Rroman 7
7
Etalakuaki iyioo taatua nkitanapat
1Lalachera o nkanachera, kore nairorita taata naa lolo ooyielo nkitanapat airorie. Aa miyielolo aajo keitore nkitanapat ltung'ani ewuon eichu? 2Kore ntomononi nataraki lmong'o, naa keichiaakino neyanyit inia kitanapata e lning'o le nkiyema ewuon eichu lpayian lenye, kake kore payie eye lpayian nelakunye te inia kitanapata e nkiyema. 3Inia paa kore teneboitiere ꞉ninye likae lee eichu lpayian lenye, naaku loloito easita, kake teneye lpayian lenye nelakunye ninye te nkitanapata e nkiyema, naa kore teneyem ꞉likae lee naaku mara loloito easita ninye.
4Lalachera o nkanachera, nejia sii itiuu ntae. Kore ta mbata ee nkitanapat, naa ituata eitutumokaki ntae sesen le Kristo, payie eaku merekure irara loo nkitanapat kake itaa le likae, le ilo otipiwua taatua lootuata payie kitum aaiting'ida Nkai. 5Kore apa ewuon eitore iyioo mpukunoto torno e ltung'ani, neinyoyie ꞉nkitanapat ng'uarrat torrok metaasicho taatua rubat ang, aaiu lkiye. 6Kake kore taata ta mbata ee nkitanapat naitaa apa iyioo rrindiki, naa ikituata. Naa kore tankaraki nikituata, naaku ketalakauaki iyioo tee nenia kitanapat payie kitum aaisiaaicho to nkoitiei ng'ejuk e Ltau Sinyati, namara ta napa oitiei musana ee nkitanapat.
Keisupati nkitanapat e Nkai, kake memir ngolon e ng'oki
7 #
Nai 20:17; Nkit 5:21 Ikijuaa naa taata? Ikijo keitorrok nkitanapat? Nakaiting'o! Mikijo nejia! Amu tanamara apa nkitanapat anata duo mayielo ng'oki, naa teneitu apa ejo nkitanapat <<Ming'uar>>, anata duo mayielo ntoki naji lng'uarra. 8Kake kore aimu nkitanapata, neya ꞉ng'oki mpaach, neinyuoyie ng'uarrat pooki taatua nanu, amu kore tenemeatae nkitanapat naaku meata ng'oki ngolon. 9Ketii apa nkata naichu nanu maata nkitanapat, kake kore payie elotu nkitanapata, nepiu ng'oki naye nanu, 10nakurru ajo kore inia kitanapata nayiere naayaki nkichui, ninye naayaka lkiye. 11#Ng'as 3:13Kore amu kewa ꞉ng'oki mpaach aimu nkitanapata, naasap nanu, naar te inia kitanapata. 12Kore tankaraki inia, keisinyat nkitanapat e Nkai, naa kore nkitanapata enye, nera sinyati nesipa nera supat. 13Naaku amaa inia nara supat, kaayaka nanu lkiye? Nakaiting'o, eitu aayaki! Kore ntoki naayaka lkiye naa ng'oki payie elioi ng'oki ajo keitorno pii. Keasicho ninye taatua nanu aimu inia nara supat, neiu lkiye. Kore nkitanapat naa keatae payie eibalunyie nchere keisapuk ntorno e ng'oki katukul.
Larrabal le ng'oki
14Ikiyielo nchere kore nkitanapat naa ne Nkai, kake ltung'ani ake ara nanu, naaitaaki rrindik loo ng'ok. 15#Lga 5:17Mayielo ajo aanyo payie aasita mbaa naasita, amu maas nenia nayieu duo naas, kake nenia baa naiba aasita. 16Naa kore tanaas nenia baa namayieu duo naas, nachamaa ajo keisupati nkitanapat e Nkai. 17Naaku merekure aa nanu oasita, kake ngolon e ng'oki nawuon taatua nanu naasita. 18Amu kayielo ajo meata ntoki supat naatii atua nanu. Kore payie ajoito ana, naa mpukunoto torno e ltung'ani aimakita, amu ketii atua nanu yieuna naasie inia supat kake maidim ataasa. 19Ee, kore inia supat nayieu naas namaas, naaku eji inia torno ake namayieu naas aasita. 20Kore naa tanaas nenia duo namayieu naas, naaku merekure aa nanu oasita kake ngolon e ng'oki nati atua nanu naasita. 21Kadolita naa ana bae naibala, nchere kore ayieu naas supat, naatii ntorno atua. 22Amu kang'idakino nanu taatua ltau lai nkitanapat e Nkai, 23kake kadol nkae golon easicho taatua rubat ainien. Kore inia golon naa nkitanapat ee ng'ok. Kerare ninche nkitanapat naayieu mparrunot ainien neirukurukore, naitaa nanu rridik taabori nenia kitanapat natii rubat ainien. 24Oi nanu ltolut! Ng'ae laalaku te ele sesen lo lkiye? 25Karrinyoki Nkai nache naa ninye koon naas inia aimu Yeso Kristo Laitoriani lang. Naaku kore naa naidipie, kore nanu koon taa mparrunot ainien, naa nkitanapata e Nkai aisiaaita, kake kore te sesen lai naisiaita nkitanapat ee ng'ok.
လက္ရွိေရြးခ်ယ္ထားမွု
Rroman 7: saq
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2021, Bible Translation and Literacy