YEHESKIEL 45
45
Tataa-yaduwaalo lipu u pilopo tolomodu ode Eeya
1Tou̒ huta boito diipo taya-tayaadulo u mowali huta pusaka ode timii̒du suku, musi powalahulo ngotayade ode Eeya. Huta boito hayai̒o musi mopulaa duluo wau ngoputu lokilo meeteri, wau tanggalio mopulu lokilo meeteri. Ngoilanggubu madala boito poilaalolo mantali. 2Duo̒lo Bele lo Eeya podapatolo monto huta boito ngotayade u tutulio wopato, tuu̒udio dulo hetuto limo lopulu lomeeteri timii̒du biihio, pilalita lo tanalapa ngotanggalo dulo pulaa limo lomeeteri wau teteetolo pomongulalo Bele le Eeya. 3Ngotayadio lo huta boito, u hayai̒o mopulaa duluo wau ngoputu kilomeeteri, wau tanggalio limo lokilo meeteri musi podapatolo u pomongulalo Bele lo Eeya, deu̒yito-yito tambati u mantali daa̒. 4Huta boito mantali, wau podapatolo duo̒lo mongo iimamu tahi otuugasia mohutu ibaadati to Bele lo Eeya. Ngotayadio lohuta boito mamowali tambati duo̒lo bele limongolio, wau ngotayadio poli duo̒lo Bele lo Eeya. 5Ngotayadio poli monto huta boito ngoudaa̒ mopulaa duluo wau ngoputu lokilo meeteri, piu̒wa limo lokilo meeteri musi podapotolo duo̒lo tau-tauwalo Lewi tahipo kalajawa to Bele lo Eeya. Teto mabongulolo kokoo-tawaalo tou̒toonu timongolio mowali motibiluloa̒.
6Totili lohuta u mantali boito, musi powalahulo ngopita u hayai̒o mopulaa duluo wau ngoputu lokilo meeteri wau tanggalio duluo wau ngoputu lokilo meeteri, duo̒lo kota tuwau u mowali potibiluloa̒ penu boli tatonu wambai̒o bangusa lo Isirai̒lu.
Huta duo̒lo takawa-kawasa tahemo malenta
7Duo̒lo takawa-kawasa tahemo malenta musi olo podapatolo huta. Huta boito bua̒-bua̒ade mota monto siipati otolopa lomadala u pilopo tolomodu ode Eeya boito, demola Lau Tenga, wau monto siipati tiimuru lomadala u pilopo tolomodu boito, demola siipati tiimuru lolipu boito. Oditolio hayai̒o tutuuwauwa wolo hayao̒ lotala tuwau tayadu lohuta u wohi ode susuu-kuwaalo Isirai̒lu. 8Huta boito mowali miliki lo takawa-kawasa tahemo malenta tohuta lo Isirai̒lu, alihu tio diilalo modeehe umati-U̒, bo mongohi mao̒ ulebelio boito mowali miliki susuu-kuwaalo Isirai̒lu.
Uwawaa-jibuwaalo lo takawa-kawasa tahemo malenta
9 Eeya Taa Laba-labaalo molanggato lotahuda mai, “Malo-hetaalo mao̒ duduu-saamu, wuu takawa-kawasa lo Isirai̒lu! Pohuhelia mao̒ huhutuumu u moposuka-suka wau hemodeehe ulipu boito. Pohutua mao̒ wolo u otutu wau aadili. Sama-samaata diilalo mao̒ polahia limongoli umati-U̒ monto huta limongolio. Wau̒, Eeya Taa Laba-labaalo molanggato momalentai uito olimongoli.
10Pomake mao̒ titimenga wau tuu̒udu u otutu:
11Ngoe̒epa u moluu̒udeo̒ balangi mohengu musi tutuuwauwa tuangio wolo ngobati u moluu̒udeo̒ balangi osiipati debo odelo baahani taluhu. Patoi̒o maamusi ngohomer. Oditolio, tutuu-udeyaalo boito musi odie:
Ngohomeri tutuuwauwa wolo mopulu lo epa tutuuwauwa wolo mopulu lo bati.
12Titimengamu musi odie:
Ngosikali tutuuwauwa wolo wolomo pulu lo gera
Ngomina tutuuwauwa wolo wolomo pulu losikali
13-15Uti-utieelo patoo̒ lo tuu̒udu u mopotatapu dedee-wowaalo:
pale:
Ngotayade wolomo pulu bagiaangi monto tilapulo polo sembomu
jawawut:
Ngotayade wolomu pulu bagiaangi monto tilapulo polo sembomu
winulo jaitun:
Ngotayade ngohetuto bagiaangi monto tilapulo bubuu-ngowaalo ayu.
(Tuu̒ude mao̒ modudua̒ bati: mopulu lobati tutuuwauwa wolo ngohomer tutuuwaua wolo ngokor)
himba:
Himba tuwau monto timii̒du dulo hetuto.
Timongoli musi mopodewo bake lopale, bake yilalango, wau bake polodame, alihu duduu-sawaalo limongoli ambunguolo. Wau̒, Eeya Taa Laba-labaalo molanggato tamongohi mai palenta uito.
16Ngoilanggubu tuango lipu musi modelo dedee-wowaalo boito ode takawa-kawasa tahemo malenta to Isirai̒lu. 17Tiolo tawajibu motali mao̒ bibiahu duo̒lo bake yilalango wau babaa-haniyaalo bake lopale wau bake lo angguru duo̒lo ngoa̒amila bangusa lo Isirai̒lu to duduu-laheyaalo buka, Rameyangi Hulala Bohu, duduu-laheyaalo Saabati wau duduu-laheyaalo buka wewo. Tio musi mopodapato bake pongambungualo dusa, bake lopale, bake yilalango, wau bake lo polodame u mei̒ ambungu mai duo̒lo bangusa lo Isirai̒lu.”
Duduu-laheyaalo buka
(Pilot. 12:1-20; Im. 23:33-43)
18 Eeya Taa Laba-labaalo molanggato lotahuda mai ode umati-Lio, “To dulahu bohulio hulala bohulio, timongoli musi mopomantali Belee-U̒ wolo mopodewo sapi ulai̒ buboto tuwau udiila taiilio. 19Ti iimamu musi mohama duhu monto bake polulutalo dusa boito, lapatao̒ mopoleaapu to wowoo-lihiyaalo huhebu to Belee-U̒, wau olo to opaato tutulo mesba, wau to wowoo-lihiyaalo huhebu lobake udulu-dulunga ode palepelo delomio. 20Pohutua mao̒ odito olo todulahu opitulio tohulalo boito duo̒lo timii̒du tamaa ilodusa lou̒ diila silangaja meaalo sababu diila otaawa. Wolo pohuli boito timongoli mamodaha omantali lo Belee-U̒.
21To dulahu opulaa pato hulalo bohulio, timongoli musi moporame Potihunggu lo Paska. Pitu hui mola ngoa̒amila tau musi molamela roti udiila oragi. 22To dulahee u bohulio, takawa-kawasa tahemo malenta musi mopodewo sapi ulai̒ tuwau ode bake polulutalo dusa duo̒lo batangalio wau ode ngoilanggubu ulipu. 23Ngotilonggadu rameyangi u pohupohutu pitu hui mola boito, timii̒du dulahu tio musi mopodewo ode Eeya pitu sapi ulai̒ wau pitu himba ulai̒ udiila otaiilio, lapatao̒ molumbilao̒ lealeaatu. Timii̒du dulahu tio olo musi mopodewo batade ulai̒ tuwau u pongambungualo dusa. 24Wewolio mao̒ leeto, musi podewolo olo pale mopulaa pitu wau ngoputu loliiteri ode timii̒du sapi ulai̒ wau tolo liiteri winulo jaitun ode timii̒du himba ulai̒.
25To Potihunggu Wombohe Duungo, u tilumula todulahu opulaa limo hulalo opitulio, timii̒du dulahu ngotilonggadu pituhui mola takawa-kawasa musi mopodewo babaa-keyaalo u tutuuwauwa, deu̒yito-yito bake pongambungualo dusa, bake yilalango, wau bake lopale wau winulo jaitun.”
လက္ရွိေရြးခ်ယ္ထားမွု
YEHESKIEL 45: LAIGOR
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ