VARUMI 12
12
1Kunangwa mugoonyaa nu mwoyo gwosi ligali, avaamitu vange, kigira ovonene vwi zimbavasi zia Nyasaye ku kunyi, mwihaane munyi aveene ku Nyasaye kuli kisiuviriru keveeye mwoyo, kitakatifu kivugiliywi kandi chukuyaanziza Nyasaye. Yiyi niyio inzira yinyu ya giligali idukanaa kusigamira Nyasaye mu Roho. 2Mutalonda miima ji lirova yili mba, navuzwa muleke Nyasaye amugirung'anyie munyore uvuhia mu vogeri nu muziganagani zienyu. Na ndio muladuuka kumanyiriza uvulariri vwa Nyasaye, kandi agaveeye malahi kandi gavugililwa kandi madukiru.
3Kigira kihanwa chi zimbavasi zia Nyasaye ku inzi, muvooleraa munyi mwosi: Mutiganagana aveene kuva igulu ligali kuvita kuli gamudukira muve mba. Mu vogono yivwo muve hagati mu zing'anagani zienyu, kandi mwikalagiri aveene kolondekana ne kegero chi lisuuvira lia Nyasaye amali kuhaana ku munyi. 4Muviri goveeye ni vivero vinyingi, na sa kilala keveeye nu muyinzi gwacho. 5Munzira ndala nzere, kali nikoveeye avanyingi, koveeye muviri mulala mu lihambanywa harara na Kristo, kandi kuhambana harara sa mulala ku wache kuli vivero lugano lugano viu muviri mulala. 6Kunangwa gakuduukiraa kutumikiri vihaanwa lugano kolondekana ni zimbavasi zia Nyasaye yakuha. Leki kuvitumikiri. Niiva kihanwa chiitu keveeye chovoporofeti, kuduuka kukitumikiri kolondekana ku kegero chi lisuuvira lia koveeye nalio. 7Niiva nuvutumiki kuduuka kutumiki. Niiva nukwigiza, kuduuka kwigize. 8Niiva ni kihanwa chu kuzuva avandi kuduuka kokole ndio. Niiva koveeye ni kihanwa chu vwihaani kokoonya avandi, kuduuka kokole ndio nu mwoyo gwosi. Niiva nuvwimiliri, leki kwamiihi novogeri. Niiva nukuva ni zimbavasi, leki kokole zimbavasi nuvusangali vwosi.
Uvuyanzi
9Uvuyanzi vwinyu vutava nu vugadi mba. Muvihilirwi agaveeye madamanu, muhande ku agaveeye malahi. 10Muyaanzane aveene na veene kuli avamwavo mu Vukristayo; na mwegombe kuhaanirana uluyali munyi aveene naveene. 11Mutava vagata, navuzwa muyinziri vudinyu. Mutumikiri Mwami numwoyo gwinyu gwosi. 12Musangare mu lisuuvirizwa lienyu vuli kazozo. Muve aviikuziri mu lidambizwa. Muhongere ligali kusaala. 13Mukoonye Vakrisitayo vache mu vudaka vwavo. Muve avingirizi vavageni kandi avihuli vizinyumba zienyu.
14Mugasize yavo vamudambiza; muvagasizi, kandi mutavalaama mba. 15Musangare harara na yavo avasangalaa, musiome harara na yavo avasioma. 16Mumenye mu vuhambani mulala nuwache. Mutava avigingiri, navuzwa muvugiliri kutumikira kali vihanzahanza. Mutiganagana kuva avageri na vukweyenyera ovonene mba.
17Mutatunga mundu kali mulala uvudamanu ku vudamanu. Mwetegeke kokora vindu viveeye vilahi imbiri wa vandu vosi. 18Niganyalika kolovega lwinyu, muve ni mirembe na vandu vosi. 19Avayaanze vange, mutavanza kisaalia mba, navuzwa muleke vutima vwa Nyasaye mwene vokole yaga. Mang'oda matakatifu gavoora, “Kuvaanza kisaalia ni likuva liange; inzi ndavanza,” Mwami avoora. 20Kuvita yaga, mang'oda gavoora: “Musigu woovo naava ninzara, umuhe chukulia; Naveeye nuvuluhu, umuhe chukunwa. Kigira mu likora ndio ulamukola ave nizisoni mwene.” 21Mutaleka uvudamanu vumuguuti mba, navuzwa muguuti uvudamanu mu likora vulahi.
Iliegehiza ku Uvwamihi
လက္ရွိေရြးခ်ယ္ထားမွု
VARUMI 12: LOGOOLI
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
©Bible Society of Kenya, 2019