Ŵalawi 9
9
Ŵambopesi akugatanda masengo ga umbopesi
1Pagamasile agala moŵa saba ga kwaŵika pajika kwa ligongo lya masengo ga Akunnungu pa lyuŵa lya nane, che Musa ŵaaŵilasile che Haluni ni achiŵanagwe ŵachilume ni achakulu wosepe ŵa ku Isilaeli. 2Che Musa ŵansalile che Haluni “Njigale ngombe jankambaku jangakomala jiŵe mbopesi jakulechelesya sambi, ni ngondolo tonde jiŵe mbopesi ja kutinisya, inyama yose iŵe yangalemala, nipele nnyiche nayo paujo pa Ambuje Akunnungu. 3Mwasalile Ŵaisilaeli ajigale mbusi tonde jiŵe mbopesi jakulechelesya sambi, ni ng'ombe jangakomala jimo ni ngondolo jangakomala jimo, ŵanawose ukulu wao uŵe umo, wa chaka chimo ni ŵangalema kwaligongo lya mbopesi jakutinisya, 4ng'ombe jankambaku jimo ni ngondolo tonde jimo kwaligongo lya mbopesi ja chitendewele. Inyama yo chaisikite paujo pa Ambuje Akunnungu; pampepe ni mbopesi ja utandi wewanganye ni mauta ga miseituni. Akusachilwa apanganye yeleyo ligongo Ambuje Akunnungu chiŵaakopochele lelojino.”
5Ŵaichisye yanayose yo paujo pa Lisakasa lya Kusimanila mpela ila che Musa iŵatite pakwalajisya, ni Ŵaisilaeli wose kwapamo ŵajile kwima paujo pa Ambuje Akunnungu. 6Che Musa ni ŵaasalile, “Chelechi ni chindu chalamwile Ambuje Akunnungu nchitende kuti ukulu wakwe uoneche kukwenu.” 7Pelepo che Musa ŵansalile che Haluni, “Njaule ku chilisa, nkatyochesye pelepo mbopesi jenu jakulechelesya sambi ni mbopesi jakutinisya ni kutenda ujilanyo kwaligongo lyenu ni kwaligongo lya ŵandu ŵa ku Isilaeli. Nipele mpelecheje mbopesi jo kwaligongo lya ŵandu ni kwatendela ujilanyo mpela ila Ambuje Akunnungu iŵatite kulamula.”
8Nipele che Haluni ŵachisejelele chilisa ŵajisikite ajila ng'ombe jankambaku jangakomala kuŵa mbopesi jakulechelesya sambi syakwe nsyene. 9Ŵanache ŵachilume ŵa che Haluni ŵanjauchisye che Haluni miasi, nombejo ŵatoŵele chala chakwe mmiasi jo ni kujipakasya mmisengo jajili mu ndumba mwa chilisa. Miasi jajisigalile ŵajijitile kuusi kwa chilisa. 10Nambo mauta ni mbyo ni mauta gagasyungulile litooga kutyochela mu mbopesi jakulechelesya sambi jo ŵaitinisye yanayose pa chilisa mpela Ambuje Akunnungu iŵatite pakunnajisya che Musa. 11Nambo nyama ni lipende lila ŵaitinichisye paasa pa chigono kwakutalichila.
12Nipele che Haluni ŵachisikite chinyama cha mbopesi ja kutinisya ni achiŵanagwe ŵachilume ŵampelechele miasi jila, nombejo ŵajinyuluchisye mbande syose sya chilisa. 13Nipele ŵannyichisye mbopesi jakutinisya jila chipande chimochimo ni ntwe, nombejo ŵaitinichisye pachanya chilisa. 14Ŵaijosisye indu ya nlutumbo ni makongolo ni kuiŵika pachanya pa mbopesi jakutinisya jajili pachanya pa chilisa.
15Nipele che Haluni ŵajiichisye mbopesi jijaliji kwaligongo lya ŵandu, ŵajijigele mbusi ja mbopesi jakulechelesya sambi sya ŵandu, ni kujisikita, ni kujityosya kuŵa mbopesi jakulechelesya sambi sya ŵandu nti yatesile kwa ajila jandanda jila. 16Ni ŵajiichisye peuto pakutinichisya mbopesi jakutinisya jila ni kujityosya mbopesi jo chisau ni malajisyo. 17Ni ŵajiichisye mbopesi ja utandi ni ŵasapwile ligasa limo ni kuutinisya pa chilisa pampepe ni mbopesi jakutinisya ja kila kundaŵi. 18Sooni ŵajisikite ng'ombe jankambaku jila ni ngondolo tonde ja mbopesi ja chitendewele kwaligongo lya ŵandu. Achiŵanagwe ŵachilume ŵannyichisye miasi nombejo ŵajinyuluchisye mbande syosye sya chilisa. 19Mauta ga ng'ombe jankambaku jo ni ngondolo tonde jo ni mauta ga nchila wakwe ni mauta gagaunichile indu ya nlutuumbo ni mbyo syakwe ni mauta gagakusyungulila litooga 20ŵaiŵisile pachanya idali nombe che Haluni ŵagatinisye mauta gala pachanya chilisa. 21Nambo idali ila ni chiiga cha kunlyo, che Haluni ŵanyakwile mwinani ni kujelasya kuŵa mbopesi jakunyakulwa mpela che Musa iŵatite kunnajisya.
22Che Haluni paŵamalisisye kutyosya mbopesi syosye, yaani mbopesi sya kulechelesya sambi ni mbopesi sya kutinisya ni mbopesi sya chitendewele, ŵaanyakulile ŵandu makono gao ni kwapa upile, nipele ŵatulwiche paasi. 23Pelepo che Musa ni che Haluni ŵajinjilenje nkati mwa Lisakasa lya Kusimanilana, nipele ŵakopweche paasa ni kwapa upile ŵandu, ni ukulu wa Ambuje Akunnungu waoneche kwa ŵandu wose. 24Papopo Ambuje Akunnungu wauichisye mooto ni kujitinisya mbopesi sya kutinisya ni mauta gala pachanya chilisa, ŵandu wose paŵauweni mooto wo ŵanyanyisye ni kutindiŵala ni kotamisya mitwe jao mpaka paasi.
လက္ရွိေရြးခ်ယ္ထားမွု
Ŵalawi 9: YBV
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Yao New Testament © The Word for the World Southern Africa and Pioneer Bible Translators, 2018.