KHURULA 37
37
Khulombwa khwi Lisanduku li Lilakano
(Khur 25:10-22)
1Bezaleli yalomba Lisanduku li Lilakano khu munyenye; liali nu vuraambi tsisentimita 110, vukalamu tsisentimita 66 nende tsisentimita 66 khutsia ikulu. 2Bezaleli yalikhunikha ni itsahabu inyukhu mukari mwalio khandi ilwanyi walio navekha ni itsahabu khundulu khwalio. 3Yalomba tsingara tsine tsiu khuchinjilakhu khu itsahabu, manatsitiila khu vikuru vine vialio, tsingara tsindi tsivili khuluveka lulala khandi tsingara tsivili khuluveka lundi. 4Bezaleli yalomba misala chiu khulichinga khu musala ku munyenye; nachivekha itsahabu; 5niyinjilitsa misala chienecho mu tsingara tsiali mu tsimbeka tsi Lisanduku li Lilakano. 6Yalomba shindu shiu khukhunishila khu itsahabu inyukhu; shiali nu vuraambi tsisentimita 110 nende vukalamu tsisentimita 66. 7Bezaleli yalomba vindu vivili viasasanga vilombe vi tsimbaha khu itsahabu inyukhu yiraanywa ni inyundu; 8shia shilombe khundulu khwi shindu shiu khukhunishila. Bezaleli yavilomba khu vive shindu shilala ni shindu shiu khukhunishila. 9Vindu viasasanga khuli vilombe vi tsimbaha viaheenzana viene khuviene vushiama khu shindu shiu khukhunishila; ma tsimbaha tsiavio nitsikhunikha shindu shienesho.
Khulombwa Khwi imesa yi Mikati Mitakatifu
(Khur 25:23-30)
10Bezaleli yalomba khandi imesa khu musala ku munyenye; yali nu vuraambi tsisentimita 88, vukalamu tsisentimita 44, nende tsisentimita 66 khutsia ikulu; 11Bezaleli yachikhunikha ni itsahabu inyukhu, manachivekha itsahabu khundulu khwayo. 12Yalomba likulutumu vukalamu tsimilimita 75 khundulu khwayo navekha itsahabu khundulu khwayo. 13Bezaleli yalomba tsingara tsine khu itsahabu tsiu khulichinga, manatsivikha mu tsimbeka tsine, wi vikuru vimesa viali nivili. 14Tsingara tsiatiilanga misala chiu khuchinga imesa tsiavikhwa himbi khu likulutumu. 15Misala chiu khuchinjila imesa, chialombwa khu munyenye khandi ni chikhunikhwa ni itsahabu. 16Bezaleli yalomba khandi vindu viukhuliliilakhu viu khu imesa khu itsahabu inyukhu: tsisahani, vikombe, tsijaka, nende tsibakuli, tsiu khurumishila khuhaana shihanwa shi idivai.
Khulombwa khwi Shikuru shi Itaaha
(Khur 25:31-40)
17Bezaleli yalomba shikuru shi itaaha khu itsahabu inyukhu. Yalomba lwalilu nende mulondi kwashio khurula khu itsahabu yaraanywa ni inyundu; mahwa kasho kali kasiaha, khali masambu nende tsisia tsia mawua, viali shindu shilala ni shikuru shi itaaha.
18Tsisia sita tsiarulila mu tsimbeka tsiosi tsi shikuru shi itaaha, shia luveka lulala lwali ni tsisia tsivaka. 19Shia lusia khu tsisia sita tsienetso, khwalimu na mawua kali nikasiaywa vulahi kasasanga khuli viseevu nende masambu ku musala kwa alumondi. 20Shia shikuru shi itaaha shienesho, khwalikhu ni vikombe vine viasasanga khuli musala ku munasi na masambu nende tsisia tsia mawua. 21Khwali ni lisambu lilala hasi ha shia tsisia tsivaka. 22Masambu nende tsisia viali vutswa shindu shilala ni shikuru shi itaaha kiraanywa ni inyundu khu itsahabu inyukhu. 23Yalomba tsitaaha saba tsi shikuru, khandi nalomba tsindambi tsiatsio nende tsisahani tsiu khwikhalitsakhu tsitaaha khu itsahabu inyukhu. 24Bezaleli yarumishila tsikilo 35 tsi itsahabu inyukhu khulomba shikuru shi itaaha nende vindu viashio viosi.
Khulombwa khu Vwaali vu Khusambilakhu Vubani
(Khur 30:1-5)
25Bezaleli yalomba vwaali vu khusambilakhu vubani khu musala ku munyenye; vuraambi vwavwo vwali tsisentimita 45, vukalamu tsisentimita 45 nende tsisentimita 90 khutsia ikulu; vwaali ni tsimbeka tsindekhanu, misala chiu khusinjilitsakhu khwikulu chiavwo chiali shindu shilala navwo. 26Bezaleli yakhunikha ikulu wavwo, tsimbeka tsiosi tsine, halala ni misala chiu khusinjilitsa khwikulu khwavwo ni itsahabu inyukhu khandi navekha itsahabu khundulu khwavwo. 27Bezaleli yalomba tsingara tsivili khu itsahabu tsiu khuvuchinga manatsitiila hasi hi tsimbeka tsivili tsiavekhwa, khutiila misala chia vachinjilanga vwaali. 28Bezaleli yalomba misala khu musala ku munyenye manachivekha itsahabu.
Khulombwa khwa Makura ku Khwivekha nende Vubani
(Khur 30:22-28)
29Bezaleli yalomba khandi makura matakatifu ku khwivekha nende vubani vuhuunyanga mwayu mulahi, vwa tsukanywa khuli makura ku khwivekha.
လက္ရွိေရြးခ်ယ္ထားမွု
KHURULA 37: LLLCATHOLIC
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© The Bible Society of Kenya, 2013