Isaías 9
9
1a 1a (8.23a) Na be'nnen llsakzi ake' bi gak waxhonje.
Garj na wnebia be'nnen llzoa nbaraz
1b 1b (8.23b) Kan batna Diozen bsie'e sdo Galilean, yell-liw ke Zabulón, na ke Neftalí, yell wrill ke be'nn ka' bi nxenlall Dios, latj ni zajzen chla yeo Jordán bllinten llwa nistaw, axha bayullen ben yel baran xhen.
2 2 (1) Yellen bda raw da xchulen
breren to beni xhen,
to benin ba llsenin
ke be'nn ka' ba bzu raw da xchulen.
3 3 (2) Xanto, ba badwao to da llzoa nbaraz kwis,
daxhen kwis nak yel llaweren.
Yoy akte lla' ake' kwiton llawe akre, kan llawe akre keten llak wrapen,
kan llawere be'nn ka' keten yis ake' yel wnia xhen.
4 4 (3) Rwe' ba basraw
yellen raw be'nn ka' llgun le ake' llin da bi llixhj ake' le ake',
dan llsakzin nzoa yiachen,
gan llnebia le aken.
Guken ka gan blleyiw gan nzi Madián.
5 5 (4) Na da ka' llun llakia dan llraj be'nn waka ya ka',
na xharan ake' ka' dup llen'na
chey aken, wzey yi'n le aken.
6 6 (5) Le ba bra to bidao kello,
Diozen ba bene'e to xhi'nnllo,
na ba be'e lebe yelwak nench'na wnebiabe'e.
Na wsi ake' rabe'e:
Be'nn llabanello ka llgoe xneze, Dios nutno gak gun le ga'n,
Xa be'nn zu ke chnare, xhi'nn be'nn wnebia nsa da llzoa nbaraz.
7 7 (6) Kwiabe rawe gan bllia Daviden bnebie'e,
na wnebiabe'e raw doxhente yell-liw
na dan llzoa nbaraz sibian ke chnare,
nutno gak waka yel wnebia keben,
gan wrajben gaken yel korchis na da zaj lixhaj
na'te, na ke chnare.
Dani gun yel nllie llalnin ke Xanllon nap doxhente yel waken.
Yel llruk ke Xanllon konen yel llnebia ke Israelen
8 8 (7) Xanllon ba bsele'e to di'll ke Israelen,
yell ke Jacoben;
9 9 (8) yoyte be'nn yell ke Efraín'na, zajzu Samarian,
ba biejnie akren.
Le aken ne' ake' to yarall kwis, na ke lluntegare:
10 9 (8)
Ba byinj ladriy ka',
axha wayunton de yaj.
Ba bchuy ake' yay yichjo ka' nzi sicómoro,
axha neto' wachaton kone yay cedr ake'.
11 11 (10) Xanllon ba benee nench bed be'nn zban ga zerawze ka' llwieren;
kwinksen ba gulle'e le ake' llajti'l ake'.
12 12 (11) Gan lloj willen, yed be'nn sirios ka',
gan llayo willen, be'nn filisteos ka'.
Choaze bdeb ake' Israelen.
Axha lakse ka', yel llruk ke Xanllon bine' wayak xhenlen,
le'en ne' zajzekse llchebe'e.
13 13 (12) Axha be'nn yell ka' bi babi ake' kwit Diozen, llsakzi le aken;
bi bayirj ake' Xanllon nap doxhente yelwaken.
14 14 (13) Natell Xanllon benee ke gan llnebia Israelen
ke to be'nn llzoy xban na yichj to bayix,
ke to be'nn llzal yay palm ake', na ya xtir ake'.
Doxhente da ki, to tllaze.
15 15 (14) Yichjen zakreben be'nn gur ka', na be'nn ka' llnebia,
na xbanen zakreben be'nn ka' llayixjwe di'll wxhiye ka'.
16 16 (15) Be'nn ka' llnebia raw yellen ba bro ake' le ake' nez yubre,
na be'nn ka' llayirj nuko le ake' nezen ba bnit ake'.
17 17 (16) Kelen'na Xanllon bi bayachralle bi weo ka',
leskakse bi bayachralle bidao wazeb ka', ni nor wazeb ka'.
Le yoyte be'nn yell ka' nak ake' be'nn wxhiye, na be'nn mar ake'
yoy akte llne'e ake' diꞌll kenxhie.
Axha lakse ka yel llruk ke Xanllon bine' wayak xhenlen,
le'en ne' zajzekse llchebe'e.
18 18 (17) Damaren llatach llalanen
ke to ga llde yi', na llzeyen yiech ka', na ga nak lo din
natell llzeyen yay ka' lla' ya' yeon,
na llzalen le aken raw lla radj llen'nan nak ke to be bdon.
19-20 19-20 (18-19 Nike yel llruk ke Xanllon nap doxhente yelwaken
yell xhen'na ba llden yi',
yi' lleyin yellen,
llaw ake' ber ke xhi'nn ake' ka'
na bi llayachrall ake' be'nn bich ake' ka'.
Gani' zu toe to llebnanje, na ne' dunkse,
gana' zu yetoe llawe, na bi llerjre.
21 21 (20) Manasés na lleyie'e Efraín'na, na Efraín'na lleyie'e Manasés na,
na chop akte llajtilren ake' Judán.
Axha lakse ka', yel llruk ke Xanllon bine wayak xhenlen,
le'en ne' zajzekse llchebe'e.
လက္ရွိေရြးခ်ယ္ထားမွု
Isaías 9: ZPUPAT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ