Ŵalawi 6
6
1Ambuje Akunnungu ŵansalile che Musa, 2Iŵaga mundu jwalijose atendaga sambi ni nganaŵa jwakukulupilichika kwa Ambuje Akunnungu, kwakunlambusya jwaŵandikene najo nkati chindu chakwasalasisya, pane chilesilwe kukwakwe kuchigosa pane kunjiŵila pane kunnambusya 3pane apataga chipanje cha njakwe chachipotele ni kulitenda nganachiona, pane kulilumbilila kwa unami pa chindu chachilichose chachikwatenda ŵandu aŵeje ni chileŵo, 4mundu achitendaga chimo ni kutenda sambi kwa chelecho, akusachilwa ausye chelecho chapatile kwa kwiŵa, pane chapatile kwa kusumula, pane chindu chapegwilwe kuchigosa, pane achila chipanje cha njakwe chapatile, 5pane chindu chachili chose chaachilumbilile kwa unami. Chausye kwautindimisyo wakwe ni konjechesya liunjili limo pa maunjili nsano kupunda pa chindu cho, nombejo champe nsyene pa lyuŵa lichapeleche mbopesi jakwe ja chileŵo. 6Nipele chaichenawo kwa jwambopesi ngondolo tonde pane mbusi tonde jangalemala kuumila mu ilango yakwe kuŵa mbopesi ja chileŵo chakwe, kuti ŵaapelechele Ambuje Akunnungu mbopesi jakulechelesya chileŵo; ndalama ja chinyama cho tijiŵe yalumo ni chipimo chachikukundikwa peuto papakukundikwa kwa kwapopelela Akunnungu. 7Kwa kutenda yeleyo jwambopesi champanganyichisye mundu jo ujilanyo paujo pa Ambuje Akunnungu, nombejo chalecheleswe chileŵo chachitesile.
Mbopesi jakutinisya
8Ambuje Akunnungu ŵansalile che Musa, 9ŵasalile che Haluni ni achiŵanagwe lilajisyo li: Mbopesi jakutinisya chijiŵe pa mooto pachanya chilisa chilo chose mpaka kundaŵi ni mooto wakwe ukwisilwe, unasimiche. 10Nipele jwambopesi chawale chiwalo chao cheswela mbe ni budula jakulongosya munkati jeswela mbe, chakumbe liu lya mbopesi jila kuumila pa chilisa ni kuliŵika mumbali mwa chilisa. 11Nipele chaule iwalo yakwe, ni kuwala iwalo ine, nipele chajigale liu lila ni kulijausya paasa chigono peuto papakukundikwa kwa mapopelo. 12Ni mooto wauli pachilisa ukusachilwa ujendechele kolela ni unasimiche. Kila lyuŵa kundaŵi, jwambopesi chajonjechesye sasu ni chapanje mbopesi jakutinisya pachanya pa mooto wo ni kugatinisya mauta ga mbopesi ja chitendewele. 13Mooto ukusachilwa ukolele moŵa gose pachilisa ni unasimiche.
Mbopesi ja nafaka
14“Yeleyi ni yaikusachilwa kutendekwa pakutyosya mbopesi ja nafaka. Uŵelesi u che Haluni chaichenawo mbopesi jo kwa Ambuje Akunnungu, paujo pa chilisa. 15Jumo mwa ŵambopesi jwa uŵelesi u che Haluni chasapule ligasa limo utandi wa mbopesi ja nafaka wewanganye ni mauta ga seituni ni kuŵika ubani pachanya pakwe ni kuitinisya pa chilisa nti chikumbuchisyo, ununjile wakwe chiwanonyelesye Ambuje Akunnungu. 16Ni utandi waukusigalila chalye che Haluni ni achiŵanagwe ŵambopesi, pangatajikwa amila. Chalile peuto papaŵichikwe pajika kwaligongo lya Akunnungu, mu lutenje mwa Lisakasa lya Kusimanilana. 17Ngasaupalila ali atasile amila. Naapele ŵanyawo kuŵa liunjili lyao kuumila mu mbopesi syaakundyochesya pa mooto. Mbopesi si siŵichikwe pajika kwaligongo lyangu kusyenesyene mpela yaili kwa mbopesi syakulechelesya sambi ni mbopesi syakulechelesya ileŵo. 18Uŵelesi wachilume ŵa che Haluni ni ŵachalye liunjili lyo pakuŵa jelejo jiŵichikwe pajika kwaligongo lyao kuumila mu mbopesi syaakupegwa Ambuje Akunnungu ni mooto. Mundu jwalijose juchakwaye mbopesi jo chaŵe aŵichikwe pajika kwaligongo lya Akunnungu.”
19Ambuje Akunnungu ŵansalile che Musa, 20“Jeleji jili mbopesi jichatyosye che Haluni ni achiŵanagwe kwa Ambuje Akunnungu pa lyuŵa litajitililwe mauta, kangomba jimo ja utandi wesyajiche chenene, nusu ja utandi wo chajityosye kundaŵi ni nusu jine chajityosye ligulo. 21Utandi wo chiuwanganywe ni mauta ga seituni ni kuteleka mu chikalango, nipele chinyichenawo nli nkatile ipandeipande ni kuiŵika pachanya chilisa kuŵa ununjile wambone waukwanonyelesya Ambuje Akunnungu. 22Ni jwambopesi jwali jwa uŵelesi u che Haluni jutajitililwe mauta kamula lipesa lyao chantyochesye Ambuje Akunnungu mbopesi jo. Lyelelyo lili liunjili lyakwe Ambuje Akunnungu, nombelyo tilitinichikwe lyose. 23Sooni mbopesi jajilijose ja nafaka jajityochekwe ni jwambopesi jitinichikwe jose, ngajikusachilwa kuligwa ng'oo.”
Mbopesi jakulechelesya sambi
24Ambuje Akunnungu ŵansalile che Musa, 25“Mwasalile che Haluni ni achiŵanagwe kuti yeleyi ni yaikuti kusachilwa pakutyosya mbopesi ja kulechelesya sambi. Peuto pakusikitila chinyama cha mbopesi jakutinisya pala ni papopo patachisikitila chinyama cha mbopesi ja kulechelesya sambi, paujo pa Ambuje Akunnungu. Jelejo jili mbopesi jiŵichikwe pajika kusyenesyene kwaligongo Ambuje Akunnungu. 26Jwele jwambopesi juchakapeleche mbopesi jo ni juchalye mbopesi jo, chijiligwe peuto papaŵichikwe pajika kwaligongo lya Akunnungu, mu lutenje mwa Lisakasa lya Kusimanilana. 27Chindu chilichose chachichijikwaye nyama jo, chichiŵe cheŵichikwe pajika kwaligongo lya Akunnungu, sooni chiwalo chilichose chajinjilaga miasi ja mbopesi jo, nipele, chiwalo cho chichikachapilwe Peuto papaŵichikwe pajika kwaligongo lya Akunnungu. 28Nambo mbopesi jo jatelechelwagwa mu chiteleko, choombo cho chichikasikwe, ni chatelechelwagwa mu choombo cha shaba, chichiŵichikwe pajika kwaligongo lya Akunnungu, chichikundikwe ni kugulula kwa meesi. 29Jwannume jwalijose jwali mu uŵelesi wa ŵambopesi akukombola kulya mbopesi jo, jili mbopesi jeŵichikwe pajika kusyenesyene kwaligongo lya Akunnungu. 30Nambo mbopesi ja kulechelesya sambi jajilijose, miasi jakwe jajinjiswagwa mu Lisakasa lya Kusimanilana kujitendela ujilanyo peuto papaŵichikwe pajika kwaligongo lya Akunnungu ngasijiligwa, mbopesi jo jitiniswe ni mooto.”
လက္ရွိေရြးခ်ယ္ထားမွု
Ŵalawi 6: YBV
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Yao New Testament © The Word for the World Southern Africa and Pioneer Bible Translators, 2018.