Asat 2
2
Lotunoto e Ltau Sinyati
1 #
Lal 23:15–21; Nkit 16:9–11 Kore ta mparri nanyeitae ntasim e Pentekost, naa ketii apa looiteng'eni pooki tenebo. 2Kore ake inia kata, nening'oi ltoilo te chumata otuwuana siwuo okutu to ngolon, neiput inia aji pooki natii ninche. 3Neipung'oki ninche ꞉ntokitin naatuwuana lng'ejepa le nkima, newuenie nkue e pooki ng'ae otii inie. 4Neiput ninche pooki ꞉Ltau Sinyati, neng'asu aairo to nkulie nkutukie, ana naidimie ꞉Ltau Sinyati ninche.
5Naa kore apa inia kata, ketii Lyiaudi inie oourie Nkai oaamanya Yerusalem ooing'uaa loreren pooki le nkop. 6Kore payie ening ele turrur ele toilo, neiturrurrunyie, neing'olng'ola tankaraki meata leitu ening nkutuk enche eirorita lolo tung'ana. 7Neing'asia oleng nejo, <<Amaa kulo tung'ana pooki ooirorita, mara loo Lgalilaya? 8Naa aanyo payie kining'ito iyioo ninche meata lemeirorita nkutukie ang? 9Kore iyioo naa ikira le nkutuk ee Lpartian o nee Lmedes o nee Elamaiti, netii loaamanya Mesopotamia o Yudea o Kapadokia o Pontos o Asia, 10o Paragia o Pampilia netii looing'uaa Misiri o mbat e Libia naanyikita lkerenket le Kirene, o lomon ooing'uaa Rrom, aa Lyiaudi o lolo oaataa Lyiaudi. 11Niking'uaa sii nkop e Kirete o Arebia. Nikining'ito sii ninche eiro too nkutukie ang mbaa kutuaa e nking'asia naataasa Nkai.>> 12Neing'asia nelau nejo neipara aajokino, <<Nyo sa eipirita ana?>>
13Kake kore lkulikae, neikordod aajo, <<Merai naitarruoyie kulo nkuechi!>>
Eirorie ꞉Petero lturrur
14Neinyuototo Petero aitache tenebo o lolo kulie kipaareta tomon obo tekue ilo turrur, nejoki lolo tung'ana to ltoilo kitok, <<Lotung'ana kulo loo Lyiaudi o pooki oaamanya Yerusalem, enchooki nkiyiaa inchi matiliki ntae ana, 15medede inia nijeitoto eji kemera kulo tung'ana! Amu kore taata naa saai ake uni e siran. 16Kore naper etiu naa ana, ketejo apa Nkai to loiboni lenye Yoel nchere,
17 #
Yoel 2:28–32
<Kore kenya tee mperot e siedi naa
kaicho ltung'ana pooki, Ltau lai Sinyati.
Kore nkera inchi, layiok o ntoyie, neibonicho,
nedol lewa linchi leleru nduat,
neidetdet lpayiani linchi kutuaa nkidetidetat.
18Naa kore kenya tee nenia perot kaicho Ltau lai Sinyati,
abaki laisiaayiak lainien, lewa o ntomonok,
neibonicho ninche.
19Naa kaitodolu mbaa e nking'asia te nkeper e nkai,
o nkitodolunot naaitodolu nkitoo ai to nkop,
lodo o nkima o mpuro nairrucha.
20Keroku ndama aaku naimin,
neaku lapa lodo,
ewuon eng'or inia parri kenya kitok e nking'asia e Laitoriani.
21Naa kore pooki ng'ae oipotu reto ta
nkarna e Laitoriani, naa keitejeuni.>
22<<Lotung'ana kulo le Isirael, entining kulo omon: Kore apa Yeso le Nasaret, naa ltung'ani oitisipaka ntae ꞉Nkai taa mbaa ee nking'asia o ngolon enye o nkitodolunot naaitodolu nkitoo enye. Ketaasa Nkai kuna pooki taatua ntae ana niyielolo. 23#Mat 27:35; Mrk 15:24; Luka 23:33; Yoa 19:18Kore nataase te ele tung'ani naa inia apake nategelua Nkai te yieunoto enye. Ketipikaki ninye nkaik inchi, ninchocho lolo oreren lamara loo Lyiaudi meteche to lmusalaba near metua. 24#Mat 28:5,6; Mrk 16:6; Luka 24:5Kake neitipiu ꞉Nkai ninye taatua lootuata, neitai taatua mion e lkiye, amu meidimai apake payie eitore ꞉lkiye ninye. 25#SNk 16:8–11Kore apa Daudi, naa inji sii etejo taa mbaa naaipirita ninye:
<Kadolita Laitoriani tekue nanu nkata pooki.
Amu ketii ninye tetene ai payie maaigusugusieki.
26Tankaraki inia keng'ida ltau lai, nearany nkutuk ai te ng'ida kitok,
neata abaki sesen lai siligi,
27amu ming'uaa iyie nkichui ai te nemeneng'a
nimincho Sinyati lino meisamisa.
28Ikintoduaa iyie nkoitiei e nkichui,
naa ikimputaki ng'ida tanadol nkomom ino.>
29<<Lalachera lainien, keichiaakino payie aliki ntae maata lng'ach, mbaa e akuyia lang Daudi. Ketua ninye nenukari, newuon ake etii nkurarei enye ene o taata. 30#SNk 132:11; 2Sam 7:12,13Kera apa ninye loiboni le Nkai, neyielo ajo keitaka ꞉Nkai ninye lmumai le lekutuk nchere, kore lobo le ichoi enye naa kechori lorika le nkitoo enye. 31Ketodua ninye mpiunoto e Kristo ewuon eng'or neimaki ajo, meing'uari taatua nemeneng'a, nemeisamisu sesen lenye. 32Kore ele Yeso naa keitipiwua Nkai ninye, naa ikilimu iyioo pooki sipata e inia. 33Naa kore payie eiliepieki ninye metowuana ta nkaina e tetene e Nkai, neng'amaa ilo Tau Sinyati ta Papa oitayia apa lekutuk ajo keicharu, naa Yeso eing'uaa nenia nidolitata, nining'itoto. 34#SNk 110:1Amu eitu apa eiliep Daudi alo chumata, kake netejo,
<Kore Laitoriani, naa ketiaka Laitoriani lai,
<<Towuana ta mbata ai e tetene,
35ana maitodou lmang'ati linono aitaa lorika loo nkejek inono.>> >
36<<Naa nchoo ltung'ana pooki le Isirael eyielou ana meata lng'ach ajo kore ele Yeso litecho naa keitaa apa Nkai Laitoriani o ilo Aitejeunoni oanyutae.>>
37Kore payie ening ltung'ana ana, nedung'o nkochuaa nejoki Petero o lolo kulie kipaareta, <<Lalachera, kaa kias?>>
38Nejoki ꞉Petero ninche, <<Erriidu nimbelekenyanya, nemeatae lobo linchi lemeipatisi ta nkarna e Yeso Kristo payie epalikini ntae ng'ok, ning'amaa nkichoroto e Ltau Sinyati. 39Amu kore ele lekutuk naa linchi o loo nkera inchi o lolo pooki ooing'uaa nkopi naalakua, o lkulie pooki ooipot ꞉Laitoriani Nkai ang metaa lenyena.>>
40Neitaarriyian ꞉Petero ninche aitarrap too lkulie rerei kumo ajoki, <<Nchoo eitejeu ntae Nkai taatua ana pukunoto torno ee ltung'ana ooimina.>> 41Kore apa lolo pooki oaatang'amaitie ilo kilikuai lenye, neipatisi. Neikenakini inia parri atua lolo tung'ana lolo ooiruko Kristo, matejo ltung'ana nkalupuni uni.
Nchula ee lolo ooiruko ꞉Yeso
42Neibung ninche aitirrichaki nkiteng'ena ee Lkipaareta o nchula ee ltung'ana ooiruko Yeso o ngilata e mukate e ndaa e Laitoriani o nkomono. 43Neiput ngureticho pooki ng'ae, neasai mbaa e nking'asia, neitodolu Nkai nkitoo enye too Lkipaareta.
44 #
Asat 4:32–35
Kore lolo pooki ooiruko Yeso naa ketumo chiaake tenebo, neng'ar ntokitin pooki naata. 45Nemir lchampai lenche o ntokitin enche pooki, neoriki pooki nenia ropiyiani, meata leitu eichori ana naairirikino ninye. 46Kore mperot pooki, nepuonu ninche aatumo tee lning'o taatua nkaji e Nkai. Negil mukate e ndaa e Laitoriani taa nkang'itie enche te ng'ida o taa ltauja supati, 47eisis Nkai netumo omom too ltung'ana pooki. Neponiki Laitoriani mparri pooki lolo ooitejewuaki atua ilo turrur lenche.
လက္ရွိေရြးခ်ယ္ထားမွု
Asat 2: saq
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2021, Bible Translation and Literacy