu mafuku amavulu, tushika nikwatalaŋana naKinidusi. Chaneliyi mpepela yichidi kukeŋa kutufuntisha munyima, hitukuya nakukulisha Kereta kwatalaŋana naSalimoni. 8Kwenoku twakulishili chakukabakana hohu, tushika nikwatenaŋawu nawu kuMeji Awunda, kwakwihi namukala waLaseya.
9Chimunahiti mafuku amavulu, nikwenda kwela dehi kwafwana, muloŋa mafuku akuleka kudya anahiti dehi, 10Pawulu hakuyikonkomwena nindi, Kuch Enu akwetu, natoŋojoki nami lwendu lwetu lwakekala lwakala, lwakukisaŋana yuma nankashi, hiyikumba yidi muwatu hohuku, hela ninetu aweni kwiji twakafwa tuhu. 11Senturinu wabaŋili chalala mukwakwendesha watu nimwiniwatu, hakwila chahosheliyi Pawulu yena kubaŋamu nehi. 12Muloŋa mwenomu mwawoŋakana mwabulili kuwaha kuchelukilamu noŋa, dichi amavulu hiyakwila nawu tufumi kwenakunu muwatu, tuyi tukabili kushika kuFwenisi, tuchelukili kwenoku. Fwenisi himukala wakuchikumu chakuKereta, kwatala iku kukabeta, iku kumusela, iku nawa kukabeta kakwawu, kwekala kwawoŋakana.
13Chitunamoni mpepela yakukabeta kakuchidiilu hiyikukunka chovu chovu, atoŋojoka nawu anamoni mwakeŋa awu; hiyakufumisha mumeji chikuŋu chakwimikisha nachu watu, hiyakukulisha Kereta kwakwilii nachikumu. 14Ilaŋa chakadi nikuleha, hikukwinza hadi watu mpepela yasweja Ŋovu yakufuma kumusela. 15Chiyinakwati hawatu wetu, hiwukukaŋanya kutala kukwinza mpepela, hitukukumina dakuyovwahila, tuhuŋumuka nikuhuŋumuka tuhu. 16Chitunahiti mumukulishu wakachitutu kanyanya ijina daku Kaluda, hitukukasa kawatu chakukabakana hohu; 17chanakikokuwu kwiwulu hiyakujiŋa watu weneni nanyonji yamaneni nankashi nawu awukoleshi. Chanatiyuwu woma nawu keŋa atunati kuwusekulula kudi machiŋi chiŋi, hiyakulemuna mahina akuwatu, hituleuketula dakuhuŋumuka. 18Chikunachi, tuchidi kukabakana nankashi nanoyu mpepela yasweja, hiyakutachika kunata yuma yamuwatu mumeji. 19Hefuku damu chisatu hiyakunata yuma yakwendesha nachu watu namakasawu aweni. 20Chineli nimutena nitutumbwa kututoŋekela mafuku amavulu nehi, oyu mpepela yeneni yichidi kukunka, chikuhwelela chejima chakwila netu tukuhanda hichikutufuma.
21Chanashakamuwu nanzala mafuku amavulu, Pawulu hakwimana mukachi kawu nindi, Enu akwetu, neyi mwantiyililili, mutenowu mwabulili kufuma kuKereta, mubuli kumona kukabakana kwejimiku, nikujimbesha yuma. 22Ichi dinu nukuyikundeja nami tiyenu kuwaha, hikukufwa mwinenu hela wumuku, chiŋa yowu watu hohu. 23Muloŋa wufuku wowenawunu kaŋelu kaNzambi yami, wanheta nakalakelaŋa nawa, wemana kunidami. 24Hakuŋila nindi, Eyi Pawulu, bayi wutiya womaku; chiŋa wakemani kumesu aKesari hohu. Tiya, Nzambi nakwinki dehi akwenu ejima wudi nakwenda nawu muwatu. 25Dichi dinu enu akwetu, tiyenu kuwaha Muloŋa namukuhweleli Nzambi, neluki chikupu nami mwanahoshiyi mwakamwekana mwejima. 26Hela chochu, akatunatila hachitutu chimu.
27Chikunashiki wufuku wekumi nachiwana, hitukuhuŋumuka niniku niniku mukaluŋalwiji kaAdiriya. Kwiji kwela dehi mukachi kawufuku, akwakwendesha watu hiyakutoŋojoka nawu hiyakuya nakuswila kwakwihi nampata yimu. 28Hiyakweseka mwakunamina meji, hiyakuwana kudi nyonji makumi ayedi. Chihanahiti mpinji yanti hiyakweseka cheŋi, hiyakuwana kudi nyonji ikumi nayitanu. 29Hiyakutiya woma, nawu keŋa atunati hamalola akuchikumu; hiyakuzelumuna yikuŋu yakwimikisha nachu watu yiwana kuntoŋi yakunyima; hiyakulomba nawu kuchi. 30Akwakwendesha watu hiyakukeŋa kutemuka muwatu, anazelumuni dehi kawatu kanyanya mumeji, kulonda adimbani nawu tukukeŋa kuzelumwina yikuŋu yakwimikisha nachu kuntoŋi yakumbidi. 31Dichi Pawulu hakumwila senturinu namashidika nindi, Neyi wenawa ákubula kushala muwatu himukutwesha kuhandaku. 32Mashidika aketula ninyonji yakawatu oku, hikakuholoka.
33Chikwakeŋa eli kucha, Pawulu hakuyilembelela wejima wawu, nindi dyenu. Nindi, Lelu ifuku dekumi nakawana dimunashakami nanzala, kudyahu chuma nehi. 34Dichi nalembi mwani, dyenu muhandi; hikwakajimbala hela lusuki lwamuntu nilumuku. 35Chanahoshiyi ochu, hakutambula dinkendi, hakumusakilila Nzambi, iku wejima wawu amutiyaloŋa; hakudihumuna nakutachika kudya. 36Wejima wawu hiyakutiya kuwaha, hiyakudya niwena nawa. 37Kubomba etu antu ejima twadiŋi muwatu owu, twashika mumakulakaji ayedi namakumi atanu nayedi niantu atanu nawumu. 38Chanekutuwu, hiyakunata tidiku mumeji kulonda kupepesha watu.
39Chikunachi dehi, hiyelukili mpatoyuku. Nawu atali, hiyakushinshika kumu kwawoŋakana, kudi wusekulula kuchi kumu; hiyakutiyaloŋana nawu tukuŋikiluku watu, neyi tunatweshi. 40Chanaketuluwu nyonji yayikuŋu yakwimikisha nachu watu, hiyakuyilekela mumeji; hiyakusubula mapitu adiŋi akwolola nachu watu, hiyakulema ihina dakumbidi kulonda dikwati mpepela, hiyakweseka kuya kuchi kumu. 41Ilaŋa chanashikuwu halunduka wusekulula, watu hiwukukakela hawusekulula; ntoŋi yakumbidi hiyikukakela mbe, ilaŋa ntoŋi yakunyima hiyikutachika kubaluka naŋovu jamankanda. 42Mashidika atiyaloŋana dehi nawu akajahi akwakaleya, nawu akenda kela amakwawu akasala, hiyakapuluka. 43Ilaŋa senturinu wakeŋa eli kumuhandisha Pawulu, dichi hakuyilekesha kwila mwenomu. Hakuyileja nindi, antu ejima anatweshi kusala adumbi mumeji akashikaŋahu dehi kumpata. 44Anabuli kutwesha kusala akwati kumapalanga, hela kuyuma yakuwatu, chaneluwu mwenomu hiyakupuluka chachiwahi, ashika nikuchikumu.
လက္ရွိေရြးခ်ယ္ထားမွု
Likezo 27: MW62
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The Bible in Lunda: Ndembu (Lunda of Kalunda) © B. F. B. S. 1962.