NAPPIYAREEGERAK 10
10
At Peterut Koreneliyut imbirak eereegwaarak wone
1Aap ambi o Kayitareya mendek me, aap yigin unde Italiya mendek ambi aago inowe endage Koreneliyut aret wonagagerak. 2Aap nogo aagapuri inom at Ala inagabiti warak logonet, Ala wone liippunuk eeko nogogwaarak. At aap koowarak aret me, it Yakuri inamendek lek kenok, amendek tumburirage, tamban mban eeke, eeke nagagerak me, 3ne ambi paga kiyoma jam 3 paga ari nage kagak, abinggaanggo kage logonet, mbogut paga mendek Ala yonggo nappiige menggerak melaikat ambi wage nagagirik, ame unggunuk yoge logonet, ”Koreneliyut wae,” yoge mbareegi, 4at Koreneliyut andit nage nagagirik, agabiti nen enegen looge logonet, ”Nogoba wae. Kat nonggop yo'nirikit nduk ari agandik o?”
Yoge mbareegi, ”Lek o. Aakumi ineenggilek kenok kamendek tumburirage, tamban eeke, eeke nagandak nogo ti, at Ala enegen liippagagerak me, iniki koba aberak wonage o. 5-6Koba aberak wonage me, yogondak aap ambi endage Timon, endage peebi toonak Peterut nogo, aap endage Timon wam agabolo mbilanak ogobakkigika awi yi yenggenak aa'nggi paga wurik nogo, imbirak time wonage me, woraawak nduk kawuri yonggo o Yope nappiyet o,” yinuk, abinggaanggo paga yoge kagagerak. 7Ndi, at melaikat nogo nen at yo'nuk nage kagak, at Koreneliyut ayeloman mbere inom, at awot yigin unde Ala agabiti mbake logonet, ake eeke menggerak mendek ambi inom, ”Woraawak o,” yinuk, wiiragagerak wogo mbareegwa, 8abinggaanggo yoreegerak wone abok aret mbininogo yorage nagagirik, o Yope nappiyareegerak.
9It nappiyareegerak nogo, nogo ambi yippunuk, ko'lu nen nogo logonet, o Yope koorok panggo yi nogwe iigak, at Peterut nogo, o liingge jam 12 paga tamban eerikit nduk, yugum o wurik kirin paga time lagi nagagerak. 10Time tamban eeke logonet, mbi abu age mbareegi, ”Nano na?” ari nagagirik, mbi lakwi iigak, abinggaanggo negen kagagerak. 11-12Abinggaanggo kage logonet, mbogut keyaappunuk, mbogoyum tabak, irip peenok-peenok pigaganggo nogogwaarik, towe-pagi inom, ndiimbu-nggwiya inom, weret-mbonon inom abok aret yum nogo ndoonak paga enaani nggween paga wurabi wage kagagerak. 13Kage me, ”Peterut wae. Mi'na'nuk, yi ambi warogo namen o,” yinuk, oone ari aruk koneneegerak.
14Aruk konembege nagagirik, ”A, nogoba o. Nunggulik-nunggoorak yogop yi, an abu nenggeelik me, noorak neebi o.”
Yoge mbareegi, 15ti'nuk, ambinom yoge logonet, ”Lek o. At Ala nen we ugun nonggo logorak nduk pereegerak me, kat nen noorak mage yugun,” yinuk, 16ne kenagan paga yoge nagagirik, yum ambe nggerok togon wonok, mbogut paga lagangge kagagerak.
17Ndi, at Peterut nogo abinggaanggo kage nagagirik, ”Nonggop yo'nigi?” yinuk, iniki kobak a'nuk wonage me, it Koreneliyut nappiyareegerak nogo, ”Timon awi ngge o?” yinuk, kin wagiinet nda'nggi paga ari nogo nogogwaarik, 18”Wologo wae. Aap Timon endage peebi toonak Peterut yime wonage a, lek a?”
Yinuk, yorogwe iigak, 19at Peterut nogo nen, ”Nabinggaanggo nonggop kagi o?” yinuk, iniki awo koongge wonage me, at Aberiniki nen at yoge logonet, ”Aap kenagan mukkeren wagaarak endekem wonogwe me, 20kat mi'na'nuk wambi nage logomenggendik, aap yi an nen nappiya wagarak me, kiniki yungguppegak eerugun o. Ata, kinom mbet-mbet aret nak o,” 21yoge mbareegi, it inowagam wambi nage nagagirik, ”Mu'neren wogotak nogo an aret me, nonggop eeriyak nduk mu'neren wogop o?”
22Yorage mbareegi, it nogo nen, ”Lek o. Aap Koreneliyut aap yigin unde inowe nogo nen nappinani waga o. At nogo iniki koonak Ala agabiti warak kenok, it Yakuri mendek abok aret wogoppugwi me, Ala nen melaikat ambi nappi wagaarak nogo nen Koreneliyut yoge logonet, Peterut nen wone yokkiri woraawak nduk, wone yonggo nappiyet o, yoge mbaki, yonggo nappinani wagaarak mukkeren wogo o,” yinuk, 23yogo mbareegwa, ”Ti kenok, unggwi woraanip,” yorage mbareegi, unggwogo nogogwaarik, inom nogo yereegwaarak.
Nogo yippunuk, ko'lu at Peterut nen, ”Nawok o,” yorage nagagirik, at oreewi Yope mendek inom, it nogogwaarak nogo inom, wogogwaarak. 24Wogo nogogwaarik, tu paga nogo ambit yippunuk, o Kayitareya unggwi wogogwaarak. At Koreneliyut nogo at owe-awot inom, oreewi inom, it wogwe iyo, kuwak eepiinok, inigen wonogwe me, 25at Peterut oore'nggam unggwi nage mbareegi, at Koreneliyut nogo abu'me wanduk yi nage nagagirik, alut eeke mbareegi, 26at Peterut nogo nen, ”An kunduk we aap aret me, mi'naru o,” yinuk, eenggi pigogo mippereegerak. 27Mippege nagagirik, imbirak wone mbanit unggwi nogo nogogwaarik at Peterut nogo aakumi ambik kuwak ogogwaaraak iige nagagirik, 28yorage logonet, ”Nit Yakuri kit endekem mendek nogo ninom lambunggwi, kiya nogwe, Eeriyak mage o, yogwe nogo kineenu kwe, It aakumi ando maluk mendek yugun o, yinuk, Ala nen naruk wakerak me, 29an mu'neren nogo mbakop, an neebi yuulik, nok-nok aret wagi o. Nonggop eeriyak nduk, mu'neren nogotak o?”
30Yoge mbareegi, at Koreneliyut nogo nen, ”Lek o. Ne ambi paga kiyoma-kiyoma jam 3 yogop paga ndak-ndak an oome tamban eeke wonage me, nabinggaanggo kage nagarik, nogo 4 yigirak nogo yokkiri o. Nabinggaanggo kage logonet, aap ambi mbogoyum abinak kwiindele aago nggarek togon an nowagam mi'nari wage nagaarik, 31Koreneliyut wae. Kat tamban eekendak nogo Ala aruk konengge, ndi, aakumi ineenggilek kamendek tumburirage menggendak nogo, Ala enegen liippagage, eeke nagaarik, koba aberak wonage me, 32aap Timon endage peebi toonak Peterut nogo, o Yope wonage me, woraawak nduk yonggo nappiyet o. At nogo aap Timon wam agabolo mbilanak ogobakkigika nogo awi yi yenggenak aa'nggi paga wurik nogo imbirak time wonage o, yinuk, 33yo'nege mbaki, yonggo nappiigirak neya wagandak me, nore wa. Neya wagandak me, yogondak kogoba endagembogut nen, Togop yoranu, yokkegerak nogo abok yo'niraanok nduk Ala enggaanom kuwak eeko o,” yinuk, yoreegerak.
Peterut nen yoragagerak wone
34Yoge mbareegi, at Peterut nogo nen, ”Yokkira o,” yorage nagagirik, ”At Ala nen mbake logonet, Aap ambi neebi, ndi, ambi ninikilom, mbakeelik ti, abet aret mbaki o. 35Nit yi aakumi ndi aakumi abok nen at oone ninagabiti warak logonet, obeelom mban eekwi niinok, at Ala nen inikilom ninombake menggerak. 36Yi aakumi ndi aakumi abok ninowe endagembogut nogo ti Yetut Keritut aret me, Yetut Keritut eereegerak paga Ala ninom lambunninakerak o, yinuk, wone obeelom wone it Iterali ineenu aruwak nduk, nappi wagagerak nogo, kineenu aret o. 37At Yaya yiime wuppiyoorak wone nogo yoranet nage mbareegi, o Nggalileya nen Yureya yi awi ndi awi abok eerit nage aakumi inigen kogo nogogwaarak nogo kit kunduk kineenu aret o. 38At Ala nen Yetut Nataret mendek Aberiniki oba wuppi wage nagagirik, leenogo mippege, omaawi wogoge, eereegerak paga obeelom eeginake, it kugi Ibilit aakumi inikime logonet molok iranet nege menggerak nogo mugogo wumbiige, Ala imbirak logonet me, eerit nege nagagerak. 39Ndi, at aap Yakuri iname time inom, o Yerutalem inom, ninenggaanom eeginabit nege nagagerak nogo ninigen kenok, yokkirogo ogoorik o. At Yetut nogo eyo karo-karo paga nabenogo wareegwaarak kambeegerak mendek, 40nogo mbere yippunuk, Ala nen eenik agago mippereegerak eebe ninigen kawak nduk ni'niyareegerak. 41It aakumi we ugun inigen kawak nduk nigiyoolik o. Ata, at eenik a'nuk mi'nage nagagirik, nit aa'nduk at oone yorogo logowak nduk leenogo pinaneegerak nogo ninom logonet, mbi nunggwi, yi nunggwi, eereegurak nogo mban ninigen kawok nduk ni'niyareegerak. 42Eenik agago mippege mbareegi, at Yetut nogo nen, It ineenik wonogwe inom, kambeegwaarak inom, inowak looninaburak nduk Ala nen miirogo mippereegerak nogo Yetut aret o, yinuk, liirogon paganogo yoranet nugu logonip o, yinuk, yo'niragagerak. 43It Ala wone yorogo nogowaarak nogo apit aret at abok mban paganggo logonet, Kiniki at oba panggombunuk abet mbakwi kiinok, kinomaluk lek eerogo pinagagin o, yinuk, yorogo nogogwaarak o,” yoragagerak.
It endekem konenggulik mendek Aberiniki wogoragagerak wone
44At Peterut awo togop yorage kagak, it wone koneneegwaarak nogo abok aret Aberiniki inoba wuppiya wagagerak. 45Aberiniki inoba wuppiya wage logonet, Ala nen it endekem mendek nogo kunduk Aberiniki inom ndak-ndak aret wogorage, inigen kogo nogogwaarik, it aap inagabolo mbanak abet mbareegwaarak Peterut inom wogogwaarak nogo nen, ”Wi!” yinuk, pi wareegwaarak. 46It aap inoone alitak lombok lalin negen wappunuk yogwe, Ala endage wogoppugwi, eekwi nogo inaruk konembunuk, ”Wi!” yinuk, pi wareegwaarak. Pi wako nogogwaarik, at Peterut nogo nen yorage logonet, 47”Ala nen Aberiniki nit wo'niragagi kwak it wogoragaarak me, yiime wuppiyoorak ti, mage mbakop?” 48Yorage nagagirik, ”Lek o. Yetut endage agago yiime wuppiyanip o,” yinuk, yorage mbareegi, ”Ninom mbuuluk logonuk nanok o,” yinuk, yoreegwaarak.
လက္ရွိေရြးခ်ယ္ထားမွု
NAPPIYAREEGERAK 10: WNO
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ