من الإنجيل – عن يوحنّا 11
11
المسيح يقيم ميت
1فيه رجّال كان كتير مريض إسمه لعازَر من ضيعة اسمها بيت عنيا. عندُه إختين إسمُن مريم ومارتا. 2مريم هيّ يلّي بعدين بيجي وقت بعدين تسكب العطر عإجرين سيّدنا عيسى (سلامُهُ علينا) وبتمسحِتُن بشعرها. 3وقتا بعتوا الإختين خبر لسيّدنا بقول: "يا سيّدنا، صديقك يلّي بتحبُّه كتير مريض". 4ولمّا وصل هالخبر لعند سيّدنا قال: "ما تفكّروا إنو مرض لعازر للموت وبس، مرضُه رح يرفع ذكر الله، وبيرفع ذكر الإبن الروحي لالله". 5وبالرغم من إنّه سيّدنا كان يحبّ هالعيلة كتير، 6ما راح عند لعازر لمّا خبّروه إنّه مريض بالعكس بِقِي قاعد بالمنطقة يلّي كان فيها يومين بعد. 7وساعتها قال لأتباعُه: "صار الوقت نرجع عمنطقة يهوذا". 8اعترضوا أتباعُه وقالولُه: "يا سيّدنا كيف بدنا نرجع لهونيك، شو نسيت إنّه مش من زمان قادة المنطقة اليهود حاولوا يرجموك!" 9-10قلُّن سيّدنا (سلامه علينا): "سْمَعوا منيح متل ما الله حدّد ساعات النهار التنعش، ويلّي بيمشي بضوّ النهار ما بيتفركش، هيك حدّد الله وقت لإلي تأعمل يلّي بعتني كرمالُه، يلّي ما بيمشي بنور الله رح يوقع متل يلّي بيمشي بعتمة الليل." 11بعدين قلُّن: "حبيبنا لعازر نام، وأنا رايح فيقُه" 12جاوبوه اتباعُه: "يا سيّدنا، إذا كان نايم ومرتاح، خلص قريباً بيشفى" 13بس سيّدنا عيسى (سلامه علينا) كان قصدُه بالنوم يعني الموت، لكن أتباعُه ما فهموا عليه. 14رجع شرح شو قصدُه وقال: "لعازر مات. 15وأنا فرحان إنّي ما كنت هونيك وقت موتُه، لأنّه هيدا بخلّيكُن ترجعوا تقوّوا إيمانكُن فيّي. مَشّوا نروح لعندُه". 16قال توما يلّي لقبُه بالتوأم لرفقاتُه: "قوموا نروح معُه ووقت يقتلوه أهل منطقة يهوذا منموت معُه" 17وبس وصِل سيّدنا عطراف بيت عنيا. عرِف إنّه لعازر متوفّي ومدفون من أربع تيّام. 18وكانت بيت عنيا بتبعُد تقريباً شي تلاتة كيلومتر عن القدس، 19فالناس يلّي كانوا عم بعزّوا الإختين كتار. 20ولمّا عرفت مارتا إنّه سيّدنا إجا، طُلعِت من البيت تلاقيه عالطريق بس مريم بقيت بالبيت. 21قالت مارتا لسيّدنا: "يا فضيلة المعلّم، لو جيت قبل وكنت معنا ما كان خيّ مات، 22بس حتّى لو مات أنا بوثق أنّه الله بيعطيك شو ما بتطلُب منّه!" 23أكّدلا وقلّا: "ما تخافي يا مارتا، خيّك رح يرجع يعيش". 24قالتلُه مارتا: "صحيح، معك حقّ رح يقوم بيوم القيامة متل ما كلّ الميتين رح يقوموا!" 25ردّ سيّدنا وقلّا: "أنا مصدر القيامة والحياة، ويلّي بآمن فيّي بعد ما يموت رح يكون إلُه دار الخلود، 26يعني رح يعيش خالد عند ربُّه... إنتَ بتآمني فيّي؟" 27قالتلُه: "طبعاً مولانا، أنا بعدني على إيماني إنّك إنت المسيح الإبن الروحي لألله، يلّي كنّا ناطرينُ مجيئُه عالأرض."
28ومن بعدا رجعِت مارتا عالبيت وأخذت إختا عجنب وقالتلا: "المُعلِّم هون وبدُّه يشوفِك". 29قامت مريم وراحت بسرعة تشوف سيّدنا. 30بس (سلامه علينا) كان بعد ما وصِل عقلب الضيعة وكان بعدُه محل ما شافتُه مارتا. 31الناس يلّي كانوا بالعزا وقت شافوا مريم ضاهرة مستعجلة من البيت فكّروها رايحة عقبر خيّها من كتر حزنها وقاموا لحقووَا ومشيوا وراها. 32ولمّا وصلوا كلّن محل ما كان سيّدنا عيسى موجود، رمِت حالا مريم عإجرين سيّدنا وقالتلّه وهي عم تبكي من كلّ قلبا: "يا مولانا، لو كنت هون معنا ما كان خيّي مات". 33بس شاف سيّدنا عيسى دموع مريم وأدّيش كانت متأثرة هيّ وكلّ يلّي كانوا موجودين هونيك، زعل وانقهر. 34وقام سألُن: "وين دفنتوه؟!" قالولُه: "تعا شوفُه وين!" 35وعقد ما اتأثّر سيّدنا من الموقف قام بِكي، 36ويلّي كانوا حواليه شافوا دموعُه قالوا: "ليك أدّيه كان يحبّ لعازر!" 37وتانيين قالوا: "إنّه يلّي قِدِر يخلّي الأعمى يشوف، ما كان بيقدر ما يخلّي لعازر يموت!" 38ورجع سيّدنا اتأثّر كتير مرّة تانية. وكان بهالوقت وصل عقبر لعازر يلّي هو عبارة عن مغارة مسكّرة بحجر. 39التفت سيّدنا وقال للواقفين هونيك: "زيحوا هالحجر!" قالتلُه مارثا: "يا مولانا، خيّي طُلعِت ريحتّه إلُه ميّت أربع تيّام!" 40جاوبا: "أنا ما قلتلِّك إذا بتآمني فيّي بتشوفي كيف رح يتمجّد إسم الله!" 41وبس زاحوا الحجر، رفع راسُه سيّدنا عيسى واتطلّع بالسما وناجى ربُّه وقال: "إلَك الحمد يا الله يا أيّها الوليّ الرّحمن لإستجابتك لدعائي. 42أنا بعرف إنّك دايما بتستجبلي بس عم بطلب منّك عصوت عالي حتّى يآمنوا كل الموجودين إنّك إنت يلّي بَعتْني إلهُن". 43بعدين صرخ سيّدنا بصوت كتير عالي وقال: "قوم ضْهار يا لعازر!" 44قام ضهر لعازر من القبر وكان ملفوف بالكفن ووجُّه مغطّى بمنديل. وقال سيّدنا: "فكّوا الكفن عنُّه وخلّوه يروح".
လက္ရွိေရြးခ်ယ္ထားမွု
من الإنجيل – عن يوحنّا 11: LRT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2021 Sabeel Media