VARUMI 2
2
Likalaga lirungi lia Nyasaye
1Vandu valala ku munyi muyaara vandi mu likora madamanu, navuzwa sihaveeyeho ni liesayasaya ku ga mukoraa mba. Lwa mukalagiraa vandi, mwikalagilaa munyi vene, kigira muleleki kuva na mahiolo mu likora vindu vilala viene. 2Kunyi kumanyi ndi Nyasaye aveeye vulahi kukalagira vandu vandi vosi vakora vindu kuli yivi. 3Navuzwa ivi, umundu, ukalagiraa yavo avakolaa vindu kuli yivi na ivi mwene, okolaa viazana? Uganaganaa ulahononoka kutura mu likalaga lia Nyasaye? 4Anoho hawundi uchayaa zimbavasi zizie, uvwikuzihizi kandi uvwikuziri vwivwe. Ivi siumanyi ndi Nyasaye nuwizimbavasi kigira yivu vwenya koleta kuivi ligerizaa kukwimilira onyoore lieganira.
5Navuzwa kigira oveeye nu mwoyo mudinyu kandi gutali ni lieganira, na ndio wivungiziraa uvutima umwene ku lidiku liu vutima vwa Nyasaye kandi likalaga lilie liu vulungi lilakaloleke. 6Mu lidiku yilio, Nyasaye alakatungi vuli mundu woosi kolondekana ku miyinzi jije. 7Avandu valala avazizagilira kokora vulahi venyelerizaa uvukumi, uluyali kandi lihindira. Nyasaye alavaha livamwoyo litahera mba. 8Avandu vaveeye vahuvali kandi vasuura kindu keveeye kilungi kunangwa vaduuki kokora vindu viveeye vichamu; Nyasaye alaviika vutima vwivwe vululu kuvo. 9Ikivi nuvusaliri vilava ku vandu voosia vakolaa vudamanu; kutanga ku Vayuda, kandi ku vizihiiri. 10Navuzwa Nyasaye alahaana uvukumi, ilizominywa ni mirembe ku vandu vosi avakolaa vulahi; kutanga ku Vayuda, ma ku Avizihiiri. 11Kigira Nyasaye siyerizaa mundu kali mulala mba.
12Avandu vosi vamali kokora vwoni vugira kumanya Lilaga lia Musa valadiva vugira lilaga. Avandu vosi vakola vwoni nivamanya Lilaga, valakalagirwa kolondekana ku Lilaga. 13Mundu siakolwa kuva mulungi imbiri wa Nyasaye ku lihulira Lilaga, navuzwa ku likora agi Lilaga lienyaa. 14Avandu vi zihiiri sivaveeye ni Lilaga lia Musa mba; navuzwa lwa vakora vindu veene mu liyaanza liavo gi Lilaga lienyaa, aveene vaveeye Lilaga, kali niiva sivaveeye ni Lilaga. 15Miima niliiva liavo vimanyia ndi, agi Lilaga lienyaa gang'odwa mu mioyo jaavo. Zing'anagani zie mioyo jaavo zilolekizaa giligali, kigira ing'inga ndala zivayaalaa, kandi ing'inga yindi zivaveraa. 16Ku lwa yago, kolondekana ku Ivangeri ya nzilwazaa, nindio galiva ku Lidiku yilio lwa Nyasaye kuvitira mu Kristo Yeso, alikalagira zing'anagani ziaviswa ziosi zia vandu.
Avayuda ni Lilaga
17Niiva wilangaa Muyuda, ivi weleedaa ku Lilaga, kandi wiyizominya kigira uvwiko vuvwo ku Nyasaye; 18ivi wamanya vulaliri vwa Nyasaye kandi kuvugilira gaveeye malungi ligali, kigira wayigizwa mu lilaga, 19kandi niiva oveeye ligali ni limanya ndi ivi mwene oveeye umwimiliri ku vavoku, na uvulavu ku vandu vosi avaveeye mu kisundi, 20wevoolera oveeye mwigizi wa vasiru, kandi umwigizi wa vandu vakikiri kuva vadukiru. Oveeye na giligali ndi mu Lilaga oveeye nilimanya liosi kandi agiligali goosi. 21Ivi wigiza vandi, kigira ki si wiyigizaa ku ivi mwene? Ivi wilwaziraa avandi ndi, “Mutiiva mba,” navuzwa, ivi mwene wivaa! 22Ivi ovolera avandi, “Mutaheya mba,” navuzwa ivi oheyaa. Ivi udunyiraa vifananyi navuzwa ivi mwene wenyooleraa uvutugi ku liiva mu matemberi ga vanyasaye? 23Wiyizominya ndi oveeye ni Lilaga lia Nyasaye, navuzwa uhaanaa zisoni ku Nyasaye ku livunaga Lilaga? 24Mang'oda Matakatifu gavoora, “Avandu vizihiiri vanyega Nyasaye kigira munyi Avayuda!”
25Niiva ulahulira Lilaga, likevwa liilio lilava nu vukala ligali, navuzwa niiva ulavunaga Lilaga, vwakaveeye vulahi ivi ulavuli kokevwa. 26Niiva mundu mugasa wi Zihiiri zindi adukizaa agi Lilaga lienyaa, Nyasaye sialamuvaliza kuva aveeye kuli wakevwa? 27Kunangwa Avayuda mulakakalagirwi na vandu Avizihiiri kigira muvunagaa Lilaga, kali nigava mwamala kuling'oda hasi kandi mukevwa; navuzwa vahuliraa lilaga kali niiva sivakevwa ku miviri mba. 28Kunangwa, Muyuda wiligali nivwaha ni oyo wakevwa ligali? Kigira, Muyuda wi ligali siaveeye uyu ololekaa vuzwa ichova, anoho likevwa lieligali siliveeye kigira yakevwa ku muviri mba. 29Muyuda wiligali ni oyo oveeye Muyuda musi mugati; agaveeye kovora, uwumwoyo gwigwe mu Roho gumali kokevwa; kandi yigu goveeye muyinzi gwa Roho wa Nyasaye, sigoveeye gwi Lilaga liang'odwa mba. Mundu wu lugano yilu anyoora lizominywa lilie kutura ku Nyasaye, silitulaa ku vandu mba.
လက္ရွိေရြးခ်ယ္ထားမွု
VARUMI 2: LOGOOLI
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
©Bible Society of Kenya, 2019