Markɩ Sɛbɛ 13
13
A NAAŊMƖN PUOR-YIR KPƐ̃Ɛ WƐLFƲ ƳƐRƖ̃
(Mat 24.1-2, Lu 21.5-6)
1A mɩnɛ a *Jeeju na yi a Naaŋmɩn puor-yir kpɛ̃ɛ pʋɔ cere, a ʋ *par-tuure kãw yel ʋ na:
“Jãjaana, ꞌwuor nyɛ kʋsɩ-vɛlɛ ka tɔr! Fʋ nyɛ ma na yi-vɛlɛ ka tɔr!” 2A Jeeju yel ʋ:
“Má fʋ nyɛ na a yi-bɛrɛ asɩmɛ! Kʋsɩr kãw kɔ̃ lɔɔ tʋɔ dɔɔl ɩraa a ʋ tɔ sʋbɔ juu wa. A na wɛlʼã a jaa.”
A WON ALA NƆƆ TARA
(Mat 24.3-14, Lu 21.7-19)
3A *Jeeju do na jɛ a *Olivi-tɩɩr tãw juu na tor a Naaŋmɩn puor-yir kpɛ̃ɛ, a Pɩɛr nɩ a Jakɩ, nɩ a Jã, nɩ a Ãdire wɩ a bala ba tɛw na sooro ʋ:
4“Yel sɩ a dabor a yele ala nɔɔ tara, nɩ a bom ʋlɔ na miile áa yele ala a jaa maala na baara.” 5A Jeeju nyɔw na ɩ̃ yele ba:
“Nyɩ́ gu nyɩ mɩ̃ɛ a nɩrɛ kɔ̃ wa bɛlɩ̃ nyɩ wa. 6Nɩbɛ yaw jie na de na a ɩ̃ yuor wa nɩ na ba yele a bala ɩ̃ ɩ a *Kirisi, ɩ̃ ba na bɛlɩ̃ na a nɩbɛ yaw pɔw. 7A daar ʋlɔ nyɩ nɔɔ wono a jɛb ƴɛrɩ̃sɩ nɩ a tẽ-nɩdar damfʋ, nyɩ taa wa ɩrɛɛ a dãbɩ̃ɛ nyɔwrɔ nyɩ wa. A sɛw na a na be a lɛ, ɩ̃-cɛ a kɔ̃ ɩ a tẽw baarfʋ daar sɛr wa. 8A-na-ɩ tẽw na nɩbɛ na irʼã jɛbɛ nɩ tẽ-kpee nɩbɛ, ɩ̃ a jamana kãw na irʼã jɛbɛ nɩ jaman-kpee. A tẽw nɔɔ ɓĩine na a ji-bʋrɔ bʋrɔ ɩ̃ a kɔ̃ kpɛ̃ɛ na lo na. Ɩ̃-cɛ a ana yele a jaa na wɔ̃ na taa nɩ a walfʋ na nyɔw a pɔw.
9“Ɩ̃ a nyɩmɩ, nyɩ́ gu nyɩ mɩ̃ɛ. Ba na wa nyɔɔr nyɩ na ƴɔ̃w a ƴɛr-guorbo nuu pʋɔ; ba na fɔbʼɩ̃ nyɩ na nɩ kpaarsɩ a *puorfʋ yie pʋɔ, ɩ̃ na ba bʋɔl nyɩ cenʼɩ̃ a fãgã deme nɩ a jamansɩ jie a maa ɩnɛ, a nyɩ na man ba a nyɩ yel-mɩ̃ɛ ƴɛrɩ̃. 10Ɩ̃ a sɛw na a ƴɛr-son na de nĩe ta a bal bʋrɔ bʋrɔ ba jaa baar. 11A daar ʋlɔ ba na wa nyɔwrɔ nyɩ cere nɩ a ƴɛr-guorbo jie, nyɩ́ taa gɔr waala a ala nyɩ na wa yele wa, ɩ̃-cɛ nyɩ yel a ala a Naaŋmɩn na kʋrɔ nyɩ a be naan, a-na-ɩ aa ɩ a nyɩmɩ mɩ̃ɛ na ƴɛrɛ wa, a Naaŋmɩn Sɩɛ ʋ. 12A yɛbɛ na ma ƴɔ̃w na a ba kú a ʋ yɛbɛ, ɩ̃ a sãa yɔ̃w a ba kú a ʋ bie. A bibiir na irʼã ꞌlaar a ba dɔɔrbɔ ɩ̃ ƴɔ̃w a ba kú ba. 13A nɩbɛ ba jaa na ꞌlaar nyɩ na a maa ɩnɛ, ɩ̃-cɛ a ʋlɔ na tɛrɛ a su-varkpara ɩraa nɩ wa ta nɩ a baarfʋ daar na pɔw na a faafʋ.
A WON KPƐ̃Ɛ DAAR
(Mat 24.15-28, Lu 21.20-24)
14“A lɛdaar ʋlɔ nyɩ na nyɛrɛ a bõ-ciiraa ʋlɔ na sãwna a bom ʋ ɩraa be a jie ʋlɔ ʋ na ma sɛw ʋ be wa, (a ʋlɔ na ꞌwuoro a sɛbɛ na ú bɔ̃w bɔ̃w a par), a bala na be a Jude, bá jɔrɔ duoro a tan jur, 15a ʋlɔ na be a garɩ̃, ʋ taa suure die pʋɔ yele defʋ wa, 16ɩ̃ a ʋlɔ na be a puo pʋɔ, ʋ taa lɩɛbɛ kule kparʋ defʋ wa. 17Won na nyɩrɩ̃ na ta a pɔɔ-pʋʋr deme, nɩ a bala na tɛrɛ a bi-pɩɩlsɩ a lɛdaar. 18Nyɩ́ sʋɔrɔ a Naaŋmɩn a yele ala naa kɔ̃ wa ta a sɩ̃ɛw wa. 19A-na-ɩ a bibie ala na ɩ na a won kpɛ̃ɛ daar. A won bʋrɔ ʋlɔ ma dãa ta sɛr, wa nyɔw nɩ a mɩnɛ a Naaŋmɩn na maal a tẽw, wa ta nɩ a ƴɛ̃ƴɛrɩ̃ wa, ɩ̃ a kɔ̃ɔ lɔɔ ta a lɛ wa. 20A ala ɩ a Nɩ-kpɛ̃ɛ ma dãa ŋmaa a bibie bar wa, nɩrɛ kɔ̃ɔ tʋɔ cɩ̃ɛ wa, ɩ̃-cɛ a bala ʋ na vɛl ir na ʋ sɔ ɩnɛ, ʋ ŋmaa na a bibie ala bar. 21Ala-ɩ̃-sɔ, a ala ɩ̃ ɩ a nɩrɛ wa yel nyɩ na: ‘Nyɩ́ nyɛ! Ka a *Kirisi be!’ mɩɩ ‘Beka ʋ be!’ nyɩ taa wa sɔwrɔ wa. 22A jir-ŋma-Kirisisɩ nɩ a jir-ŋma-ƴɛr-hierbe na irʼã tʋnɔ a nɔ-kofʋ tʋmɔ miile nɩ a ba kpɛ̃w, bʋɔrɔ a ala ɩ̃ ɩ ba tʋɔ na, ba bɛlɩ̃ nɩ a bala a Naaŋmɩn na vɛl ir. 23A ala ɩ̃ ɩ a nyɩmɩ ʋ, nyɩ́ gu nyɩ mɩ̃ɛ; ɩ̃ gɔrʼã man nyɩ a yele ala a jaa nɔɔ tara.
A NƖBƐ BIE WAA
(Mat 24.29-31, Lu 21.25-28)
24“Ɩ̃-cɛ, a daar ʋlɔ pʋɔ, a lɛ a won kpɛ̃ɛ ʋlɔ na tɔl baar, a mɔtɔ̃w na liw na pɔw, a cuu kɔ̃ lɛ caara wa, 25a ŋmarbie na yi na a saꞌlon ɩ̃ pɔrɔ loro a tene, ɩ̃ a fãw ala na be a saa juu na dama na. 26A lɛdaar, ba na nyɛ na a *Nɩbɛ Bie, ʋ be a dɔ̃dɔrɩ̃sɩ pʋɔ, nyɩnyɩlɛ waara nɩ fãgã kpɛ̃w. 27Ɩ̃ ʋ na tʋ na a ʋ sɩ-tʋnɩsɩ a ba kpaarɩ̃ a bala ʋ na vɛl ir a tẽw lõbobo pʋʋr a jaa, nyɔw nɩ a tẽw parɩ̃ wa cen na ta nɩ a tẽw iin.
A FƖGƖ TƖƐ JAANFƲ
(Mat 24.32-35, Lu 21.29-33)
28“Nyɩ́ bɔ̃w a fɩgɩ tɩɛ jaanfʋ par. A lɛ nyɩ na nyɛ ʋ ʋ tɔbɔ a vaꞌwɔlɔ nyɩ ma bɔ̃w ka a susuur daar tara na. 29A lɛ ʋ mɩ, a nyɩmɩ wa nyɛ a yele ala á maala, nyɩ́ bɔ̃w ka a *Nɩbɛ Bie waa daar tara na. 30Yel-mɩ̃ɛ ɩ̃ yele nyɩ, a ƴɛ̃ƴɛrɩ̃ nɩbɛ pʋɔ, ŋmɛɛ kɔ̃ wa kpi wa, wa ta nɩ a ana yele a jaa nɔɔ maala. 31A saꞌlon nɩ a tene na tɔlʼã, ɩ̃-cɛ a ɩ̃ ƴɛrɩ̃ ma be tɔlfʋ jie fɩ̃ɩ wa.
NYƖ GU NYƖ MƖ̃Ɛ, JƲƲRƆ NƖ
(Mat 24.36-44)
32“Nɩrɛ ma bɔ̃w a ʋna bibir nɩ a daar ʋlɔ wa. A saa juu sɩ-tʋnɩsɩ nɩ a *Nɩbɛ Bie ma mɩ bɔ̃w wa, a Sãa tɛw ɩ̃ bɔ̃w. 33Nyɩ́ gu nyɩ mɩ̃ɛ, nyɩ taa wa gure wa! A-na-ɩ nyaa bɔ̃w a dabor a daar ʋlɔ nɔɔ tara wa. 34A na wɔ̃ na taa nɩ daba kãw na bʋɔrɔ ʋ yɔ cen tẽw kãw. Ʋ barʼã a ʋ yele a jaa ƴɔ̃w a ʋ tʋ̃tʋnbɔ nuu pʋɔ, miilʼɩ̃ ba bõ-ƴene-ƴene a ba tʋmɔ, ɩ̃ ƴɔ̃w a dɔ̃dɔr-gure ʋ bɔ̃w jʋʋrɔ, ɩ̃ pãa yi cen. 35Ala-ɩ̃-sɔ nyɩ́ jʋʋrɔ, a-na-ɩ nyaa bɔ̃w a daar ʋlɔ a yir sʋbɔ na waara wa. A ala saarɩ̃ ɩ a jaanʋɔr ʋ, mɩɩ a tẽ-porɩ̃ ʋ, mɩɩ a nɔdɛɛ kuon daar ʋ, mɩɩ a dʋ̃ꞌwʋlɩ̃ ɓaaraa ʋ, 36ʋ taa wa puurĩ nyɩ a gʋ̃ɔ pʋɔ wa. 37A ala ɩ̃ na yele nyɩ, a nɩbɛ ba jaa ɩ̃ yele kʋrɔ, nyɩ́ jʋʋrɔ!”
လက္ရွိေရြးခ်ယ္ထားမွု
Markɩ Sɛbɛ 13: BNT93
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Le Nouveau Testament en langue birifor © Alliance Biblique au Burkina Faso, 1993.
Markɩ Sɛbɛ 13
13
A NAAŊMƖN PUOR-YIR KPƐ̃Ɛ WƐLFƲ ƳƐRƖ̃
(Mat 24.1-2, Lu 21.5-6)
1A mɩnɛ a *Jeeju na yi a Naaŋmɩn puor-yir kpɛ̃ɛ pʋɔ cere, a ʋ *par-tuure kãw yel ʋ na:
“Jãjaana, ꞌwuor nyɛ kʋsɩ-vɛlɛ ka tɔr! Fʋ nyɛ ma na yi-vɛlɛ ka tɔr!” 2A Jeeju yel ʋ:
“Má fʋ nyɛ na a yi-bɛrɛ asɩmɛ! Kʋsɩr kãw kɔ̃ lɔɔ tʋɔ dɔɔl ɩraa a ʋ tɔ sʋbɔ juu wa. A na wɛlʼã a jaa.”
A WON ALA NƆƆ TARA
(Mat 24.3-14, Lu 21.7-19)
3A *Jeeju do na jɛ a *Olivi-tɩɩr tãw juu na tor a Naaŋmɩn puor-yir kpɛ̃ɛ, a Pɩɛr nɩ a Jakɩ, nɩ a Jã, nɩ a Ãdire wɩ a bala ba tɛw na sooro ʋ:
4“Yel sɩ a dabor a yele ala nɔɔ tara, nɩ a bom ʋlɔ na miile áa yele ala a jaa maala na baara.” 5A Jeeju nyɔw na ɩ̃ yele ba:
“Nyɩ́ gu nyɩ mɩ̃ɛ a nɩrɛ kɔ̃ wa bɛlɩ̃ nyɩ wa. 6Nɩbɛ yaw jie na de na a ɩ̃ yuor wa nɩ na ba yele a bala ɩ̃ ɩ a *Kirisi, ɩ̃ ba na bɛlɩ̃ na a nɩbɛ yaw pɔw. 7A daar ʋlɔ nyɩ nɔɔ wono a jɛb ƴɛrɩ̃sɩ nɩ a tẽ-nɩdar damfʋ, nyɩ taa wa ɩrɛɛ a dãbɩ̃ɛ nyɔwrɔ nyɩ wa. A sɛw na a na be a lɛ, ɩ̃-cɛ a kɔ̃ ɩ a tẽw baarfʋ daar sɛr wa. 8A-na-ɩ tẽw na nɩbɛ na irʼã jɛbɛ nɩ tẽ-kpee nɩbɛ, ɩ̃ a jamana kãw na irʼã jɛbɛ nɩ jaman-kpee. A tẽw nɔɔ ɓĩine na a ji-bʋrɔ bʋrɔ ɩ̃ a kɔ̃ kpɛ̃ɛ na lo na. Ɩ̃-cɛ a ana yele a jaa na wɔ̃ na taa nɩ a walfʋ na nyɔw a pɔw.
9“Ɩ̃ a nyɩmɩ, nyɩ́ gu nyɩ mɩ̃ɛ. Ba na wa nyɔɔr nyɩ na ƴɔ̃w a ƴɛr-guorbo nuu pʋɔ; ba na fɔbʼɩ̃ nyɩ na nɩ kpaarsɩ a *puorfʋ yie pʋɔ, ɩ̃ na ba bʋɔl nyɩ cenʼɩ̃ a fãgã deme nɩ a jamansɩ jie a maa ɩnɛ, a nyɩ na man ba a nyɩ yel-mɩ̃ɛ ƴɛrɩ̃. 10Ɩ̃ a sɛw na a ƴɛr-son na de nĩe ta a bal bʋrɔ bʋrɔ ba jaa baar. 11A daar ʋlɔ ba na wa nyɔwrɔ nyɩ cere nɩ a ƴɛr-guorbo jie, nyɩ́ taa gɔr waala a ala nyɩ na wa yele wa, ɩ̃-cɛ nyɩ yel a ala a Naaŋmɩn na kʋrɔ nyɩ a be naan, a-na-ɩ aa ɩ a nyɩmɩ mɩ̃ɛ na ƴɛrɛ wa, a Naaŋmɩn Sɩɛ ʋ. 12A yɛbɛ na ma ƴɔ̃w na a ba kú a ʋ yɛbɛ, ɩ̃ a sãa yɔ̃w a ba kú a ʋ bie. A bibiir na irʼã ꞌlaar a ba dɔɔrbɔ ɩ̃ ƴɔ̃w a ba kú ba. 13A nɩbɛ ba jaa na ꞌlaar nyɩ na a maa ɩnɛ, ɩ̃-cɛ a ʋlɔ na tɛrɛ a su-varkpara ɩraa nɩ wa ta nɩ a baarfʋ daar na pɔw na a faafʋ.
A WON KPƐ̃Ɛ DAAR
(Mat 24.15-28, Lu 21.20-24)
14“A lɛdaar ʋlɔ nyɩ na nyɛrɛ a bõ-ciiraa ʋlɔ na sãwna a bom ʋ ɩraa be a jie ʋlɔ ʋ na ma sɛw ʋ be wa, (a ʋlɔ na ꞌwuoro a sɛbɛ na ú bɔ̃w bɔ̃w a par), a bala na be a Jude, bá jɔrɔ duoro a tan jur, 15a ʋlɔ na be a garɩ̃, ʋ taa suure die pʋɔ yele defʋ wa, 16ɩ̃ a ʋlɔ na be a puo pʋɔ, ʋ taa lɩɛbɛ kule kparʋ defʋ wa. 17Won na nyɩrɩ̃ na ta a pɔɔ-pʋʋr deme, nɩ a bala na tɛrɛ a bi-pɩɩlsɩ a lɛdaar. 18Nyɩ́ sʋɔrɔ a Naaŋmɩn a yele ala naa kɔ̃ wa ta a sɩ̃ɛw wa. 19A-na-ɩ a bibie ala na ɩ na a won kpɛ̃ɛ daar. A won bʋrɔ ʋlɔ ma dãa ta sɛr, wa nyɔw nɩ a mɩnɛ a Naaŋmɩn na maal a tẽw, wa ta nɩ a ƴɛ̃ƴɛrɩ̃ wa, ɩ̃ a kɔ̃ɔ lɔɔ ta a lɛ wa. 20A ala ɩ a Nɩ-kpɛ̃ɛ ma dãa ŋmaa a bibie bar wa, nɩrɛ kɔ̃ɔ tʋɔ cɩ̃ɛ wa, ɩ̃-cɛ a bala ʋ na vɛl ir na ʋ sɔ ɩnɛ, ʋ ŋmaa na a bibie ala bar. 21Ala-ɩ̃-sɔ, a ala ɩ̃ ɩ a nɩrɛ wa yel nyɩ na: ‘Nyɩ́ nyɛ! Ka a *Kirisi be!’ mɩɩ ‘Beka ʋ be!’ nyɩ taa wa sɔwrɔ wa. 22A jir-ŋma-Kirisisɩ nɩ a jir-ŋma-ƴɛr-hierbe na irʼã tʋnɔ a nɔ-kofʋ tʋmɔ miile nɩ a ba kpɛ̃w, bʋɔrɔ a ala ɩ̃ ɩ ba tʋɔ na, ba bɛlɩ̃ nɩ a bala a Naaŋmɩn na vɛl ir. 23A ala ɩ̃ ɩ a nyɩmɩ ʋ, nyɩ́ gu nyɩ mɩ̃ɛ; ɩ̃ gɔrʼã man nyɩ a yele ala a jaa nɔɔ tara.
A NƖBƐ BIE WAA
(Mat 24.29-31, Lu 21.25-28)
24“Ɩ̃-cɛ, a daar ʋlɔ pʋɔ, a lɛ a won kpɛ̃ɛ ʋlɔ na tɔl baar, a mɔtɔ̃w na liw na pɔw, a cuu kɔ̃ lɛ caara wa, 25a ŋmarbie na yi na a saꞌlon ɩ̃ pɔrɔ loro a tene, ɩ̃ a fãw ala na be a saa juu na dama na. 26A lɛdaar, ba na nyɛ na a *Nɩbɛ Bie, ʋ be a dɔ̃dɔrɩ̃sɩ pʋɔ, nyɩnyɩlɛ waara nɩ fãgã kpɛ̃w. 27Ɩ̃ ʋ na tʋ na a ʋ sɩ-tʋnɩsɩ a ba kpaarɩ̃ a bala ʋ na vɛl ir a tẽw lõbobo pʋʋr a jaa, nyɔw nɩ a tẽw parɩ̃ wa cen na ta nɩ a tẽw iin.
A FƖGƖ TƖƐ JAANFƲ
(Mat 24.32-35, Lu 21.29-33)
28“Nyɩ́ bɔ̃w a fɩgɩ tɩɛ jaanfʋ par. A lɛ nyɩ na nyɛ ʋ ʋ tɔbɔ a vaꞌwɔlɔ nyɩ ma bɔ̃w ka a susuur daar tara na. 29A lɛ ʋ mɩ, a nyɩmɩ wa nyɛ a yele ala á maala, nyɩ́ bɔ̃w ka a *Nɩbɛ Bie waa daar tara na. 30Yel-mɩ̃ɛ ɩ̃ yele nyɩ, a ƴɛ̃ƴɛrɩ̃ nɩbɛ pʋɔ, ŋmɛɛ kɔ̃ wa kpi wa, wa ta nɩ a ana yele a jaa nɔɔ maala. 31A saꞌlon nɩ a tene na tɔlʼã, ɩ̃-cɛ a ɩ̃ ƴɛrɩ̃ ma be tɔlfʋ jie fɩ̃ɩ wa.
NYƖ GU NYƖ MƖ̃Ɛ, JƲƲRƆ NƖ
(Mat 24.36-44)
32“Nɩrɛ ma bɔ̃w a ʋna bibir nɩ a daar ʋlɔ wa. A saa juu sɩ-tʋnɩsɩ nɩ a *Nɩbɛ Bie ma mɩ bɔ̃w wa, a Sãa tɛw ɩ̃ bɔ̃w. 33Nyɩ́ gu nyɩ mɩ̃ɛ, nyɩ taa wa gure wa! A-na-ɩ nyaa bɔ̃w a dabor a daar ʋlɔ nɔɔ tara wa. 34A na wɔ̃ na taa nɩ daba kãw na bʋɔrɔ ʋ yɔ cen tẽw kãw. Ʋ barʼã a ʋ yele a jaa ƴɔ̃w a ʋ tʋ̃tʋnbɔ nuu pʋɔ, miilʼɩ̃ ba bõ-ƴene-ƴene a ba tʋmɔ, ɩ̃ ƴɔ̃w a dɔ̃dɔr-gure ʋ bɔ̃w jʋʋrɔ, ɩ̃ pãa yi cen. 35Ala-ɩ̃-sɔ nyɩ́ jʋʋrɔ, a-na-ɩ nyaa bɔ̃w a daar ʋlɔ a yir sʋbɔ na waara wa. A ala saarɩ̃ ɩ a jaanʋɔr ʋ, mɩɩ a tẽ-porɩ̃ ʋ, mɩɩ a nɔdɛɛ kuon daar ʋ, mɩɩ a dʋ̃ꞌwʋlɩ̃ ɓaaraa ʋ, 36ʋ taa wa puurĩ nyɩ a gʋ̃ɔ pʋɔ wa. 37A ala ɩ̃ na yele nyɩ, a nɩbɛ ba jaa ɩ̃ yele kʋrɔ, nyɩ́ jʋʋrɔ!”
လက္ရွိေရြးခ်ယ္ထားမွု
:
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Le Nouveau Testament en langue birifor © Alliance Biblique au Burkina Faso, 1993.