YEHESKIEL 35
35
Hukumani lo Allahu Taa̒ala ode Edom
1 Eeya lotahuda mai odelaatia, 2“Wuu manusia panaa, laa̒natiyalo lipu lo Edom. 3-4Potunggula mao̒ ode ulipulio wolo u Wau̒ Eeya Taa Laba-labaalo molanggato lotahuda mai ode limongolio,
‘Wau̒ botie musuumu, wuu ulipu to hihui̒-hui̒dea lo Edom! Hutamu mapowaliyo-U̒ moliilo daa̒ lou̒ diila otua, wau kokootaamu mamowali tutuu-wodeyaalo. Yi mao̒taawa mao̒ limongoli deu̒ Wau̒ulo Eeya. 5Tumulalo muloololio mai timongoli helomusu Isirai̒lu wau lopoluli olimongolio hepilate yila-yilateelo mao̒ tou̒ timongolio ilodungga lobala odelo hukuumani pulitio todusa limongolio. 6Masababu uito, domi Wau̒, Allahu Taa̒ala tatumu-tumulo, Eeya Taa Laba-labaalo molanggato, mautu yito paladumu, wau timongoli diila moo̒ halahu monto mautu. Timongoli mai̒lo totala sababu helomate yila-yilateelo mao̒, yi polamtea yila-yialteelo mao̒ olo mamohenela olemu. 7Kokootaamu to hihui̒-hui̒dea lo Edom mapowaliyo-U̒ moliilo wau timii̒du taa u molibaya mao̒ mapatee-U̒ mate-mateelo mao̒. 8Huhuu-ideyaalo matau̒ube-U̒ wolo mimii-lateemu, huludu wau lumbaya mapoo̒ poluwo-U̒ wolo bake lo popaatea. 9Lipumu mapowaliyo-U̒ huta luasi udiila tilolopani u ohiheo-hiheolo mao̒, wau kokootaamu diilalo potibiluloa̒ lotau. Yi mao̒taawa mao̒ limongoli deu̒ Wau̒ulo Eeya.
10Timongoli hemoloi̒ya deu̒ mopio Yehuda meaambo Isirai̒lu tinggai wolo hutalio yito hakuumu, wau deu̒ timongoli momotolo haku mao̒ eleponu Wau̒, Eeya, yito Allahu Taa̒ala limongolio. 11Sababu uito, domi Wau̒, Allahu Taa̒ala tatumu-tumulo, Eeya Taa Laba-labaalo molanggato, Wau̒ mamolontuli mai niyati ode olemu, sababu timongoli moingo, mohiihia wau molonuo̒ to umati-U̒. Timongolio mamotota mao̒ deu̒ timongoli mahukuu-maniyo-U̒ sababu huhutuumu toli mongolio. 12Yi mao̒taawa mao̒ limongoli deu̒ Wau̒, Eeya, malo dungohei henteo̒mu tou̒ timongoli loloi̒ya: Huhuu-ideyaalo Isirai̒lu malowali loliilo daa̒ wau yiludulio lowali mangusaanto. 13Wuu bangusa lo Edom, timongoli bo osuala daa̒ wau hemobisala wolo sombongi ode Olau̒. Wau̒ malo dungohei ngoa̒amila boito.
14Wau̒ Eeya Taa Laba-labaalo molanggato motahuda mai: Ngoilanggubu dunia masanangi tou̒ ngoilanggubu lipumu powaliyo-U̒ huta datahu u luasi u moliilo daa̒, 15tutuuwauwa debo odelo timongoli olo sanangi tou̒ moo̒onto Isirai̒lu milikii-U̒, mowali moliilo daa̒. Huhuu-ideyaalo Seir, tumbao̒ ngoilanggubu huta lo Edom mamowali moliilo daa̒. Yi mao̒taawa mao̒ lotaa ngoa̒amila deu̒ Wau̒ulo Eeya.’ ”
လက္ရွိေရြးခ်ယ္ထားမွု
YEHESKIEL 35: LAIGOR
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ