HABAKU 3
3
Dua̒ lei Habaku
1Uti-utieelo dua̒ li Nabi Habaku:
2Yaa Eeya, ilodungohe lowatotia pasali huhutu lo Eeya,
yi laasa hikimati lopolu mai todelomo hilaa lowatotia.
Hileaala dua̒ huhutu leidaa̒ boito wulia mai lo Eeya
wau poilaalo mai lo Eeya tojamani lo mongowatotia botie.
Wajibulio mongowatotia ponua lo Eeya
eleponu Eeya hilaa mopatu.
3Eeya Allahu Taa̒ala Taa Laba-labaalo mantali dungga-dungga mai lonto Teman,
Eeya dungga-dungga mai lonto hihui̒-hui̒dea lo Paran.
Hulungo yilanggube lo odudaa̒a lo Eeya;
dunia polupolu lo poloilaalo momuji duo̒lo Eeya.
4Eeya dungga-dungga mai wolo tinelo ulaba-labaalo motinelo,
lonto uluu̒ Eeya yilumualai tinelo mobaango,
teteetolo kawasa lo Eeya tiluuo̒ lo Eeya.
5Ilahula lo Eeya ngongoto monao̒ totalu lo Eeya
wau mautu modudua̒ towulea lo Eeya.
6Wonu Eeya mohuheli, dunia hulu-huluhelio;
wonu Eeya momilohe, babaa-ngusawalo geegeri.
Huhuu-ideyaalo u ohiheo-hiheolo mao̒ mobubuutaa̒;
huhuu-luduwaalo u ohiheo-hiheolo mao̒ olo motiwopa,
to huhuu-luduwaalo boitolo
Eeya lononao̒ tumulalo jamani muloololio daa̒.
7Iloontonga lowatotia ulipu lo Kusyan ilodungga lo woohe,
wau taulo Midian hulu-huluhelio.
8Yaa Eeya, wolo bo sababu deheto Eeya lomuluka daa̒?
Wolo bo sababu duduu-tulaalo ulohutu Eeya lomukula?
Tilae̒ya lo Eeya heengo odelo wadala wau kaleta lo popaatea,
tou̒ umati lo Eeya yilohia lo Eeya ohohaama.
9Buutio̒ Eeya mapilo dapato Eeya,
pana lo Eeya dapadapato u lopatolo.
Lapatao̒ huta bilutao̒ Eeya lowali duduu-tulaalo.
10Moo̒onto to Eeya, huhuu-ideyaalo molotau̒lo
lonto hulungo lotuhutai didi debo odelo leihuatai.
Taluhee towalungo huta hula-hulaubio sualaalio,
buo̒olio liliilibe wau mobuo̒ola daa̒.
11Tinelo papaa-nawaalo Eeya molinggahu moo̒ohuu̒,
totobuo̒ Eeya molilingga ilatao̒-ilatao̒,
yi malo huheli mato lodulahu wau hulalo totambati.
12Wolo muluka daa̒ Eeya molontale demola tutu-tutuulo dunia;
babaa-ngusawalo yiyii-lumbetaa̒ lo Eeya wolo hilao mopatu.
13 Eeya modiambanga momaju u mopo lopato umati lo Eeya
wau u mopoa̒ahu olongia tatiluaoto Eeya.
Tilotao̒ Eeya lodehu tau̒wa lotaa moleeto,
yiloloopu lo Eeya tunggula lopulito ngoa̒amila tahidudua̒ olio.
14Papaa-nawaalo Eeya lolaapata to tau̒wa lo pasuukani musu
tou̒ suludadulio lonao̒ mai debo odelo lotolo dupoto huloyongo,
alihu mongowatotia pobubuu-ayaalo.
Timongolio moi̒ii̒ wolo sanangi
debo odelo taa u wolo poo̒-poo̒oyo
modeehe taa u hikuulangia.
15Wolo wadala Eeya yiyii-lumbetaa̒ lo Eeya auhe daa̒
wau deheto u moputio̒ obusa.
16Modungohe uito hilaa lowatotia lime-limeelo
wau biihu lowatotia hulu-huluhelio.
Watotia lowali lolulupuhu diila olootolo,
oa̒ato lowatotia leiteduo̒, penu boli ode utoonu ponao̒wa lowatotia.
Watotia mamohima wolo duo̒duo̒oto
hukuumani lo Allahu Taa̒ala lo tahi poluhua.
17Eleponu bungo lo ara diaaluo hungolio
wau bungo lo angguru diaaluo anggurulio,
eleponu sembo pilipuwalo jaitun diila momata
wau tilapulo pale to halabolu moo̒ngongoto hilao,
eleponu hihii-mbaawaalo mate ngoa̒amila
wau lantunga lo bibiahu diaaluo tuangio,
18watotia mameengahu laito,
sababu Eeya, Eeya Allahu Taa̒ala tamoo-poa̒ahua olo watotia.
19 Eeya longohi ode watotia olootolo
debo odelo oa̒ato buu̒lu, oa̒ato watotia piloo̒ toheetai lo Eeya.
Eeya lodelo olo watotia alihu aamani
wakutu lonao̒ to hihui̒-hui̒dea.
လက္ရွိေရြးခ်ယ္ထားမွု
HABAKU 3: LAIGOR
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ