KHURULA 25
25
Vihanwa viu Khurumikha mu Liheemo Litakatifu
(Khur 35:4-9)
1Mwami Nyasaye yavoolela Musa, 2“Voolela Vaisraeli vanderele shihanwa. Uliitsa khumbukulila shihanwa shia mundu wosi yenyanga khuhaana. 3Yivi navio vihanwa via valiitsa khukhuha: itsahabu, ifetsa nende mukasa; 4machoro malahi ku khunavakhu; lwa bulu, lwa sambarau, lumuuchi; tsinguvu tsialombwa khu vwoya vwi tsimbuli; 5liseelo li likondi limiiko limuuchihilu; shiseelo shi imbuli; musala ka munyenye; 6makura ki tsitaaha; vindu vihuunyanga vulahi via makura ku mundu avekhwangwa khwirecheshitswa khu muhinzilu khandi ki vindu vihuunyanga mwayu mulahi viu khusambilakhu vubani; 7machina ku vukuuli ki tsilaanji lukanu na lukanu nende machina kandi ku khuvikha mu shiambala shiu Mukali wa vasalisi voosi khu inguvu yeye yu mu shiliru. 8Khutukha vandu vanombele Liheemo Litakatifu, nikanyalikha menye navo. 9Uliitsa khulomba liheemo lienelo, nu khulisiaya ni vindu viosi khulondokhana khuli niitsa khukhumanyinya.
Lisanduku li Lilakano
(Khur 37:1-9)
10“Mulombe lisanduku khu musala ku munyenye, tsisentimita 110, vukalamu tsisentimita 66, khandi vuraambi vwalio tsisentimita 66, khutsia khwikulu. 11Uliitsa khulikhunikha ni itsahabu inyukhu, mukari mwalio nende ilwanyi walio nu khuvekha itsahabu khundulu khwalio khwosi. 12Uliitsa khulinga tsingara tsine tsialombwa khu itsahabu tsiu khuchinjilakhu, ma utsire khu vilenje vialio vine, tsingara tsivili khu shia luveka. 13Uliitsa khulomba misala chiu khuchinjila chiu musala ku munyenye, ma uchiveshe itsahabu. 14Uliitsa khwinjilitsa misala chienecho mu tsingara khu shia luveka lwi lisanduku khulichinga. 15Misala chienecho chiliitsa khurikala mu tsingara, khandi uvuli khurulitsamu. 16Uliitsa khuvikha mu lisanduku lienelo machina kakhongwa kavili, ka nzitsanga khukhuha, machina ka malako kahandikwakhu.
17“Uliitsa khulomba shindu shiu khukhunishila ikulu khurula khu itsahabu inyukhu, vuraambi tsisentimita 110 nu vukalamu tsisentimita 66. 18Uliitsa khulomba vilombe vi tsimbaha vivili khu itsahabu yiraanywa ni inyundu; 19uliitsa khura shilombe shi tsimbana shilala khu shia khundulu khwi shindu shiu khukhunikhakhu. Uliitsa khuvilomba vive shindu shilala ni shindu shiu khukhunishila. 20Vilombe vi tsimbaha, viliitsa khuheenzana viene khu viene vushiamu khu shindu shiu khukhunishila; tsimbaha tsiavio, tsiliitsa khukhunikha lisanduku lienelo. 21Uliitsa khuvikha machina kakhongwa kavili mu lisanduku lienelo, nu khulikhunikha ni shindu shiu khulikhunikha. 22Niitsa khwakana nivi nuli hawenaho; khandi khurula ikulu wi shindu shiu khulikhunikha hakari wi vilombe vivili vi tsimbaha, niitsa khukhuha nuliho malako kaanje koosi ka uliitsa khuha Vaisraeli.
Imesa yi Mikati Mitakatifu
(Khur 37:10-16)
23“Uliitsa khulomba imesa khurula khu musala ku munyenye, vuraambi tsisentimita 88, vukalamu tsisentimita 44, khandi tsisentimita 66 khutsia khwikulu. 24Uliitsa khuchikhunikha ni itsahabu inyukhu nu khuvekha itsahabu khundulu khwayo khwosi. 25Uliitsa khulomba likulutumu vukalamu tsimililita 75 khundulu khwayo nu khuvekha itsahabu khundulu khwi likulutumu lienelo. 26Uliitsa khulomba tsingara tsine khu itsahabu tsiu khuchinjilakhu nu khutsira mu tsimbeka tsialio tsine, wa vilenje vili. 27Tsingara tsiu khutiila misala chiu khuchinga imesa, tsiliitsa khuvikhwa himbi khu likulutumu. 28Uliitsa khulomba misala chi minyenye nu khuchivekha itsahabu. 29Uliitsa khulomba tsisahani, vikombe, tsijaka, nende tsibakuli tsinyala khurumikha, lwa valiitsa khuhaana vihanwa vi idivai. Vindu vienevo viosi viliitsa khulombwa khu itsahabu inyukhu. 30Imesa iliitsa khuvikhwa imbeli wi Lisanduku li Lilakano, khandi uliitsa khuvikha mikati chihaanwangwa khwinzi khu imesa yeneyo shia khase khosi.
Shikuru Shitaaha
(Khur 37:17-24)
31“Uliitsa khulomba shikuru shi itaaha khu itsahabu inyukhu. Uliitsa khulomba vwalilu vwayo nende mulondi kwashio ni itsahabu yiraanywa ni inyundu; mawua kasho kasiaha vulahi, vimuli nende masambu, viliitsa khuva shindu shilala nashio. 32Tsisia sita tsiliitsa khuvambukha khurulila mu tsimbeka tsi shikuru shi itaaha, shia tsivaka khurula mu shia luveka. 33Shia lusia khu tsisia sita tsienetso, luliitsa khuva na mauwa kasiaywa kavaka kasasanga ka musala ka munasi ni vimuli nende masambu. 34Mulondi kwi shikuru shi itaaha shienesho kuliitsa khuva na mawua kane kasiaha vulahi kali khuli munasi kuli ni vimuli nende masambu. 35Khuliitsa khuva ni lisambu lilala hasi hi tsisia tsivili. 36Masambu, tsisia, nende shikuru shi itaaha viliitsa khuva shindu shilala shialombwa khu itsahabu inyukhu yiraanywa ni inyundu. 37Uliitsa khulomba tsitaaha saba tsi shikuru shi itaaha, nu khutsisinjilitsa vulahi khu tsiashilenje vulavu imbeli. 38Uliitsa khulomba shindu shiu khusinjilitsakhu shikuru shi itaaha nende tsisahani khu itsahabu inyukhu. 39Uliitsa khurumishila itsahabu inyukhu tsikilo 35 khulomba shikuru shi itaaha nende vindu viosi vienyekhanga khushio. 40Uchelitsi ulole ndi ushilombi khuli nakhumanyinya nuli khu shikulu.
လက္ရွိေရြးခ်ယ္ထားမွု
KHURULA 25: LLLCATHOLIC
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© The Bible Society of Kenya, 2013