ALƐ̍FƐ̄SUSI 2
2
Bū la ɔpīyaku̍ ga ɔhɔ̄leyī
1I̍chɔ̍lɔ ma̍, ala̍ Ɛchɛkɔcha ko̍ōku̍ wu̍chē yī lɛlā ɔdwɔ̄bi̍ ba̍la wɔbi̍ lɛlā ɔdɔ̄dɛ̄ yī ala̍. 2Olo̍ ɔla̍ā, ala̍ yɛ ē ga la ɔgulɛ̄lā abi̍ yī yɛchɛ nūma̍ ji. Ala̍ ē pɔ̍ɔkɔ yī uhu ɔla̍ā nīi bī wɔhu̍ yī ɛbɛ abɔ̍ɔ la ichō ma̍. Uhu ɔla̍ā bī wɔhu̍ yī āchɛ wa̍a̍ nīi tɔ̍ɔkɔ yī Ɔwɔ ma̍ a̍nɛ. 3La olēchi̍ lēchi̍ ma̍, alɔ wa̍a̍ titi lɛ bāa aa̍ ma̍ je̍. Alɔ ē ya̍ ɔhɔ̄leyī lɔkɔ nīi ɔchɔ̍ɔwɔ yī alɔ chikpo̍ ke̍e̍ ma̍. Lɛlā nīi kwiko la ɔjā nīi ibi̍īyē yī alɔ chikpo̍ ma̍ ba̍la ɔkɔ nīi alɔ gbɛri̍ya̍ ma̍ nīi alɔ ē ya̍ la olo̍ ɔla̍ā a̍nɛ. Bāa āchɛ ehēhī wa̍a̍ ma̍, alɔ titi o̍ ngma̍ nīi Ɔwɔ ē hɛ̍ alɔ lɛpɔ̄ ɔdwɔ̄bi̍ nīi alɔ ē mi̍chi̍ gba̍a̍.
4Lɛha̍ ɔmɔ̍ɔ̄ma̍ yī Ɔwɔ chī mwɛbɛ kpɛ̍ɛji! Ɔhɔtū nīi o̍ lɛ la alɔ ma̍ chī lɔ̄kū gba̍a̍! 5Bū la ɔla̍ā, alɔ ko̍ōku̍ i̍ngɔ̍ɔ nyaa wu̍chē yī wɔbi̍ lɛlā yī alɔ ma̍, Ɔwɔ chōo̍chē de alɔ bī wā la ɔhɔ̄leyī ba̍la Ikra̍yisi. Bū la uhwa ɔnɛ̄ɛhɛhi yī Ɔwɔ nīi ala̍ lɛ ɔhɛ̍ta̍ a̍nɛ. 6Bū la otū ngmo̍tu̍chɛ̄ yī alɔ ba̍la Ikra̍yisi, Ɔwɔ de alɔ hye̍ēyī la okū ba̍la Ikra̍yisi. O̍ ya̍ i̍ngɔ̍ɔ hɛ̄ɛbɛ nīi alɔ ge̍ē deyīrɛ ɛbɛ ē tāa anu̍ abɔ̍ɔ la ichō la ɛbɛ nīi uhu ē bī wɔhu̍ yī ɛbɛ ma̍. 7O̍ ya̍ i̍ngɔ̍ɔ hɛ̄ɛbɛ ge̍ē chabɔ̄ kpɛɛ ē ku yɛ̄grāa ɔha̍lɔha̍ lɔkɔ nīi uhwa ɔnɛ̄ɛhɛhi ɔlɛbɛ̍bi̍ ɔnɔ̄kɔ̄kū yī nū ɔla̍ā hɔ̄ la ɔhɔtū nīi o̍ chabɔ̄ hu̍ alɔ gala abɔ̄ yī Ikra̍yisi Iji̍sɔ̄ɔsi ma̍. 8Wu̍chē oji̍ nɛ, bū la uhwa ɔnɛ̄ɛhɛhi yī Ɔwɔ nīi ala̍ lɛ ɔhɛ̍ta̍ la ɔtū ode che Iji̍sɔ̄ɔsi Ikra̍yisi a̍nɛ. I̍ ɔjɔ̄jā nīi ala̍ ɛlɛjā ya̍ ma̍ - ohu̍ a̍ni̍; Ɔwɔ ya̍ i̍ngɔ̍ɔ kɔ̄kɔ̄ ke̍e̍ de ala̍ a̍nɛ. 9Bū la ɛbɛ ɔla̍ā, ɔjɔ̄jā i̍ hɔ̄ nīi ɔ̄chɔ̄chɛ ge̍ē bī gbogū ni̍. Wu̍chē oji̍ nɛ, i̍ ɔjā nīi ala̍ ɛlɛjā ya̍ ma̍ - ohu̍ a̍ni̍. 10Ɔwɔ ya̍ alɔ a̍nɛ. La ɔtū ngmo̍tu̍chɛ̄ yī alɔ ba̍la Ikra̍yisi Iji̍sɔ̄ɔsi, Ɔwɔ ya̍ alɔ nīi alɔ ge̍ē hɔ̄leyī ē yɛ̍ɛ̄lā ɔnɛ̄ɛhɛhi yɛ̄mɛ̄mɛ̄ nīi anu̍ ɔlɔjā de lā nīi alɔ ge̍ē ya̍ ma̍.
Iju̍u ba̍la ɛchɛkɔcha de pīya āchɛ ūkpo̍he la Ikra̍yisi
11Ala̍ nīi - Ɛchɛkɔcha la ɔmɔ̄ma ma̍, je̍ka aa̍ ala̍ bla lɔkɔ nīi ala̍ lɛ i̍chɔ̍lɔ o̍bū ma̍? Āchɛ yī Iju̍u ē hī ala̍ hīka, “Āchɛ I̍twɔ̍wu̍ Ni̍.” E̍ ē chī hī iyī aa̍ ɛlɛjā ka, “Āchɛ Ɔtwɔ̍wu̍.” Ɔla̍ā chī - lɛlā nīi āchɛ ē ya̍ la akpa̍ yī ibi̍īyē yī wā ji ma̍ nɛ. 12I̍chɔ̍lɔ ɔla̍ā, ala̍ hɔ̄ lɛ̍kɛ̍kɔ̍ ke̍e̍ hī Ikra̍yisi. Ala̍ - o̍dūgbɔnyɛ nɛ. Ala̍ i̍ tū ba̍la āchɛ nīi Ɔwɔ hōhu ma̍ ni̍. Ala̍ i̍ tū la yɛka ɔgwɔ̍ɔ̄gwa̍ ɔla̍ā nīi Ɔwɔ choko̍o yī lɛlā yɛ̄mɛ̄mɛ̄ ba̍la āchɛ yī nū ma̍ ni̍. Ala̍ hɔ̄ amu la yɛchɛ nūma̍ i̍ngɔ̍ɔ ji i̍ lɛ ɔjɔ̄jā odeyīche che ni̍. Ala̍ i̍ chī lɛ Ɔwɔ ni̍. 13U̍ma̍ama nūma̍, wu̍chē yī otū ngmo̍tu̍chɛ̄ ba̍la Ikra̍yisi Iji̍sɔ̄ɔsi, ala̍ nīi - āchɛ ɔgblāa hwɛɛ o̍bū ma̍ chōo̍chē de pīya āchɛ ɔgblāa kurɛkurɛ. Ɔla̍ā ya̍ i̍ngɔ̍ɔ bū la ɔpīyaku̍ nīi Ikra̍yisi ku̍ ma̍. 14Wu̍chē oji̍ nɛ, Ikra̍yisi ɔlɔjā re̍ka ogbodɔ̍dɔ̍ yī alɔ a̍nɛ, bū la onīi o̍ de Iju̍u ba̍la Ɛchɛkɔcha pīya āchɛ ūkpo̍he ma̍. Ikra̍yisi bī ibi̍īyē yī anu̍ ɔlɔjā de ɔga̍ha̍ ɔla̍ā nīi hɛ̍ wā ɛjī nīi e̍ gblāa bāa ɛchɛlɛwu̍ ma̍ gbo tāajɛ. 15O̍ de Lihɔ yī Iju̍u chāajɛ, tū la lɛlā nīi Lihɔ ɔla̍ā ka ɛ̍lɛ ge̍ ya̍ ma̍ ba̍la ɔgulɛ̄lā yī nū wa̍a̍. Ikra̍yisi ya̍ i̍ngɔ̍ɔ hɛ̄ɛbɛ ge̍ē de āchɛ yī Iju̍u ba̍la Ɛchɛkɔcha ē pīya āchɛ ūkpo̍he ē ngmo̍tu̍chɛ̄ ba̍la anu̍ ɔlɔjā. Bū la ɔla̍ā, ɛbɛ ogbodɔ̍dɔ̍ nīi o̍ yɛ ē ya̍ a̍nɛ. 16Bū la ɔpīyaku̍ nīi Ikra̍yisi ku̍ la ɔchi̍ ɔhrɛ̍ɛpa ma̍, anu̍ ɔlɔjā de uji yī ɔ̍nyīnū ɔla̍ā chāajɛ. Bū la ɔpīyaku̍ la ɔchi̍ ɔhrɛ̍ɛpa ɔla̍ā, o̍ de Iju̍u ba̍la Ɛchɛkɔcha ngmo̍tu̍chɛ̄ la ibi̍īyē ūkpo̍he o̍bū ku̍chē la aa̍ wa̍a̍ ge̍ de Ɔwɔ. 17Ikra̍yisi wā ge̍ yɛ ē kā Wɔ̄kā Ɔlwɔnyɛ yī ogbodɔ̍dɔ̍ nūma̍ de āchɛ wa̍a̍. Ala̍ Ɛchɛkɔcha nīi - āchɛ ɔgblāa hwɛɛ hī Ɔwɔ o̍bū ma̍ ba̍la alɔ Iju̍u nīi - āchɛ ɔgblāa kurɛkurɛ bla̍a Ɔwɔ ma̍ nīi o̍ ka de alɔ wa̍a̍ ngmo̍tu̍chɛ̄ a̍nɛ. 18Bū la abɔ̄ yī Ikra̍yisi nīi alɔ wa̍a̍, Iju̍u tūla Ɛchɛkɔcha yɛ la uhu ūkpūkpo̍he ɔla̍ā ga iyɔ̄bū yī Ɔwɔ A̍dā mɛ a̍nɛ.
19Bū la ɛbɛ ɔla̍ā, ala̍ Ɛchɛkɔcha i̍ re̍ka o̍dūgbɔnyɛ kɛ̄ɛ āchɔga gɛ ni̍. U̍ma̍ama ma̍, ala̍ - alipwo̍gra ūkpo̍he ba̍la āchɛ yī Ɔwɔ bɛ̍ɛ̄nɛ̄ nɛ. Ala̍ - alwɔlɛ̍ yī Ɔwɔ bɛ̍ɛ̄nɛ̄ nɛ 20Ala̍ titi e̍ gwo̍ ala̍ ogwo̍ōgwo̍ bāa wɔlɛ̍ ma̍ che la ichō yī u̍tu yī wɔlɛ̍ nīi alɛrɔ̄ yī Ikra̍yisi ba̍la āchɛ ɔkɛrɔ̄ yī Ɔwɔ de tū la ajɛ ma̍. Ikra̍yisi Iji̍sɔ̄ɔsi ɔlɔjā re̍ka achɔ̄ ɔlamu-ɔlamu ɔkwɔ̍lɛ̍ bī a̍nɛ. 21Anu̍ kwɔ̍lɛ̍ ɔla̍ā bī brii ngmo̍tu̍chɛ̄, ya̍ nīi o̍ ge̍ē jɛ̄ de ē pīya u̍nu̍ ɔnɛ̄ɛhɛhi yī Ādā ɔlɔjā a̍nɛ. 22Bū la otū ngmo̍tu̍chɛ̄ ba̍la Ikra̍yisi, e̍ yɛ ē gwo̍ ala̍ ē ngmo̍tu̍chɛ̄ ba̍la āchɛ ehēhī wa̍a̍ bāa u̍nu̍ ūkpo̍he ma̍. Abɔ̍ɔ nīi Ɔwɔ ge̍ē hɔ̄ gala abɔ̄ yī Uhu Ɔnɛ̄ɛhɛhi yī nū a̍nɛ.
လက္ရွိေရြးခ်ယ္ထားမွု
ALƐ̍FƐ̄SUSI 2: YBASR
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2020 Bible Society of Nigeria (second edition)