من الإنجيل – عن مرقُس 8
8
كيف طعمى المسيح 4000 أربعتلاف شخص؟
1مرّة تجمّع حوالي سيِّدنا عيسى (سلامُهُ علينا) حشد كبير، وما كان فيه شي معُن تياكلوه. قام نادى لحوارييه وقلُن: 2"أنا شفقان عهالعالم، قاعدين معي إلُن تلات تيّام وما معُن شي ياكلوه، 3وخايِف إذا بُطلُب منُن يِرجعوا عبيوتُن يقوموا يدوخوا ويوقعوا عالطريق من جوعُن. خاصّة إنّه في منُن جايين من محلّات بعيدة!" 4جاوبوه حوارييه وقالولُه: "بس كيف فينا نشبِّع كلّ هالعالم بكميّة الخبز يلّ عنّا؟" 5وسألُن سيِّدنا عن كميّة الخبز. جاوبوه 7 ترغفة. 6فطلَب من النّاس إنُّه يقعدوا، وبعد ما أخَد الترغفة السّبعة 7 وحمَد الله وشكرُه، قسّم الترغفة وبلّش يعطي حوارييه وهنّ يوزعوا عالناس. 7وكان مع أتباعُه كمان شوية سمَك صغير. فشكر الله سيِّدنا عالسمك وعهالنعمة، طلب من أتباعُه يوزعوا السمك عالموجودين كمان. 8والكلّ أكلوا لَشبعوا، وزادت فضلات، حتّى أتباعُه عبّوا شي 7 سبع سلال. 9مع إنّه كان عدد الموجودين شي أربعتلاف 4000 شخص! ومن بعدا طلب سيِّدنا منُن إنّه يفلّوا. 10ودغري رِكِب بالقارِب هوّ وحوارييه، وراحوا عمنطقة دلمانوثة.
ليه طلب المتشدّدين معجزة من المسيح؟
وبعد ما طعمى سيّدنا عيسى (سلامُهُ علينا) أربعتلاف 4000 شخص، راح هو وحوارييه عمنطقة دلمانوثة. 11وهونيك إجِت لعندُه جماعة من المتشدِّدين وصاروا يجادلوه ويطلبوا منُّه لسيِّدنا شي علامة من الله عشان يقتنعوا إنّه هوّ المسيح المنتظر. 12قام تنهَّد من كلّ قلبُه وهوّ كتير مضايَق منُن وقال: "ليه هالشعب بضلّ يطلب معجزة؟ قلكُن الحقيقة: هالشعب ما رح يشوف المعجزة يلّي عم بصرّ يشوفا أبداً!" 13وتركُن وركِب بالقارِب مع حوارييه وراح عالطرف التاني من بحيرة طبريّا.
المسيح بوادي وحوارييه بوادي
14وبس نسيوا الحواريين ياخدوا معُن أكِل وكان باقي بس رغيف واحَد بالقارِب، 15ووصّاهُن سيّدنا عيسى (سلامُهُ علينا) وقلُّن: "انتبهوا منيح من العجينة المجبولين منها المتشدّدين وعجينة إبن هيرودس!" 16بس حوارييه صاروا يحكوا بين بعض ويقولوا: "ما بقي معنا خبز!" 17فَعِرِف سيِّدنا بشو عم يحكوا وسأَلُن: "إنتو ليه عم تقولوا إنُّه ما في خبز؟ لسَّه بعدا بصيرتكُن مسكرة ما عم تفهموا؟ هالقد عقلكُن مسكَّر؟ 18إنّه عندكُن عيون بس ما بتشوفوا! ودينين وما بتسمعوا؟ كيف ما بتتذكَّروا؟ 19لمّا قسّمت الخمس 5 ترغفة وطعميت الخمستلاف 5000 شخص، وقتا كمّ سلّة كمان من الّي بقي عبّيتوا؟" جاوبوه: "12 تنعشر سلّة" 20"طيب، ولمّا قسّمت ال 7 سبع ترغفة وطعميت الأربعتلاف 4000 شخص، كمّ سلّة كمان عبّيتوا؟" فقالولُه: "سبعة 7" 21"ولسّه بعدكُن ما فهمتوا؟" قلُّن سيّدنا.
المسيح بيشفي أعمى ببيت صيدا عمرحلتين
22ولمّا وصل سيِّدنا عيسى (سلامُهُ علينا) وحوارييه على بيت صَيدا الجليل، جابولُه لسيِّدنا بعض النّاس رجّال أعمى وترجّوه إنّه يلمسُه ويشفيه. 23قام أخد سيِّدنا الأعمى من إيدُه وطلَّعُه برّات الضيعة، وهونيك بزق على عيون الرجّال، وحطّ إيديه عليهن وسألُه: "شايِف شي؟" 24اتطلّع وقال: "شايِف خيالات ناس، بس كأنُّن شجر عم يمشوا" 25رجِع حطّ سيِّدنا عيسى إيديه على عيون الرجّال مرّة جديدة، وفتّحلُه عيونُه عالآخر قام صار يشوف بكلّ وضوح، 26وبعتُه سيِّدنا عالبيت وقلُّه: "بتروح دغري عالبيت، ما بتمرق بالضيعة." حتّى ما يخبِّر حدا شو صار معُه.
شو عم بقولوا النّاس عن المسيح؟
27وراح سيِّدنا عيسى (سلامُهُ علينا) مع حوارييه، عضِيَع قريبة من قيصريّة فيليب، بجبل الشّيخ نواحي بحيرة طبريّا، وهنّ عالطريق سأل حوارييه: "شو عم بقولوا عنّي النّاس؟ مين أنا؟" 28جاوبوه: "بقولوا إنَّك النبي يحيى يلّي قام من بين الأموات، وفيه ناس بتقول إنَّك النبي إلياس ورجِع من غيبتُه، والبعض بقول إنّك نبي من الأنبياء". 29قام رجِع سألُن: "بس إنتو شو بتقولوا؟ مين أنا؟" دغري جاوب بطرس: "إنتّ المسيح صفيّ الله المنتظر". 30وقام حذَّرُن إنُّه هلأ ما يقولوا لأيّ حدا عنُّه.
للمرّة الأولى المسيح بخبَّر عن موتُه وقيامتُه
31وبلَّش سيِّدنا عيسى (سلامُهُ علينا) يخبِّر حوارييه عن: إنُّه لازِم يتعرَّض للآلام، وإنُّه قادة الشّعب وكبار رجال الدّين وعُلما التوراة رح يرفضوه، وإنُّه رح يِنقَتَل، ولكِن بعد تلات تيّام رح يقوم من الموت ويُبعَث حيّاً. 32وكان عم بيحكيهُن بهالموضوع بكلّ صراحة، بس بطرس أخدُه عجنب وصار يعاتبُه عحكيُه، إنّه الله ما بيِسمح لسيّدنا يموت هيك، 33لكن سيّدنا التفت شاف حوارييه قام بهدّلُه لبطرس وقلُّه: "روح من وجّي يا شيطان! إنتَ أفكارَك متل البشَر وبعيد عن مشيئة الله".
34ومن بعدا نادى الجَمِع يلّي كانوا هونيك، يقربوا عليه مع الحواريين وقلُّن: "يلّي بدُّه يتبعني لازِم ينكُر نفسُه، ويهيِّء حالُه للتعذيب والموت بسبيلي، وبعدين بصير من أتباعي. 35لأنّ يلّي بدُّن يحافظوا عحياة الدّنيا هنّ يلّي بيخسروا حياتُن، أمّا يلّي بضحّوا بحياة الدّنيا كرمالي وبسبيل رسالتي هنّ يلّي بيربحوا حياتُن. 36شو بيِستفَيد الواحَد إذا بيِربَح العالم كلُّه وبيِخسَر نفسُه بالآخرة؟ 37لأنُّه ما في شي بعوِّض الإنسان عن حياة الخلود. 38وبالحقيقة، كلّ واحَد بيخجَل فيّي وبرسالتي إدّام هالنّاس الضّالة الشرّيرة، بيِخجَلّ فيه سيِّد البشر وما بينصرُه لمّا بيجي باليوم الأخير بجلال الله أبوه الصّمَد مع الملايكة الأطهار".
လက္ရွိေရြးခ်ယ္ထားမွု
من الإنجيل – عن مرقُس 8: LRT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2021 Sabeel Media