من الإنجيل – عن مرقُس 13
13
شو مصير بيت العبادة وأتباع المسيح من بعدُه؟
1ترَك سيّدنا عيسى (سلامُهُ علينا) حرم بيت الله، وهنّ وضاهرين لبرّة قلُّه أحد حوارييه: "يا فضيلة المُعلّم، شوف ما أحلى هالمباني وما أروع حجارِتا!" 2فقلُّه سيّدنا: "شايِف هالأبنية وعظمِتا؟ مش رح يبقى منها حجر على حجر! رح تنهدِم كلّها".
3ولمّا كان سيّدنا قاعِد بجبل الزيتون بوجّ حرم بيت الله، سألوه بطرس ويعقوب ويوحنّا وأندراوُس بينُن وبينُه: 4"خبّرنا يا فضيلة المُعلّم أيمتى رح يصير هالخراب، يعني شو العلامة يلّي بتدلّ إنّه قرَّب هالشّي؟" 5فجاوبُن سيّدنا: "أوعى حدا يِخدَعكُن، 6كتار رح ينتحلوا إسمي ويقولوا: "أنا المسيح صفيّ الله" ورح يخدعوا ناس كتير، 7فإذا سمعتوا بمعارِك، وأخبار حروب، ما تفزعوا، هيدا الشّي لا بدّ إنّه يصير، بس مش يعني إنّه النهاية، 8رح يصير فيه عداوة بين الأُمم، وتنقلب ممالِك على ممالِك، ورح يصير فيه زلازل بمحلّات كتيرة، ومجاعات كمان، بس كلّ هيدا علامات أوّليّة لأوجاع ما قبل الولادة، ولادة بداية جديدة.
9أمّا إنتو فانتبهوا على حالكُن، لأنّه حَياخدوكُن عالمحاكِم وحتنضَرَبوا ببيوت العبادة، وحيسلموكُن للحكّام بتهمة إنكُن أتباعي، ووقتا بتكون فرصتكُن لتشهدوا عنّي، 10بس قبل كلّ هيدا لازِم رسالتي تنتِشر بين كلّ شعوب الأرض، 11ولمّا ياخدوكُن تيسلموكُن، لا تقلقوا شو رح تقولوا، بس قولوا وقتا شو الله بيوحيلكُن إنكُن تقولوه، لأنّه مش إنتو يلّي رح تحكوا، الله بروحُه رح يعطيكُن الكلام وتحكوا. 12بهالوقت رح يسلِّم الخيّ خيُّه للموت، بسبب إيمانُه فيّي، والأب إبنُه والاولاد أهاليُن ويتسبَّبوا بموتُن، 13وإنتو رح تكونوا مكروهين من كلّ النّاس لأنكُن أتباعي بس يلّي بيتحمَّل للنهاية، بتِنكتبلُه النجاة.
الخراب الكبير ما بعد المسيح
14جاوَب سيّدنا عيسى (سلامُهُ علينا) بعض الحواريين لما سألوه عن علامات خراب بيت الله وأيمتى رح يصير وقلُّن: "بس تشوفوا "شي نجس ورهيب" موجود داخل بيت الله محل مش مفروض يكون، يلّي من منطقة يهوذا لازِم يهربوا عالجبال، 15ويلّي عسطح بيتُه مش لازِم يرجع تياخُد غراضُه. 16حتّى لّي بكون بالحقلة ما يِرجَع تياخُد توبُه. 17ويا ويل الحوامِل يلّي بكونوا عم برضعوا بهيديك الإيّام! 18وبس يجي وقت هالخراب، إدعوا لربكُن ما يكون بفصل الشّتا. 19لأنّه أساساً بهيديك الإيّام رح يجي ضيق ما بعده ضيق، ما صار متلّه من وقت ما الله خلق الكون، ومتلُه مش رح يكون. 20ولو ما يقصِّر الله من هيديك المدّة، ما كان حدا بيِقدر إنّه ينجى، لكن الله تلطَّف بعبادُه المُختارين.
21وإذا حدا قلكُن إنّه المسيح المنتظر موجود هون أو هونيك! أوعى تصدقوا. 22لأنّه رح يظهر دجّالين كتير بيِدِّعوا إنّهن المسيح. ورح يظهر ناس بيدّعوا النّبوّة. وبيعملوا معجزات وعجايِب، بس هيدول مش أكتر من مُدّعين، وكلّ شي بدُن ياه إذا بيِقدَروا! هو تضليل المختارين، 23فإذن انتبهوا، كونوا يا عباد الله على حذر! أنا نبّهتكُن بكلّ هالشّي قبل ما يصير".
24وكمّل سيّدنا عيسى كلامُه وقال: ومن بعد هالضّيق، متل ما
مذكور بكتب الأوّلين، لمّا ذكروا عدل الله وحكمُه عالضّالين،
رح تعتِّم الشّمس، والقمر بيِنطُفي.
25وحتوقَع النجوم من السّما
ويختلّ توازن القوّات الروحيّة.
26ساعِتا بشوفوا النّاس سيّد البشر جاية بين الغيوم بكلّ عزّة وهيبة. 27وبيِبعت ملايِكتُه عجميع أنحاء العالم، تيِجمَع المختارين من كلّ مكان تحت قبّة السّما".
العبرة من شجرة التين
28نبَّه سيّدنا عيسى (سلامُهُ علينا) بعض حوارييه وقال: "خدوا عبرة من شجرة التّين، متى ما بلّشِت أغصانا تطرى ويطلعلا ورق أخضر، بتعرفوا إنّه الصّيف قريب. 29وهيك بس تشوفوا كلّ هالحوادِث عم تصير بتخبِّركُن بإنُّه مجيئي صار عالبواب. 30وبقلكُن الحقيقة، مش رح يفنى هيدا الجّيل قبل ما تتمّ كلّ هالأحداث. 31بقلكُن كمان، السما والأرض بزولوا، بس كلامي ما بزول أبداً.
اسهروا خليكُن واعيين
32وبالنسبة لهيديك اليوم، ما حدا بيعرِف أيمتى موعَد هالأحداث ولا أيمتى رح تجي السّاعة، لا الملايكة يلّي بالسّما ولا حتّى سيِّد البشر. فالله الآبّ الصّمد هوّ وحدُه لّي بيعرف. 33فخدوا حذركُن واسهروا لأنكُن ما بتعرفوا أيمتى رح يحين هالوقت، 34متلكُن متل رجّال مسافر وترك بيتُه أمانة مع خدّامُه، وعطاهُن حريّة التصرُّف بالبيت، كلّ واحَد بيعمِل شغلُه، ووصّى النّاطور إنّه يسهر عالحراسة. 35لهيك اسهروا لأنكُن ما بتعرفوا إيمتى بيجي صاحِب البيت، المسا، بنصّ الليل، الفجِر، أو الصّبح! 36فأوعى يجي يلاقيكُن غفلانين، 37ويلّي قلتلكُن ياه بقولوا لكلّ الناس: اسهروا! كونوا واعيين."
လက္ရွိေရြးခ်ယ္ထားမွု
من الإنجيل – عن مرقُس 13: LRT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2021 Sabeel Media