YEHESKIEL 27
27
Lahu polobungalo ode Tirus
1-3 Eeya Taa Laba-labaalo molanggato lotahuda mai odelaatia, “Wuu manusia panaa, polahuwalo mola lahu botie ode Tirus, kota tobiihu pentadu tahemo daahangi wolo ulipu lo totoonulalo pentadu:
Tirus, wolo sombongi yio̒ hemoloi̒ya,
‘Ogaagau̒ otutu wimu-wimumuto ngoa̒amilalo!’
4Ode olemu auhe daa̒ debo odelo bele.
Yio̒ bilongu debo odelo kaapali ugaaga.
5Dingingo meeselimu ayu arasi lo Hui̒dee Hermon
wolihi layahumu ayu woohu lo Libanon.
6Ngoa̒amila bibiitemu pilohutulio
lonto bubuu-ngowaalo ayu leidaa̒ to Basan.
Dekimu pilohutu lonto ayu woohu,
lonto dengolo pulou lo Siprus asaliilio,
pakeelio haasili lopaahati tua̒langa ohalaga.
7Layahu wau tuoto u pongotawa olemu monto lineni huhutu lo Masiri,
wolo hidala-dalaala karawo.
Moa̒aluti tutu pakaakasi lo teeteendamu,
kaingi lonto Siprus otumba lailoumu.
8Pokaakasi pobiteemu lonto Sidon wau Arwad.
Taumu lohihilao tau-tauwalo takalajaalio mobite todeheto tamotota.
9Mongo pani lo ayu tahipo kalajaawa to kaapali
yito tahi osiipatia moo̒olohu lonto Gebal.
Monto timii̒du lipu kakaa-paliyaalo hipobitea mai
ohilaa mohumbuta daahangi.
10Mongo pajule monto Persia, Lidia wau Libia tumuwota suludadumu. Timongolio mopo ntayangao̒ heelemu waja limongolio to didii-ngingaalo meeseli lokotaamu. Timongolio malomantu lopoo̒laaheo̒ mumuu-suwaalo wau loduhenga mola omasaahulumu. 11Mongo pajule lonto Arwad hidahaawa to didii-ngingaalo meeselimu; momoo-nalaamu kilawali lotau-tauwalo Gamad. Polisai limongolio nta-ntayanga hipapaade to dingingo lo meeselimu. Timongoliolo tamopo wimumuto ogaagamu.
12Yio̒ mopotali babaa-langiyalo daahangimu u dadaata daa̒ to Spanyol, wau odelo bayaliilio yio̒ mololimo talaa̒, wate, timohe moputio̒ wau timohe moitomo. 13Yio̒ modaahangi to Yunani, to Tubal, wau to Mesekh, wau odelo bayaliilio yio̒ mololimo monto olimongolio mongowato wau babaa-langiyaalo polunggu. 14Yio̒ moluloa̒a babaa-langimu wolo kaleta wadala, wadala potae̒yalo wau bagal monto Bet-Togarma. 15Ulipu lo Rodus modaahangi olo wolemu wau ulipu lomadala tobiihu pentadu motali babaa-langiyaalo daahangimu wolo tua̒langa wau ayu moitomo. 16Mongo daahangi monto lipu lo Siria motali babaa-langiyaalo daahangimu wau ngoa̒amila tilapulumu u dadaata boito. Timongolio momaayali mai wolo polioto monto botu poliyoto moidu ohalaga daa̒, kaingi meela lailoumu, kaingi okarawo, lineni moa̒aluti, polioto monto botu koral wau botu meela dalima. 17Yehuda wau Isirai̒lu moluloa̒a balangi lo daahangimu wolo pale, hula lotiia̒, winulo jaitun wau ramba-ramba. 18-19Ulipu lo Damusiki motali balangi lo daahangimu wau ngoa̒amila tilapulumu wau momaayari wolo angguru monto Helbon, lambuto himba monto Sahari, wate dilupa wau ramba-ramba. 20Ulipu lo Dedan momaayali babaa-langimu wolo kakaa-yingiyalo woludu potitae̒yalo towulea lowadala. 21Taulo Arabi wau takawa-kawaasa huta lo Kedar motali babaa-langimu wolo walao̒ himba, himba ulai̒ wau batade. 22U motali mao̒ babaa-langimu tahipo dahaangia monto Syeba wau Raema modelo mai popoo-liotowaalo, hulawa wau ramba-ramba u mopiohe daa̒. 23Kokoo-tawaalo Haran, Kane, Eden, mongo daahangi monto Syeba, kokoo-tawaalo Asyur wau Kilmad, ngoa̒amilalo modaahangi wolemu. 24Timongolio mopotali ode olemu pakeyangi ngoa̒amilalo dadaata, kaingi meela lailoumu, kaingi okarawo, popoolo-madaniyalo otumba hidala-dalaala, wau tataa-liyaalo u motoheeto. 25Balangi lo daahangimu deloolo wolo tunutunuhu kaapali lo daahangi u duduulaa̒.
Yio̒ debo odelo kaapali u mobuheeto detohio,
kaapali u molayahe auhe daa̒.
26Tahi pobitea modelo olemu ode baangio daa̒.
Yio̒ haantamuo lo dupoto tiimuru u lilalilau.
27Totoonulalo balangi daahangi lo dudetohumu,
ngoa̒amila takalajaalio mobite todeheto wolo tahidudua̒ olemu,
ngoa̒amila pani lo ayu wau tamoo-dahangiamu,
timii̒du pajule to kaapali boito,
timongolio ngoa̒amila lopulito yilumoduo̒
tou̒ yio̒ loa̒humo demola wamoo̒ deheto.
28Ngoa̒amila taumu takalajaalio mobite todeheto hiwaatia̒ sababu moohe
wuwaatio̒ hiyongio toli-toliyongo to pepee-ntaduwalo deheto.
29Botia kaapali boito tilolaalio,
ngoa̒amila taumu takalajaalio mobitea to deheto lobotula ode tudulio.
30Hiliyongi mongolio paladumu,
lopoi̒laalo suusa lohilimutao̒ wolo suukali daa̒.
Timongolio helo mua̒yade peaahuo̒ to lunggongo
wau lotililiide todelomo wahu tuotio limilimi.
31Domi yio̒ timongolio helo podayato lunggongo,
lomake kaingi yute polupolu lou̒ limilimi.
Timongolio hilumoyonga lou̒ suukali daa̒
wau hiliyongalio wolo lapali usuusa paladumu.
32Timongolio helo polahu mola
lahu tuwau polobungalo,
‘Tirus, tatoonu baliimu?
Tirus, todeheto yio̒ botia diila osuaala.
33Tou̒ auhe daa̒ bilitemu
wolo dudetohe tuatuango wobuwobuo̒,
piloo̒polumu u palaluo lo babaa-ngusawalo;
mongo olongia olo pilopo walimu kaya.
34Botia yio̒ maloa̒humo,
loa̒antulu to wamoo̒ deheto.
Ngoilanggubu tahidudua̒ olemu wau ngoa̒amila detohu
yilooli pee̒-pee̒enta wolemu tohuungo deheto.’
35Ngoa̒amila taa u bilubiluloa̒ tobiihu pentadu hulu-huluhelio loo̒dungohe paladumu. Mongo olongia limongolio olo yiloohe daa̒; lotiheela hapato oontonga to babaa-yawaalo limongolio. 36Yio̒ mooli sama-samaata u ohiheo-hiheolo mao̒. Mongo daahangi to ngoilanggubu dunia mowali rame daa̒ sababu moohe mamoo̒ toduo mai paladu debo odelo uito.”
လက္ရွိေရြးခ်ယ္ထားမွု
YEHESKIEL 27: LAIGOR
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ