NAPPIYAREEGERAK 13
13
Mbaranabat Tawulut imbirak leenogo nappiyareegwaarak wone
1O Andiyokiya time it Ala apuri kuwak eeko menggaarak ando nen Ala wone yorogwe, ando nen wone mamunirogwe, eeko nogogwaarak ti, inendage Mbaranabat inom, Timeyon endage peebi toonak Niget inom, Lukiyut awi Kirene mendek inom, inowe endagembogut Keroret ogoba nen ngguuneegerak endage Menakem inom, Tawulut inom, it nen aret eeko nogogwaarak. 2It nogo inambe mage negen logonet, ninowe endagembogut alut eekwi iigak, at Aberiniki nen yorage logonet, ”Mbaranabat Tawulut imbirak an neyabu eeko logowak nduk, inayonggo pigirak me, leenogo mippiyanip o,” yinuk, yoragagerak.
3Yorage mbareegi, it abok aret mbi nengga'lek inambe mage negen logonet, inanobak ineenggi tebenogo tamban eeppiigo nogogwaarik, nappiyareegwaarak.
O Tipurut nogogwaarak wone
4Aberiniki nen nappiige mbareegi, it Mbaranabat Tawulut imbirak o Telewukiya wambi nogo nogogwaarik, ti'nuk, time nen, o Tipurut nggween kup mbanak wonage me time wunda nawok nduk, yiiro paga unggwi nanuk, 5wunda nogo nogogwaarik, o Talamit time unggwi nogo nogogwaarik, time logonet, it Yakuri tamban eeko menggam lombok Ala wone yoranet nugu nogogwaarak. Yoranet nugwi me, at Yaya Marakut nogo inom yeenggwaaranet nege nagagerak.
6Yi yenggenak oolo nggween kup mbanak wonage me nogogwanogogwa, irip me o Papot unggwi nogogwaarak. Unggwi nogo nogogwaarik, aap Yakuri ambi endage Mbareyetut tili pagangge logonet, pilit pugunit nege menggerak me, kogogwaarak. 7At ore iniki warak lombok nggween kup mbanak ti arum menggerak ngguberenor endage Terigiyut Pawulut nogo nen Mbaranabat Tawulut imbirak Ala wone yo'niruwak nduk inayonggo pereegerak mendek, 8at tili pagangga nogo endage it Yunani inoone paga Elimat, ndi, nit ninoone paga Tili Pagangga yogo monggoorak nogo nen, ”Yetut wone abet mbarugun o,” yinuk, aap nogo inikime manabeegerak. 9Manake mbareegi, at Tawulut endage peebi toonak Pawulut nogo nen, Aberiniki inikime lik ari mbareegi, eebe enegen looge logonet, 10”Kat Ibilit aput me, maluk eeke logonet, obeelom wone keebi mbake menggendak kat aret o. Kat kabilit ambik me, aakumi inambokan laganiyak mban eeke menggendak kat aret. Ala oone abet mban ari menggerak nogo abut lagangge logokit mba'nuk, ari menggendak ya? 11Yogondak at Ala nen koba maluk eeppagage kenok, kenegen mbuk a'nuk, o eya kenegen kaamunggun mondok lek o,” yinuk, awo yoge kagak, enegen ogut age nagagirik, apit agagerak. Enegen apit age nagagirik, eenggi pigawak nduk, yu'nduk ari nagagerak. 12Inowe ngguberenor nogo nen enegen mbuk agagerak nogo kage nagagirik, ”Inogoba Yetut wone mamunirogwe yi, abet aret kagi,” mbake nagagirik, ”Wi!” yinuk, pi wareegerak.
O Pitiriya tini Andiyokiya nogogwaarak wone
13Ti eeppunuk, at Pawulut oreewi inom o Papot teppunuk, yiiro paga unggwi nogo nogogwaarik, ene paga o Pambiliya wunda nogogwaarak. Pambiliya wunda nogo nogogwaarik, o Perega unggwi nogo nogogwaarik, time iigak, at Yaya lambembiinok, o Yerutalem iyok paga nagagerak. 14O Perega time nen nogogwa-nogogwa, o Pitiriya tini ambi Andiyokiya unggwi nogo nogogwaarik, it Yakuri tamban eekwi paga it tamban eeko menggam kwi'nari unggwogogwaarak. 15Kwi'nari unggwogogwaarak wonogwe me, it tamban eeko menggam arum menggaarak nogo nen at Ala wone lengganak wone nogo inom, it Ala wone yorogo nogogwaarak nabi-nabi wone nogo inom, liiru mbanak pekkagak yorogo nogogwaarik, ”Nit niniki eyak wappinaniyak wone ambi wonage kero yo'niraawak nduk, ninoreewi ti kin wogiyet o,” yinuk, 16yorage mbareegi, kin wogiigo mbareegwa, at Pawulut nogo mi'nage nagagirik, eenggi paga, ”Puk logonip,” yoragagerak.
Yorage nagagirik, ”Kit aap Iterali mendek inom, Ala kinagabiti warak mendek inom, kinaruk logonip o, noreewi.” 17Yorage nagagirik, ”At Ala nen nit Iterali ninombomini miirinake nagagirik, ninanebunu nggwok aruwak nduk, o Metit time nggiru negen wonogwe me, inarum wonagagirik, eenggi nggorek paga o time nen wogoren wundi wagagerak. 18O karume aakumi lek me nogome logonet, o lagi nage, wambi wage, 40 tahun eeke kagak, inobaabut maluk eerit nogwe iigak kwe, yanggorogon wonagagirik, 19it aakumi o Kanaan mendek inanebunu 7 nogo lek eerogo piinok, inombaane'me ninombomini unde logowak nduk inanggween punogo piige kagak, 20o wambi wage, lagi nage, 450 tahun aret wonagagerak.
Eeke mbareegi, ti'nuk, wone amburu mbanggo logowak nduk, ambi mippegak, obaane'me ambi mippegak, eerit peebi irip paga Tamuwen Ala wone yorage logowak nduk mippereegerak. 21Mippege mbareegi, ti'nuk, Ninowe endagembogut oone konenggo logorak ambi mippinanu o, yinuk, yogo mbareegwa, at Ala nen Kitiyi aput Tawun anebunu Mbeneyamin mendek nogo, mippege mbareegi, mi'ndak kagak, o lagi nage, wambi wage, eeke kagak, 40 tahun aret eereegerak. 22Ti'nuk, at nogo tebembunuk, at obaane'me, At Ndawut Itayi aput nogo an niniki kunik me, an niniki mbake mban eeke logogin kagi o, yinuk, ari nagagirik, Ndawut inowe endagembogut logowak nduk mippereegerak. 23At Ala nen, At Ndawut ndaremenggerak ombooluk ambi nen aap Iterali inagap ndarigin o, yinuk, abok yoreegerak nogo ndak-ndak, at Yetut aret nda'nagagerak. 24Ndi, at awo woraakit nduk eeke kagak, at Yaya nen it Iterali mendek abok yorage logonet, Kit kinomaluk ti kiniki koombunuk mbo pugwi kiinok, yiime wuppinagagin o, yinuk, yorage nagagerak. 25Yorage nagagirik, ti'nuk, at eeke nagagerak nogo abu irip nggobok yuurak age mbareegi, An ta nombako ogotik o? At woraawak nduk tokkogo monggotak nogo, an lek o. At an nambokan woraagin nogo, aap nggwok me, an nen iyogogut piiniyak meek, yorage nagagerak o,” yinuk, at Pawulut nogo nen yoragagerak.
26Yorage nagagirik, ”Noreewi o. Nit Abarakam ombowologwe kunduk, kit Ala kinagabiti mbako monggotak kunduk, kit ninom ninagap ndaruwak nduk, ninake wone yi aret nappi wagagerak o! 27Ninagap ndaruwak nduk nappi wagagerak kwe, it Yerutalem mendek inoweewi inom nogo nen at eebe inom, ndi, kulinik-kalinik it Yakuri tamban eeko logonet, Ala wone yorogo nogogwaarak nabi-nabi inoone liiru mbanak pekkagak yorogo nogogwaarak nogo inom, alom liippega'lek aret wonogogwaarak me, Yetut wareegwaarak paga, at Ala wone yereegwaarak nogo ndak-ndak a'me agagerak. 28At ngge eekerak paga waruwi? yinuk, alom kwaareegwaarak mendek, lek age mbareegi, Kat nen aret waru o, yinuk, at Pilatut yoreegwaarak. 29Yogo nogogwaarik, Togop eeppugun o, yogo nogogwaarak liiru mbaneegwaarak nogo ndak-ndak eeppogo logonet, eyo paga nabenogo pogo mbareegwa, piinogo ndoome mambereegwaarak. 30Ndoome mambereegwaarak kwe, Ala nen kambunuk nogo menggam nen eenik agago mippereegerak. 31Mippege mbareegi, at inom Nggalileya nen Yerutalem nogogwaarak nogo eebe inigen kawak nduk nigiige logonet, nogo ambik yereegerak. Ndi, it inigen kogogwaarak nogo nen yogondak aap Iterali mendek paganogo yoranet nogo agaarik o. 32-33Ndi, Ala nen,
Yogondak yi paga aret ndakkakirak me,
kat an naput aret o,
yinuk, Ndawi Mbanak Matmut pasal 2 paga liiru mbaneegerak nogo ndak-ndak Ala nen Yetut kambunuk nogo menggam nen eenik agago mippereegerak ti paga, at Ala nen ninombomini abok paganogo yoragagerak nogo, inombowologwe nit ninake aret a'me lik yereegerak me, obeelom wone yi aret yokkirogo ogoorik. 34At Ala nen, Peebi mondok pili arigin lek o, yinuk, kambunuk nogo menggam nen eenik agago mippereegerak nogo ti at nen ari logonet,
An obeelom eeppagagin o, yinuk,
wone alik mondok abet mbariyak mendek Ndawut yoreegirak nogo,
kit aret eeppinagagin o,
yinuk, yoge,
35ndi, ambi,
Kaput obeelom mban eeke minggirak yi,
neebe kambunuk, pili age neegak teppanumunggun lek o, yinuk, yoge, eereegerak Ndawi Mbanak paga mbaneegerak o. 36Ndi, at Ala nen at Ndawut eeruwak nduk koonogo punereegerak nogo, at wonagagerak eyom paga abu eeppege nagagirik, kambeegerak. Kangge mbareegi, ombomini kambeegwaarak inom tabonogo pi nogogwaarak pili agagerak kwe, 37at eenik agago mippereegerak nogo perak, pili arulik, eenik aret wonage o. 38Pili arulik, eenik aret wonage me, kit maluk eekwi ti, at Yetut eereegerak paga Ala nen lek eerogo pinagarak kineenu arubagip nduk, yokkirage agarik o, noreewi. 39Ala wone lengganak Muta nen yokkiragagerak nogo paga, kinoba tayenogo pinagarak lek o. Ata, Yetut oba panggombunuk abet mbakwi paga perak, Ala nen kinoba tayenogo pinagagin aret o, yinuk, yokkirage agarik o. 40It Ala wone yorogo nogogwaarak nabi-nabi nogo nen yogo logonet,
41Kit wonogwe kiigak,
an eeke minggirak nogo liirogon mbininogo yokkirogwe kwe,
abet mbaka'lek logonet,
kit Ala miyuk-meya eerogo pugwi me,
we, Iya! mban yogo logonet,
mondok aret kambumunggup o,
yinuk, yereegwaarak nogo, kit togop aret eekkinake kero, kiniki tum wako logonip o,” yinuk, at Pawulut nogo nen yoragagerak.
42Yorage mbareegi, it Pawulut Mbaranabat imbirak tamban eeko menggam nogome nen wundi nogo logonet, ”Wone yo'nirogotak nogo ando peebi tamban eeko logonet, yo'niroorak o,” yinuk, yoranok wundeegwaarak. 43It tamban eeko menggam nogome nen mbaganggwi iigak, it Yakuri mendek inom, it endekem mendek Yakuri wone waganggo nogogwaarik, Ala agabiti mbako nogogwaarak nogo inom, Pawulut Mbaranabat inom nogo nogogwaarik, ”Ala kinabuwa nen wokkirage nogo, kiniki liippunuk waganggo logonip,” yinuk, inaruk wareegwaarak.
44Peebi tamban eekwi paga o tini time nogo aakumi abok Ala wone konenuwok nduk, kuwak ari wogogwaarak. 45Kuwak ari wogwe nogo it Yakuri inigen iigo nogogwaarik, inanini nen at Pawulut oone ari nogo taganggo logonet, miyuk-meya eerogo pogo mbareegwa, 46it Pawulut Mbaranabat inagabiti lek logonet, ”Ala wone kit aa'nduk yokkiraawok nduk eekoorak kwe, kit wone woorak nineebi yogotak paga, Nineenik logorak lek kambuwok o, yinuk, miikkologotak me, kit lambembinaganuk, it endekem mendek nogo aret yora nogo ogoorik o. 47Ninogoba Ala nen yo'nirage logonet,
It aakumi yi awi ndi awi o irip-irip menggaarak nogo
inagap ndariyak wone yoranet nege logonok nduk, nappagagi o.
It endekem konenggulik mendek iniki eya eeginabit nege logonok
nduk, punogo pagagi o,
yinuk, ninaruk wareegerak me, it endekem mendek yora nogo ogoorik o,” yinuk, yoragagerak.
48Yoragagerak nogo, it endekem konenggulik mendek nogo nen inaruk konembunuk, iniki ale'nggen ambik mbako logonet, ”Ala wone yi iya!” yinuk, tiyappereegwaarak. Ndi, ineenik mondok logorak miirogo piyareegerak nogo nen wone ti paga iniki panggombunuk abet mbareegwaarak.
49Ninogoba Yetut wone nogo, o time abok aret wigak yereegerak kwe, 50it Yakuri nogo nen it kumi nggaganin Yakuri wone waganeegwaarak nogo inom, it o tini time mendek inoweewi nogo inom, Pawulut Mbaranabat imbirak inooruwak nduk inikime manabi nogo mbareegwa, o time nen mugogo wumbiyareegwaarak. 51Mugogo wumbiigo mbareegwa, it nogo nen, ”Kineraaket o,” yinuk, iniyok paga liirubu aa'ngga eerogo mbo piinok, o Ikoniyum nogogwaarak. 52Nogo mbareegwa, it o Andiyokiya time Yetut wone waganeegwaarak nogo, Aberiniki inikime unggwage mbareegi, iniki ale'nggen ambik agagerak.
လက္ရွိေရြးခ်ယ္ထားမွု
NAPPIYAREEGERAK 13: WNO
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ