من الإنجيل – عن متّى 7
7
ما تحكموا عحدا
1"لا تحِكْموا عحدا، تَ ما ينحكَم عليكُن.
2لأنّه متل ما بتحاسبوا الناس، ربنا بحاسبكُن.
وذات المكيال يلّي بتكيلوا فيه، ربنا بكيل إلكُن.
3وإنتَ ليش بتشوف القشّة الّي بعين خيَّك،
وما بتلاحِظ الخشبة يلّي بعينَك؟
4وبتتجرأ وبتقلُّه: "خلّيني القشّة شيلَّك"
وإنتَ الخشبة بعدا بعينَك!
5يا منافِق، ما شيل الخشبة الّي بعينَك،
وهيك بتصير تشوف، تَ تشيل شو فيه بعين خيَّك."
6"لا تعطوا الإشيا الطاهرة عندكُن ل يلّي بدنسوها،
ولا ترموا الإشيا الغالية ل يلّي ما بقدّروها،
تَ ما يقطّعوكُن شقف وبإجريهُن يدعَوسوها."
اطلبوا من ربّكُن بيعطيكُن
7"ادعوا ربكُن بتنالوا طلبكُن،
اطلبوا منُّه بيعطيكُن،
دقّوا بابُه بيفتحلكُن.
8لأنّه كلّ مين بيدعي بيُستجابلُه،
وكلّ مين بيطلب بْيِنعطالُه،
وكلّ مين بدِقّ بينفتَحلُه.
9مين فيكُن بيعطي إبنُه حَجرة بدل الخبز إذا طَلب،
10أو بيعطيه حيّة بدل السّمك عند الطَلب!
11فبالرغم من ظلمكُن،
بتعطوا أحسن الإشيا لولادكُن،
فكيف بالحري وليّكُن الرحمن الرحيم في عُلاه!
بيعطي أفضل الخيرات لِمَنْ دعاه.
12فمتل ما بتحبّوا الناس تعاملكُن، عاملوا التانيين،
لأنّه هيدي هيّ خلاصة التوراة وكتب الأوّلين."
الطريق الضيِّق للجنّة
13"ادخلوا إلى حضرة الله من الباب الضيِّق،
لأنّه الباب الواسع والطريق السهل بودّوا للهلاك والمصير السيّء،
وكتار هنّ يلّي هالباب بيدخلوه،
14وما أضيق الباب وأصعب الطريق البودّي عالجنّة
وما أقلّ يلّي بلاقوه.
من ثمارهم تعرفونهم
15انتبهوا من رجال الدّين، البيدّعوا النبوّة، الكذَابين،
يلّي بيجوكُن بمظهر الحملان الوديعين،
وهنّ بالحقيقة دْياب مفترسين.
16أساساً من ثمارهُن مكشوفين،
فبعمرُكُن طلَّعتوا من الشّوك عنب، أو من العلّيق تين؟
17طول عمرُه الشّجر الجيّد بيعطي ثمر منيح،
أمّا الشجر السيّء فبيعطي ثمر قبيح.
18فلا الشجرة المنيحة بتعطي ثمر طالِح،
ولا الشجرة الرديّة بتعطي ثمر صالِح.
19وكلّ شجرة ما بتعطي ثمر جيّد بتنقطع،
وبتنكبّ بالنار حطب وقُطَع.
20وهيك المُدّعين الكّذابين،
من ثمارهم مكشوفين.
21ومش كلّ مين بقلّي: "يا سيّدنا،"! وبكون إلي من الطايعين،
بيدخُل عالمملكة الربّانيّة، ولكن الداخلين هنّ المنضمّين،
يليّ بطيعوا وليّي الرحمن بعُلاه ربّ العالمين.
22وكتار يلّي رح يقولولي بيوم الدّين:
"يا سيّدنا، مش بقدرتَك نحنا تنبّأنا؟
وبقدرتَك الملبوسين من الجنّ حرّرنا؟
وبقدرتَك كمان معجزات كتيرة صارت عإيدينا؟"
23وقتا رح قلهُن علناً: "أنا أبداً ما بعرفكُن، إنتو مين!
ابعدوا عنّي يا مخالفين شريعة الله، يا ضالّين."
عأيّ أساس لازم تبني حياتك؟
كمّل سيّدنا عيسى (سلامه علينا) خطبتُه بأتباعُه، بعد ما عطاهُن عدّة تعاليم وقال:
24"فكلّ مين بيقبَل تعليمي وبطبِّق كلماتُه،
متلُه متل الشخص العاقِل يلّي عأسُس متينة بنى حي اتُه،
فحياتُه متل بيت بناه عأرض صخريّة،
25وقدّ ما ينزل مطر، وتفيض أنهار، وتهبّ ريح قويّة،
البيت ما بينهار، لأنّه أساساتُه عالصخر مبنيّة.
26أمّا يلّي بيسمع كلامي وما بطبِّق كلماتُه،
متلُه متل شخص جاهِل بنى بيتُه عأرض رمليّة.
27فنزل المطر، وفاضت الأنهار، وهبِّت ريح قويّة،
والبيت انجرف وانهار، وكان فظيع هالإنهيار."
28وبس انتهى سيّدنا عيسى من كلامُه،
تعجّبوا الحاضرين من تعاليمُه،
29لأنّه كان بسلطان يعلِّمهُن،
ومش متل كلّ معلّمين شريعتُهُن.
လက္ရွိေရြးခ်ယ္ထားမွု
من الإنجيل – عن متّى 7: LRT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2021 Sabeel Media