VARUMI LITANGILIRA
LITANGILIRA
Ibarwa ya Paolo ku Varumi yang'odwa ahimbi muhiga wa 56 A.D. lwa yaali niyetegekaa kogeniha Avakristayo vaali mu likanisa lia Rumi. Lilohiza lilie liali ndi ayinziri hagati ha Vakrisitayo ku ing'inga ngekeeke, na niyakanyoola ovokonyi kutura kuvo, ma azizagiliri nologendo kuzia mu kivala cha Sipeini (15:24, 27). Paolo yang'oda ibarwa yiyi kwivaala limanyiriza lilie lie lisuuvira liu Vukristayo, kandi vikolwa via kazozo ku limenya lia Vakrisitayo. Kitabu yiki keveeye mu kandi ni livaala liosi lia miigizu ga Paolo.
Inyima wi licheliza avandu vi likanisa lia Rumi kandi kuvavoolera kuli avasaaliraa, Paolo ahaanaa kivuni chi ibarwa yiyi, “Ivangeri imanyia kuli Nyasaye akolaa avandu kuva valungi imbiri weve kuvitira mu lisuuvira kutura mu litanga kuduuka mu Keheri” (Var. 1:17.)
Paolo avambalarizaa kivuni yiki kovora ndi avandu vosi; vombi, Avayuda na Avizihiiri, vaduukana kokolwa valungi na Nyasaye, kigira vosi harara vaveeye voni. Avandu vakolwa avalungi na Nyasaye kuvitira mu lisuuvira mu Yeso Kristo. Paolo yiivara ndi liiva lihia mu lihambana na Kristo liletwaa nu vuhambani vuhia kutura ku Nyasaye. Uyu usuviraa aveeye ni mirembe na Nyasaye, kandi avohololwa na Roho wa Nyasaye kutura mu zinguru ziu vwoni ni likuza.
Miliango ja katano kuduuka munane, Paolo amolomaa ku kivuni chi Lilaga lia Nyasaye kandi zinguru zia Roho wa Nyasaye mu livamwoyo liu mundu kandi lisuuvira. Maku mutumwa Paolo alwaana ni liteeva kuli Vayuda na vandu vi zihiiri vaduukira mu volohizi vwa Nyasaye ku mundu. Paolo amalirizaa ndi lisuuvilwa lia Yeso na Vayuda liveeye lilala lilala ku lilohiza lia Nyasaye koleta vandu vosi vaduuki mu zimbavasi zia Nyasaye mu Kristo Yeso.
Agaveeye mu kitabu yiki
Litangilira kandi kivuni 1:1-17
Lienya liu mundu liovohonyi 1:18—3:20
Inzira ya Nyasaye yo vohonyi 3:21—4:25
Livamwoyo lihia mu Kristo 5:1—8:39
Isiraeli mu lilohiza lia Nyasaye 9:1—11:36
Miima ju Vukristayo 12:1—15:13
Limaliriza kandi licheliza lia Paolo 15:14—16:27
လက္ရွိေရြးခ်ယ္ထားမွု
VARUMI LITANGILIRA: LOGOOLI
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
©Bible Society of Kenya, 2019