سيرة الحواريين 10

كورنيليوس بدّه يقابل الحواري بطرس

1بمدينة قيصريّة، عإيّام جيش الإحتلال الروماني، كان في رجّال إسمُه كورنيليوس، وكان قائد الكتيبة الإيطالية. 2كورنيليوس كان رجّال تقيّ، بخاف الله، هوّ وأهل بيتُه، وبيتصدّق عالمحتاجين كتير، وما بأجّل صلاة، وبيطلب وجه ربّه عطول. 3وبيوم، عوقت العصر، ظهرلُه برؤيا ملاك مُرسَل من عند الله تعالى، وقلّه: "يا كرنيليوس!" 4وهوّ ومرعوب وعم يتطلّع بالملاك ردّ: "نعم يا سيّد؟" فقلُّه الملاك: "صلواتَك وصدقاتَك انقبَلِت إدّام ربّ العالمين، ربّك راضي عنّك، 5وهلأ قوم بعات كم رجّال عمدينة يافا يروحوا ورا سمعان الّي المعروف بإسم بطرس. 6هوّ نازل ضيف عند سمعان الدبّاغ، ببيتُه عشطّ البحر." 7وبس انصرف الملاك، الّي كان عم يحكيه، نادى كورنيليوس تنين من خدّامُه، وعسكري تقيّ من يلّي كانوا يرافقوه، 8وخبّرُن بكلّ شي وبعتُن عيافا.

رؤيا الحواري بطرس

9وتاني يوم، بالوقت يلّي كانوا الرجال مسافرين فيه وعم بقرّبوا عمدينة يافا، طُلِع الحواري بطرس عسطح بيت سمعان يصلّي صلاة مستحبّة، عالضهر تقريبا. 10وقام جاع كتير واشتهى الأكل. وبينما كانوا عم بجهزولُه شي ياكلُه، انكشَف عنُّه الحجاب. 11فشاف السما مفتوحة، ونازِل منها شي متل ملاية كبيرة معقودة، إلها أربع أطراف واصلة عالأرض. 12وكان فيها من كلّ أنواع الحيوانات، من دواب وزواحِف وطيور. 13وإجاه صوت قلُّه:

"قوم يا بطرس، دباح وكول."

14فردّ بطرس:

"لأ يا سيّد، أنا ما باكُل أكل محرّم أو شي نجِس أبداً."

15فرجِع الصوت قلُّه: "يلّي ربّ العالمين طهّرُه، إنتَ ما فيك تعتبرُه نجس!"

16وتكرّر هالشي تلات مرّات قبل ما ترتفع الملاية عالسّما ويصحى بطرس.

17وتحيّر بطرس وقعد يسأل حالُه عن معنى هالرؤيا الّي شافا! بهالوقت، كانوا الرجال المبعوتين من قِبَل كورنيليوس سألوا عن بيت سمعان ووصلوا عالباب. 18وبلّشوا ينادوا ويسألوا: "سمعان يلّي لقبُه بطرس نازِل ضيف هون؟" 19وهوّ وعم بحاول يفهم شو الرؤيا الي شافا، قام إجاه وحي من روح الله وقلُّه:

"سماع، فيه تلات رجال عم بفتشوا عنَّك. 20قوم نزال قابلُن وروح معُن وما تتردّد لأنّي أنا الله بعتُّن."

21وقام نزل بطرس عند الرجال وقلُّن:

"يا أهلا وسهلا! هيّاني أنا يلّي عم بتفتشوا عنُّه، شو سبب زيارتكُن؟"

22جاوبوه: "الضابط كورنيليوس، هوّ رجّال تقي وبخاف ربُّه، ومشهود إلُه، وبيحترمُه كلّ اليهود. إجاه وحي عن طريق ملاك طاهر، وقلُّه إنّه يستدعيك عبيتُه، عشان يسمع الكلام الّي عندَك."

23وهيك دعاهُن بطرس تيبقوا بهيديك الليلة.

وتاني يوم قام راح معهُن، ورافقوه شويّة إخوة من يافا. 24ووصلوا عقيصريّة بعد يوم سفر، وكان كورنيليوس ناطرُن، وكان عازِم قرايبينُه وأصدقاؤه المقرّبين. 25ولمّا فات بطرس استقبلُه كورنيليوس وارتمى إدّام إجريه وانحنى. 26ولكن بطرس ساعدُه تيقوم وقلُّه:

قوم وقِّف عحيلَك، أنا مُجرّد إنسان متلَك!"

27وقام فات عالبيت وهوّ وعم بيحكيه، شاف مجموعة كبيرة من الناس مجتمعة. 28قام قلُّن:

"كلكُن بتعرفوا إنّه محرّم عشخص ملتزِم يهودي إنّه يختلط أو يزور غير اليهود. ولكن الله تعالى أظهرلي إنّه ما إعتبر أي حدا نجس أو مش طاهِر. 29لهيك لبّيت الدعوة من دون أي إعتراض. وهلأ سؤالي إلكُن: "شو السبب بعتّولي؟"

30فقلُّه كورنيليوس: "من أربع تيّام، عوقت العصر، أنا وعم صلّي ببيتي. فجأة شفت واحد واقف إدّامي وتيابُه عم تبرُق وقلّي: 31"يا كورنيليوس، الله سمع صلاتَك، وتقبّل صدقاتَك، ورضي عنَّك، 32فبعات عيافا ورا سمعان المعروف بإسم بطرس. هوّ نازل ضيف عند سمعان الدبّاغ، بيتُه عشطّ البحر." 33ولهيك فوراً بعتت وراك. وإنتَ كريم ولبّيت الدعوة. وهاي هلأ نحنا كلنا مجتمعين بحضرة ربّ العالمين وجاهزين لنسمع كل شي أمرَك فيه سبحانُه."

كلمة الحواري بطرس ببيت كورنيليوس

34وهون استعدّ الحواري بطرس للكلام وقال: "بالحقيقة، تبيّنلي فعلاً إنّه ربّ العالمين ما بيتحيّز لحدا، فالكلّ عند الله متساويين، 35وأكتر من هيك، فهوّ بيتقبّل الّي بخافوا ربُّن، من كلّ الأمم، المتّقين، الّي أعمالُن صالحة، مين ما كانوا. 36إنتو بتعرفوا الرسالة الّي أرسلها ربنا لبني يعقوب الّي بتقول إنّه التقرّب من الله بيحصل عن طريق سيّدنا عيسى المسيح المختار (سلامه علينا) سيّد كلّ البشر. 37وكمان بتعرفوا شو صار بكلّ منطقة يهوذا، يلّي بلّش من الجليل بعد التغطيس بالميّ، بقصد التطهّر، يلي دعى إلُه النبي يحيى (عليه السلام). 38وعن كيف الله تعالى اختار سيّدنا عيسى من الناصرة، وكيف أيّدُه بالقوة وبروحُه القدّوس، فكان سيّدنا يجول وين ما كان يعمل خير ويشفي أيّ إنسان ممسوس من شيطان. وهيدا لأنّه الله كان معُه. 39ونحنا، الحواريين، شهود على كلّ شي عملُه بالبلاد يلّي بيسكن فيها اليهود، بالإضافة للقدس، وشهود لمّا صلبوه وقتلوه. 40ولكن الله أقامُه باليوم التالت من الأموات وبعثه حياً. وأظهرُه، 41مش لكلّ الناس، بس للشهود يلّي ربّ العالمين سبق واختارُن. يعني نحنا يلّي أكلنا وشربنا معُه، بعد ما بُعِث حياً. 42ودعانا سيّدنا إنّه نُعلِن للشعب، بإنّه سيّدنا عيسى (سلامُه علينا) هوّ يلّي سبحانُه عيّنه الديّان الّي رح يحاسِب الأحياء والأموات. 43وعنّه بيشهد كلّ الأنبياء، إنّه كلّ مين بصدّقُه بيوثق فيه، بتنغفر ذنوبُه بشفاعتُه.

حلول روح الله على كورنيليوس وجماعتُه

44وبينما كان الحواري بطرس بعدُه عم يحكي، حلّ روح الله تعالى على كلّ يلّي كانوا عم يتسمّعوا عالرسالة. 45فاندهشوا المؤمنين الّي من أصل يهودي الّي كانوا برفقة بطرس، لأنّه هبة روح الله أفاضها على غير اليهود. 46فسمعوهُن عم يحكوا بلغات غير لغاتُن الأصليّة، وعم بسبّحوا ربّ العالمين. ووقتا قال بطرس:

47"وهلأ مين بيقدر يمنعُن إنّه يتغطّسوا بالميّ ليتطهّروا؟ هيدول الناس يلّي نالوا حلول روح الله، كهبة من الله، متلنا!"

48وهيك أعطاهُن الحواري بطرس تعليماتُه إنّه يتغطّسوا بالميّ بإسم سيّدنا عيسى المسيح (سلامه علينا). وكورنيليوس ويلّي معه طلبوا من بطرس والمرافقين، يبقوا عندُن كم يوم تانيين.

လက္ရွိေရြးခ်ယ္ထားမွု

سيرة الحواريين 10: LRT

အေရာင္မွတ္ခ်က္

မၽွေဝရန္

ကူးယူ

မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ

الترجمة اللبنانية مع القافية အေၾကာင္းကို ပို၍ သင္ယူပါ။

سيرة الحواريين 10