KHURULA 18
18
Yetsero Yacheniha Musa
1Kuuka wa Musa walaangwangwa Yetsero, wali nali musalisi wa Vamidiani, yahulila shia shindu shiosi, shia Nyasaye yali nakholele Musa nende Vaisraeli, lwa ya varulitsa mu shivala shia Misri. 2Litukhu lindi, yasimukha natsia khulola Musa, halala nu mukhali wa Musa walaangwangwa Zipora, wa Musa yali niyalekha inyuma, 3halala na vaana veve vavili, mulala Gerishomu na wundi Eliazari. (Musa yali wavoola, “Ndi mundu mucheni mu shivala shicheni;” yali wakulikha mwana mulala lira Gerishomu. 4Musa yali wavoola khandi, “Nyasaye wa tata wanje yakhonya, manambonyinya khuvula khwiirwa nu Mwami wa Misri”; khu yakulikha mwana wundi lira Eliezeri.) 5Yetsero yasimukha natsia nu mukhali wa Musa nende vaana veve vavili mu shiangalangwi, wa Musa yali niyamenya mu maheemo ha Shikulu shia Nyasaye. 6Yetsero yali warumila Musa likhuva ndi vali khunjila vitsanga, 7ma Musa natsia khumwakanila, namwinamila, khandi namukhumbelela. Vareevana vene khuvene mareevo khulondokhana khu shia vulamu vu mundu nivinjila mu liheemo lia Musa. 8Musa yavoolela Yetsero shia shindu shiosi, shiu Mwami Nyasaye yali nakholi khu Mwami wa Misri halala na vandu veve khuhonyinya Vaisraeli. Yamuvoolela khandi makhuva khulondokhana khulinyakhana lia Vaisraeli vavirilamu nivali khu luchendo, khandi khuli Mwami Nyasaye yavahonyinya. 9Lwa Yetsero yahulila makhuva kenako koosi, yali nu vuyaanzi, 10navoola, “Mwami Nyasaye yitsominywi, wamuhonyinya khurula khu Mwami wa Misri halala na vandu veve! Mwami Nyasaye yitsominywi, wahonyinya vandu veve khurula mu vurukwa! 11Manyi nunundi ndi Mwami Nyasaye, ali ni tsingulu tsinyishi, khuvira vanyasaye voosi, shichila yakhola ndio, lwa Vamisri valechelitsanga Vaisraeli.” 12Yetsero yalera shihanwa shiu khusambwa nu mulilu, khandi vihanwa vindi vi misango chiu khuhaanwa khu Nyasaye. Haruni nende vimilili va Vaisraeli, vatsia naye khulia shiukhulia shitakatifu khuli mwiima ku khusaala khu Nyasaye.
Khurovolwa khwa Vakhalachi
(Litsu 1:9-18)
13Litukhu lialondakhu, Musa yikhala hasi khukhalachila vandu, ma vandu nivamuvotokhana khurula mu mavwevwe khutukha halukolovo. 14Lwa Yetsero yalola shia shindu shiosi, shia Musa yali nakholanga, yareeva, “Ni shina shia wu kholelanga vandu yishi? Shichila shina wu kholanga wonyene makhuva yaka, vandu nivasinjile hanu khurula mu mavwevwe khutukha halukolovo, nivenya khukhulola?”
15Musa yamuvoolela, “Nu vulahi nikholi ndio, shichila vandu vitsanga khwinzi, khwenyelitsa lienya lia Nyasaye. 16Lwa vandu vavili vavetsanga nivayaalana, vitsanga khwinzi, makhalaka ni viina khuvo vavili wi likhola liu vulunji, nu khuvavoolela lienya lia Nyasaye nende malako keke.”
17Yetsero yamuvoolela, “Shiukakholanga munjila indahi tawe. 18Uliitsa khuvwa tsingulu yivi halala na vandu yava khandi. Muhinzilu yuku nu mulitoho khu yivi wonyene. Lekha khukukhola wonyene. 19Lekha khuhe nunundi likhuva lilahi linyala khu khukhonya, ma Nyasaye ave nivi. Nu vulahi nusinjilile vandu imbeli wa Nyasaye, nu khumuvoolela makhuva kakhaya vandu. 20Uliitsa khuveechitsa malako ka Nyasaye nu khuvivaalila khuli vanyala khumenya, khandi khukhola ka vatushili vakhole. 21Navutswa khumeeta khu yaka, uliitsa khurovola vandu vali ni tsingulu, nu khuvaha vunyali vu khwimilila vandu: Vimilili va vandu tsiheelefu ni tsiheelefu, tsimia ni tsimia, makhomi karanu na makhomi karanu, khandi makhomi na makhomi. Navo vatushili khuva vandu vanyala khuha Nyasaye luyali, vanyala khusuuvilwa khandi vanyala khuvula khuhuchilila asooya. 22Lekha vakhole khumatukhu koosi mihinzilu khuli vakhalachi va vandu; navutswa vavoolele valere makhuva kavo matiinyu khu yivi; vanyala khuviritsa vene makhuva matoro. Yaka kaliitsa khuchila muhinzilu kwokwo khuva mwangu, shichila valiitsa khukhukhonya khukhola. 23Niiva uliitsa khukhola yaka, khuli Nyasaye avoolanga, shiuliitsa khuvwa tsingulu tawe. Vandu voosi valiitsa khutsia ingo wavo mu milembe.”
24Musa yahulila makhuva ka kuuka wewe Yetsero yamuvoolela, nakhola shia shindu shiosi shia yali namuvoolele. 25Musa yarovola vandu vali ni tsingulu khurula mu Vaisraeli voosi, navaha vunyali vu khwimilila vandu, vimilili tsiheelefu ni tsiheelefu va vandu, tsimia ni tsimia, makhomi karanu na makhomi karanu, khandi likhomi ni likhomi. 26Varumikha khumatukhu koosi khuli vakhalachi va vandu. Valerela Musa makhuva ka vatiinyilanga, navutswa vo vene vaviritsa makhuva matoro.
27Nalwo lwa Musa yaseevula kuuka wewe Yetsero khutsia; ma Yetsero nakalukha mu shivala shieshie shia yarulamu.
လက္ရွိေရြးခ်ယ္ထားမွု
KHURULA 18: LLLCATHOLIC
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© The Bible Society of Kenya, 2013