من الإنجيل – عن مرقُس 15

القرار بتسليم المسيح لبيلاطس

1لمّا طلع الصبح، بعد ما تشاوروا كبار رجال الدّين والشيوخ وعلما شريعة التوراة وكلّ أعضاء المجلس الأعلى مع بعض بموضوع سيّدنا عيسى (سلامه علينا)، وطُلِع فيه القرار، قاموا ربطوه وأخدوه سلَّموه لبيلاطس الحاكِم الرّوماني لمنطقة يهوذا. 2فسألُه بيلاطُس: "إنتَ ملك اليهود؟" جاوبُه سيّدنا: "إنتَ عم تقول!" 3قاموا وجّهولُه كبار رجال الدّين تهم كتيرة. 4ورجِع سألُه بيلاطس مرّة تانية: "عندَك شي جواب؟ مش سامِع بشو عم يتّهموك؟" 5ولكن سيّدنا عيسى ما جاوَب بِولا كلمة لدرجة خوِت فيه بيلاطس.

ليه قرّر بيلاطس يحكُم على المسيح بالموت؟

6وكان بيلاطس عكلّ عيد فصح بيطلق واحد من السّجنا من إختيار النّاس. 7واجتمعوا النّاس عنده يطالبوه يعمل يلّي معوّدُن عليه، 8فقام قلّن: "بطلقلكُن سراح ملك اليهود؟" 9لأنّه عرف كبار رجال الدّين سلّموه سيّدنا عيسى (سلامه علينا) من باب الحسد، 10فحرّضوا كبار رجال الدّين الجمع الموجود عشان يختاروا باراباس تَيُطْلَق بيلاطس سراحُه. 11ووقتا كان باراباس مسجون بجريمة قتل مع المتمردين عإيّام الثورة ضدّ الرّومان. 12فعاد بيلاطس وسألُن مرّة تانية: "شو بدكُن ياني أعمل بيلّي بتسموه ملك اليهود؟" 13فهاجوا وماجوا وصاروا يصرخوا: "اصلبُه!" 14وسألُن بيلاطس: "بس شو الجريمة الّي ارتكبا؟" قام ارتفع صريخُن أكتر وأكتر: "اصلبُه! اصلبُه!" 15فقرَّر بيلاطس إنّه يُرضي النّاس وأطلق باراباس. وسلّم سيّدنا عيسى (سلامه علينا) لجنودُه يصلبوه بعد ما أمر بجلدُه.

شو صار مع المسيح على الصّليب؟

16فأخدوا الجنود الرومان سيّدنا عيسىى (سلامه علينا) عقصر الولاية، واجتمعِت كلّ الكتيبة. 17ولبّسوا سيّدنا توب لونُه بنفسجي متل موف، لون الملوك، وضفّرولُه إكليل من شوك وحطّوه عراسُه، 18وصاروا يلقوا عليه التحيّة بإستهزاء ويقولوا: "السّلام عليك يا ملك اليهود!" 19وهنّ وعم يضربوه بالعصي عراسُه ويبزقوا عليه، ويركعوا إدّامُه بإستهزاء، 20ومن بعد ما شبّعوه مهزأة، شالوا عنّه التوب البنفسجي ولبّسوه تيابُه، وأخدوه لبرّه ليصلبوه.

21ووقتا كان مارِق عالطريق سمعان القريني من ليبيا بيُّن لاسكندر وروفُس، وكان جاية من الضّيعة عالمدينة، فأجبروه الجنود يحمل الصّليب، 22وأخدوا سيّدنا عيسى (سلامه علينا) عمكان إسمُه "جُلجُثة" معناتا تلّة الجمجمة، 23وهونيك قدّمولُه شراب مخلوط بمادة المُرّ، تيخفّفوا من وجعُه وقت يصلبوه بس رفض سيّدنا إنّه يِشربه. 24‏-25والسّاعة تسعة الصّبح دقّوا الجنود المسامير بإيديه وإجريه وعلّقوه عالصليب. وعملوا قُرعة عتيابُه وصاروا يتقاسموها بيناتُن. 26وكان عنوان التّهمة: "ملك اليهود" واتعلَّق الحكم علوحة فوق راسُه. 27‏-28ووقتا انصلَب معُه تنين من قطّاع الطّرق، واحَد عيمينُه والتاني عشمالُه. 29وكانوا النّاس الّي يمرقوا من هونيك يهزّوا راسُن بإستهزاء ويوجهولُه شتايِم ويصيروا يقولوا: "يا قادِر تهدُم بيت الله وتِرجَع تبنيه بتلات تيّام! 30قدور خلِّص حالَك ونزال عن الصّليب!" 31وما وِقفِت عالنّاس العاديّة بس! كمان كبار رجال الدّين وعلما شريعة التوراة صاروا يتمهزؤوا ويقولوا: "نجّى كتار غيرُه، ما بيِقدَر ينجّي حالُه؟ 32إذا كان هوّ المسيح المنتظر ملك بني يعقوب عنجد، يقوم يِنزَل عن الصّليب، ووقت نشوف بعيوننا منآمن!" وما ضلّ حدا ما اتمهزأ عسيّدنا عيسى حتّى التنين المصلوبين معُه.

كيف تمّ موت المسيح على الصّليب؟

33وبعزّ الضّهر، فجأة صار ظلام عكلّ الأرض ضلّت العتمة لوقت العصر. 34السّاعة تلاتة صرخ سيّدنا عيسى (سلامُه علينا) بصوت عالي يقول: "إلُوي إلوي لما شبقتني"؟ ومعناتُه: "إلهي، إلهي ليه ترَكْتني؟" 35ولمّا سمعوه بعض الموجودين صاروا يقولوا: "هيدا عم بنادي النبي إلياس!" 36وركَض واحَد منُن بلّ سفنجة بشراب مخلَّل وحطّا عطرف عصاية ورفعا عتمّ سيّدنا عأساس يسقيه وصار يقول: "انطروا شوي بركي بيجي النبي الياس وبِنَزّلوا!" 37بس هون كان صرَخ سيّدنا (سلامُه علينا) صرخة قويّة وعالية وسلَّم الرّوح، 38فانشقّت الستارة الموجودة ببيت الله لشقفتين من فوق لتحت. 39وكان الضابط قائِد الحرس الرّوماني واقِف قبالِة سيّدنا عيسى، وبس شاف كيف توفّى قال: "فعلا هالإنسان كان الإبن الرّوحي لالله". 40وكان فيه جماعة من النّساء عم يراقبوا من بعيد وبيناتُن مريم المجدليّة، ومريم إمُّن ليعقوب الصغير ويوسي، وسالمة 41يلّي كانوا من أتباع سيّدنا وكانوا يخدموه بس كان بالجليل، وكتار نساء غيرُن من الّي طلعوا معُه عالقِدس.

هل اندفن المسيح؟

42وبمسا يوم التّحضير وهوّ يوم ما قبل السّبت، نهار العبادة وعدم العمل، 43إجا يوسف الرّامي وهو عضو مهمّ بالمجلس الأعلى اليهودي، وهوّ كان من النّاس النّاطرين ظهور المملكة الربّانية. وفات بكلّ جرأة عند بيلاطس الحاكم الرّوماني طلب منُّه جثمان سيّدنا عيسى (سلامُه علينا). 44فاستغرب بيلاطس إنه معقول بهالسرعة يكون مات! ونادى سأل قائِد الحرس: "صرلُه زمان ميّت؟" 45وبس أكّدلُه القائِد الخبر قام سمح ليوسِف إنّه ياخد الجثمان. 46فاشترى يوسِف كفن من كتّان ونزّل الجثمان من عالصّليب، وكفَّنُه وحطُّه بقبر محفور من صخر، ودحرج حجر كبير سكّر فيه باب القبر. 47ووقتا مريم المجدليّة ومريم إمّ يوسي هنّ يلّي شافوا وين اندفن سيّدنا عيسى (سلامه علينا).

လက္ရွိေရြးခ်ယ္ထားမွု

من الإنجيل – عن مرقُس 15: LRT

အေရာင္မွတ္ခ်က္

မၽွေဝရန္

ကူးယူ

မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ

الترجمة اللبنانية مع القافية အေၾကာင္းကို ပို၍ သင္ယူပါ။

من الإنجيل – عن مرقُس 15