YEHESKIEL 41
41
1Talolai̒ boito lodelo olaatia ode delomo huwali huungio, u ilunte Tambati U Mantali. Tio loluu̒udeo̒ hulupila udulu-dulunga odito mota: hayai̒o tolo meeteri, 2tanggalio limo lomeeteri. Dingingo to biihio mohu-mohualio hulodio duluo wau ngoputu lomeeteri. Lapatao̒ tio loluu̒udeo̒ Tambati U Mantali boito: hayai̒o dulo pulu lomeeteri wau tanggalio mopulu lomeeteri.
3Lapatao̒ tio tilumuwoto huwali delomio. Tio loluu̒udeo̒ hulupilo udulu-dulunga mota odito: hayai̒o ngomeeteri, tanggalio tolo meeteri, wau dingongo to biihio mohu-mohualia hulodio tolo meeteri wau ngoputu. 4Lapatao̒ tio loluu̒udeo̒ huwali boito olo: modeliilio tutulio wopato, hayao̒ wau tanggalio tinggai mopulu lomeeteri. Lapatao̒ tio loloi̒ya olaatia, “Uti-utieelo Tambati U Laba-labaalo mantali.”
Huhuu-waliyaalo u bilongulo to dingingo meeseli Bele lo Eeya
5Lapatao̒ uito talolai̒ boito loluu̒udeo̒ dingingo meeseli delomio Bele lo Eeya: hulodio tolo meeteri. To dingingo meeseli topalito Bele lo Eeya boito woluo huhuu-waliyaalo u tanggalio dulo meeteri. 6Huhuu-waliyaala boito obele-belea totolu u timii̒du bele-belea ohuwali tolo pulu. Dingingo meeseli bulemengio lo timii̒du bele-belea lebe molipa wolo dingongo meeseli lobele-belea towalungio, tilinggula huhuu-waliyaalo boito mowali woludelo lou̒ diila momuangao̒ dingingo meeseli Bele lo Eeya boito. 7Monto bulemengio, dingingo meeseli Bele lo Eeya boito oontonga tutuuwauwa hulodio monto walungo demola yitaato. To dingingo meeseli bulemengio Bele lo Eeya, to ambahu bulemengo lo huhuu-waliyaalo boito, o tutuua̒du mohelu duluo u hulinta tilinggula tau mowali mobotulaa mola monto bele-belea walungio ode bele-belea oluolio wau otolulio. 8-11Dingingo meeseli bulemengio lo huhuu-waliyaalo boito hulodio dulo meeteri wau ngoputu. Hudungu boito o huhebu udulu-dulunga ode huhuu-waliyaalo to ambahu tilayo Bele lo Eeya, wau huhebu wewo udulu-dulunga ode huhuu-waliyaalo to ambahu huliaalio. To palito Bele lo Eeya o wumbato utudu-tudu ngopee̒ totalulio u tanggalio dulo meeteri wau ngoputu; dudutuulio tolo meeteri monto huta, wau pilohutulio tutuuwauwa langgatio wolo pandemeni lo huhuu-waliyaalo to dingingo meeseli Bele lo Eeya. To wolota lo wumbata utudu-tudu ngopee̒ totalulio wau huhuu-dunguwalo u pilomake lomongo iimamu, woluo huwali leidaa̒ u owatopo huo̒huo̒ diila odingingo u tanggalio mopulu lomeeteri, to oloihi wau olowala Bele lo Eeya.
Hitua-tuawua u bilongu to ambahu otolopa
12To ngotuali lo palepelo to ambahu otolopa, woluo hitua-tuawua u bilongu leidaa̒ u hayai̒o wopato pulaa limo lomeeteri wau tanggalio tolo pulaa limo lomeeteri, hiambola hulodu didii-ngingiio dulo meeteri wau ngoputu.
Tuu̒udu wimu-wimumuto Bele lo Eeya
13Talolai̒ boito loluu̒udeo̒ hayai̒o Bele lo Eeya: limo lopulu lomeeteri. Monto ambahu wulea Bele lo Eeya tunggula ode dingingo meeseli wulea lou̒ hitua-tuawua u bilongu leidaa̒ to ambahu otolopa boito walahio olo limo lopulu lomeeteri. 14To wimbihu talu monto Bele lo Eeya u talutalu ode tiimuru wolo palepelo to oloihi wau olowalalio, tanggalio olo limo lopulu lomeeteri. 15Talolai̒ boito olo loluu̒udeo̒ hitua-tuawua u bilongu leidaa̒ u talutalu ode palepelo to ambahu otolopa: tanggalio limo lopulu lomeeteri, leituwoto didii-ngingaalo to oloihi wau olowalalio.
Wiwii-mbihuwalo Bele lo Eeya
Huhuu-waliyaalo leidaa̒ to Bele lo Eeya, huwali leidaa̒ totalu, Tambati U Mantali, wau Tambati U Laba-labaalo mantali, 16diladai wolo lesi ayu, monto wumbato demola tutuu-lowaalio. Tutuu-lowaalio boito mowali tau̒ubela wolo podehu. 17Ngoa̒amila dinginga to wimbihu delomio diladai wolo uu̒u-kiliyaalo 18bungo lo palem wau malai̒kati opolipio̒, ngobungo palem towolota lo duluo malai̒kati opolipio̒. Malai̒kati opolipio̒ boito obaya mohelu duluo, 19baya tuwau manusia u talutalu ode bungo lopalem to ambahu oloihi, wau u tuwau poli baya losinga utalu-talu ode bungo lo ayu palemi towimbihu olowala. Uu̒u-kiliyaalo boito woluo to ngoilanggubu Bele lo Eeya, 20tumulalo mai monto wumbato demola wimbihu yitaato huhebu. 21Wowoo-lihiyaalo huhebu monto Tambati U Mantali modeliilio tutulio wopato.
Mesba lo ayu
Totalu lo Tambati U Laba-labaalo mantali woluo hitua-tuawua u oontonga mao̒ debo odelo mesba monto ayu. 22Langgatio ngomeeteri wau ngoputu wau tanggalio ngomeeteri. Tutu-tutuulio, wumbatio wau dingingio pilohutu monto ayu. Talolai̒ boito loloi̒ya olaatia, “Uti-utieelo meja uwoluo totalu lo owoluo lo Eeya.”
Huhuu-hebuwaalo
23To huudu hulupilo udulu-dulunga ode Tambati U Mantali ohuhebu tuwau, odito olo tohuudu lo hulupilo udulu-dulunga ode Tambati U Laba-labaalo mantali. 24Huhuu-hebuwaalo boito oduungo huhebu moheelu duluo u huo̒huo̒o to huungio. 25Huhuu-hebuwaalo Tambati U Mantali diladai wolo uu̒u-kiliyaalo bungo lopalem wau mamaa-ikatiyalo opolipio̒ debo odelo to didii-ngingiio. Totalu lohuwali leidaa̒ talu yito to ambahu bulemengio, woluo lalante lo ayu. 26To biihio mohu-mohulia lo dingingo totiliilio woluo tutuu-lowaalo, wau dingingio diladai wolo uu̒u-kiliyaalo bungo lopalem.
လက္ရွိေရြးခ်ယ္ထားမွု
YEHESKIEL 41: LAIGOR
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ